ປະກາດແຕ່ງຕັ້ງ ຫົວໜ້າກອງບັນຊາການ ປກສ ນວ ຄົນໃໝ່

0
6358

ກອງບັນຊາການປ້ອງກັນທີ່ຕັ້ງ ກະຊວງ ປກສ ໄດ້ຈັດພິທີປະກາດກົງຈັກການຈັດຕັ້ງການນໍາຂັ້ນສູງຂອງ ກະຊວງ ປກສ ໂດຍປະກາດຍົກຍ້າຍ ພົຈວ ບຸບຜາ ສີພົມມາ ຫົວໜ້າກອງບັນຊາການປ້ອງກັນທີ່ຕັ້ງ ກະຊວງ ປກສ ເປັນຫົວໜ້າກອງບັນຊາການ ປກສ ນະຄອນຫຼວງວຽງຈັນ ( ນວ ) ຄົນໃໝ່ ຂຶ້ນໃນວັນທີ 14 ກັນຍາ 2017, ເປັນກຽດເຂົ້າຮ່ວມໂດຍ ພົຕ ສົມແກ້ວ ສີລາວົງ ລັດຖະມົນຕີ ກະຊວງ ປກສ, ມີບັນດາຄະນະພັກ-ຄະນະບັນຊາອ້ອມຂ້າງກອງບັນຊາການເຂົ້າຮ່ວມ.

ພົຈວ ອາລູ ວາລີຊື ຫົວໜ້າກົມໃຫຍ່ການເມືອງ ປກສ ໄດ້ຂຶ້ນຜ່ານຄໍາສັ່ງ ສະບັບເລກທີ 11/ນຍ ນະຄອນຫຼວງວຽງຈັນ ລົງວັນທີ 13 ກັນຍາ 2017 ວ່າດ້ວຍການຍົກຍ້າຍພະນັກງານຮັບໜ້າທີ່ໃໝ່; ໃນນີ້ໄດ້ຍົກຍ້າຍ ພົຈວ ບຸບຜາ ສີພົມມາ ຫົວໜ້າກອງບັນຊາການປ້ອງກັນທີ່ຕັ້ງ ກະຊວງ ປກສ ເປັນຫົວໜ້າກອງບັນຊາການ ປກສ ນະຄອນຫຼວງວຽງຈັນ ( ນວ) ຄົນໃໝ່ ແລະ ໄດ້ປະກາດແຕ່ງຕັ້ງໂຍກຍ້າຍ ພັອ ບົວພັນ ຍໍລະວົງສາ ອະດີດຫົວໜ້າກົມ 504 ເປັນຫົວໜ້າກອງບັນຊາການປ້ອງກັນທີ່ຕັ້ງ ກະຊວງ ປກສ ຄົນໃໝ່ ເພື່ອເປັນການປັບປຸງລະບົບກົງຈັກການຈັດຕັ້ງຂອງກຳລັງປ້ອງກັນຄວາມສະຫງົບ ໃຫ້ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ສາມາດຕອບສະໝອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່.

ໃນພິທີ, ພົຕ ສົມແກ້ວ ສີລາວົງ ໄດ້ເນັ້ນໃຫ້ຄະນະພັກ-ຄະນະບັນຊາທີ່ໄດ້ຮັບຕຳແໜ່ງໃໝ່ ຈົ່ງເພີ່ມທະວີຄວາມເປັນແບບຢ່າງນຳໜ້າໃນການປະຕິບັດໜ້າທີ່ວິຊາສະເພາະ, ເຂັ້ມງວດໃນການປະຕິບັດລະບຽບວິໄນທີ່ວາງອອກ ແນໃສ່ໃຫ້ບັນດາພະນັກງານ-ນັກຮົບຮຽນຮູ້ເອົາເປັນແບບຢ່າງເພື່ອສູ້ຊົນສ້າງຕົນເອງ ໃຫ້ກ້າວຂຶ້ນສູ່ພະນັກງານຂັ້ນນຳພາ-ບັນຊາ ທີ່ມີຄວາມຮູ້-ຄວາມສາມາດໃນຕໍ່ໜ້າ; ພ້ອມທັງຮຽກຮ້ອງໃຫ້ບັນດາສະຫາຍມີຄວາມຈົງຮັກພັກດີຕໍ່ພັກ, ເປັນເອກະພາບກັບແນວທາງ, ທັດສະນະຂອງພັກ, ຕັ້ງໜ້າປະຕິບັດທັດສະນະຂອງພັກກ່ຽວກັບການປັບປຸງກໍ່ສ້າງກຳລັງ ປກສ ໃຫ້ເຕີບໃຫຍ່ເຂັ້ມແຂງຂຶ້ນເລື້ອຍໆ.

LEAVE A REPLY

Please enter your comment!
Please enter your name here