ຈັບເຈົ້າຂອງຮ້ານເຂົ້າປຽກ ຂາຍຢາບ້າຫາເງິນໃຊ້ໜີ້

0
36777

ເຈົ້າຂອງຮ້ານເຂົ້າປຽກແຫ່ງໜຶ່ງ ຢູ່ເຂດບ້ານປາກທ້າງ ເມືອງສີໂຄດຕະບອງ ນະຄອນ ຫຼວງວຽງຈັນ ຖືກເຈົ້າໜ້າທີ່ຈັບຕົວໃນຂໍ້ຫາລັກລອບຄ້າຂາຍຢາເສບຕິດ ຍ້ອນຫາເງິນໃຊ້ໜີ້ຫວຍ ແລະ ເງິນມື້ ລວມມູນຄ່າໜີ້ 130 ລ້ານກີບ.

<….>

ເຈົ້າໜ້າທີ່ ປກສ ເມືອງສີໂຄດຕະບອງ ໃຫ້ຮູ້ວ່າ: ເຈົ້າຂອງຮ້ານເຂົ້າປຽກດັ່ງກ່າວ ຊື່ທ້າວ ນາສອນ ຫຼື ດ້າ ອາຍຸ 40 ປີ ຄ້າຂາຍ ຢູ່ບ້ານປາກທ້າງ ຖືກເຈົ້າໜ້າທີ່ຈັບຕົວໃນວັນທີ 21 ກັນຍາ 2018 ພ້ອມຢາບ້າ ຈໍານວນ 298 ເມັດ ມາດໍາເນີນຄະດີຕາມກົດໝາຍ, ຜ່ານການສືບສວນຢ່າງລະອຽດຂອງເຈົ້າໜ້າທີ່, ຜູ້ກ່ຽວສາລະພາບວ່າ ແຮງຈູງໃຈເຮັດ ລັກລອບຄ້າຂາຍຢາເສບຕິດ ເກີດຈາກການເຂົ້າຫວຍປະມານ 80 ລ້ານກີບ ແລະ ເອົາເງິນມື້ 50 ລ້ານກີບ ລວມມູນຄ່າ 130 ລ້ານກີບ ມາລົງທຶນເຮັດຮ້ານເຂົ້າປຽກ, ໃນເບື້ອງຕົ້ນຮ້ານຜູ້ກ່ຽວໄດ້ຮັບຄວາມນິຍົມຈາກລູກຄ້າມີລາຍໄດ້ດີຂຶ້ນ. ແຕ່ເວລາຕໍ່ມາ, ຜູ້ກ່ຽວບໍ່ສາມາດໃຊ້ຕົ້ນທຶນ ແລະ ດອກເບ້ຍເງິນຫວຍ ແລະ ເງິນທີ່ຢືມມາໄດ້ ຍ້ອນຕິດຫຼິ້ນກິນຟຸຍເຟືອຍເກີດມີໜີ້ສິນຕິດຕົວ, ຫຼັງຈາກຊີວິດປະເຊີນກັບໝີ້ສິນ ຈຶ່ງຊອກຫາທາງອອກຫັນຕົວລັກລອບຄ້າຂາຍຢາບ້າຮ່ວມມກັບຊາຍຄົນໜຶ່ງທີ່ເປັນລູກຄ້າມາກິນເຂົ້າປຽກໃນຮ້ານ ໂດຍໃຊ້ຮ້ານເຂົ້າປຽກເປັນບ່ອນຊື້-ຂາຍ.

ຂອງກາງ

ມື້ທໍາອິດ, ໄດ້ນໍາເອົາຢາບ້າມາຂາຍ ຈໍານວນ 200 ເມັດ ໃຊ້ເວລາຂາຍປະມານ 2-3 ມື້ກໍໝົດ. ຈາກນັ້ນ, ຈຶ່ງໄດ້ຕິດຕໍ່ຄ້າຂາຍກັບຊາຍຄົນດັ່ງກ່າວ ຈໍານວນຫຼາຍຄັ້ງຈົນບໍ່ສາມາດຈື່ໄດ້; ສໍາລັບເງິນທີ່ໄດ້ຈາກການຄ້າຂາຍຢາເສບຕິດນໍາເອົາໄປໃຊ້ຈ່າຍສ່ວນຕົວ ແລະ ໃຊ້ໜີ້ທີ່ຕິດຢູ່. ຄັ້ງຫຼ້ສຸດ, ໄດ້ຊື້ຢາບ້າຈໍານວນ 300 ເມັດ ແຕ່ຈ່າຍຄ່າຢາບ້າເຄິ່ງໜຶ່ງ. ຫຼັງຈາກນັ້ນ, ກໍນຳຢາບ້າຂາຍໃຫ້ໄວລຸ້ນຈໍານວນ 2 ເມັດ ຍັງເຫຼືອ 298 ເມັດ. ສຸດທ້າຍ, ຖືກເຈົ້າໜ້າທີ່ສືບຮູ້ ແລະ ເຂົ້າກັກຕົວມາດໍາເນີນຄະດີ. ສຳລັບຜູ້ທີ່ຮ່ວມຂະບວນການ ເຈົ້າໜ້າທີ່ຍັງສອບຂະຫຍາຍຜົນ ແລະ ຕິດຕາມຈັບມາດຳເນີນຄະດີ.