ຕັດສິນປະທານ ບໍລິສັດ ພີເອັສ ພ້ອມພັກພວກ ທັງໝົດ 12 ຄົນ ໃຫ້ໃຊ້ແທນໂຈດທາງແພງ 1.000 ຕື້ກວ່າກີບ

0
5689

ໃນວັນທີ 21 ພະຈິກ 2018, ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຕັດສິນປະທານບໍລິສັດ ພີເອັສ ພ້ອມພັກພວກທີ່ເປັນພະນັກງານພາຍໃນບໍລິສັດຈໍານວນ 12 ຄົນ. ໃນນີ້, ຕັດອິດສະລະພາບປະທານບໍລິສັດ ຊື່: ນາງ ສຸກນາລີ ຈໍາຄຸກ 29 ປີ ແລະ ທ້າວ ປໍເຮີ ຈໍາຄຸກ 27 ປີ ໃນສະຖານສໍ້ໂກງຊັບພົນລະເມືອງ, ການຟອກເງິນ, ການໂຄສະນາຕ້ານ ສປປ ລາວ, ການເຕົ້າໂຮມກຸ່ມຄົນເພື່ອສ້າງຄວາມປັ່ນປ່ວນ, ການຊື້-ຂາຍອາວຸດເສີກໂດຍບໍ່ຖືກຕ້ອງຕາມກົດໝາຍ ແລະ ການຄອບຄອງຊິ້ນສ່ວນອະໄວຍະວະຂອງສັດປ່າປະເພດຫວງຫ້າມ  ພ້ອມທັງໃຊ້ແທນຄ່າເສຍຫາຍໃຫ້ໂຈດທາງແພ່ງຈຳນວນ 1.000 ຕື້ກວ່າກີບ.

ບັນດາຈໍາເລີຍ 12 ຄົນ ທີ່ຄະນະສານອາຍາ ນໍາຂຶ້ນມາພິຈາລະນາໃນຄັ້ງນີ້, ນາງ ສຸກນາລີ ອາຍຸ 48 ປີ ຢູ່ ຈອມມະນີ ເປັນປະທານບໍລິສັດ ພີເອັສ, ຈຳເລີຍ 2 ຊື່ທ້າວ ປໍເຮີ ອາຍຸ 53 ປີ ຢູ່ບ້ານຄໍາສະຫວາດ ຖືກຂໍ້ຫາສໍ້ໂກງຊັບພົນລະເມືອງ, ການຟອກເງິນ, ການໂຄສະນາຕ້ານ ສປປ ລາວ, ການເຕົ້າໂຮມກຸ່ມຄົນເພື່ອສ້າງຄວາມປັ່ນປ່ວນ, ການຊື້-ຂາຍອາວຸດເສີກ ໂດຍບໍ່ຖືກຕ້ອງຕາມກົດໝາຍ ແລະ ການຄອບຄອງຊິ້ນສ່ວນອະໄວຍະວະຂອງສັດປ່າປະເພດຫວງຫ້າມ. ແຕ່ຈໍາເລີຍ 2 ຈະບໍ່ມີຂໍ້ຫາການຊື້-ຂາຍອາວຸດເສີກ ໂດຍບໍ່ຖືກຕ້ອງຕາມກົດໝາຍ;  ຈໍາເລີຍ 3 ທ້າວ ຈັນຄຳ ອາຍຸ 35 ປີ ຢູ່ບ້ານ ຈອມມະນີ ຖືກຂໍ້ຫາສໍ້ໂກງຊັບຂອງພົນລະເມືອງ, ການຟອກເງິນ ແລະ ການມີອາວຸດເສີກໄວໃນຄອບຄອງໂດຍບໍ່ຖືກຕ້ອງຕາມກົດໝາຍ; ຈໍາເລີຍ 4 ທ້າວ ອານົງສັກ ອາຍຸ 33 ປີ ຖືກຂໍ້ຫາສໍ້ໂກ້ງຊັບຂອງພົນລະເມືອງ ແລະ ການຟອກເງິນ; ຈຳເລີຍ 5 ທ້າວ ໄມວັນ ອາຍຸ 31 ປີ ຖືກຂໍ້ຫາສໍ້ໂກງຊັບພົນລະເມືອງ; ຈຳເລີຍ 6 ທ້າວ ຄໍາສິງ ອາຍຸ 30 ປີ ຖືກຂໍ້ຫາສໍ້ໂກງຊັບຂອງພົນລະເມືອງ ແລະ ການຊື້-ຂາຍອາວຸດເສີກ ໂດຍບໍ່ຖືກຕ້ອງຕາມກົດໝາຍ ຈຳເລີຍ 3,4,5,6 ຢູ່ບ້ານຈອມມະນີ; ຈໍາເລີຍ 7 ຊື່ທ້າວ ໄຊຊົງ ອາຍຸ 25 ປີ ຢູ່ບ້ານຮ່ອງສຸພາບ ທັງໝົດຂຶ້ນກັບເມືອງໄຊເສດຖາ ແລະ ຈໍາເລີຍ 8 ຊື່ທ້າວ ບຸນທຳ ອາຍຸ 43 ປີ ຢູ່ບ້ານນາຊາຍທອງໃຕ້ ເມືອງນາຊາຍທອງ; ຈໍາເລີຍ 9 ຊື່ທ້າວ ແກ້ວ ອາຍຸ 46 ປີ ຢູ່ບ້ານ ໜອງປິງ ເມືອງຈັນທະບູລີ; ຈຳເລີຍ 10 ຊື່ນາງ ຈັນສະໝອນ ອາຍຸ 45 ປີ ຈອມມະນີ ເມືອງໄຊເສດຖາ ນະຄອນຫຼວງວຽງຈັນ; ຈໍາເລີຍ 11 ທ້າວ ໄຊດວງສີ ອາຍຸ 38 ປີ ຢູ່ບ້ານທາດເມືອງ ເມືອງຊຳເໜືອ ແຂວງຫົວພັນ;  ຈໍາເລີຍ 7, 8, 9, 10, 11 ຖືກຂໍ້ຫາສໍ້ໂກ້ງຊັບພົນລະເມືອງ  ແລະ ການການເຕົ້າໂຮມກຸ່ມຄົນເພື່ອສ້າງຄວາມປັ່ນປ່ວນ ແລະ ຈຳເລີຍ 12 ຊື່ທ້າວ ໄຈເຮີ ອາຍຸ 44 ປີ ຢູ່ບ້ານນາປ່າໄຜ່ ເມືອງໝື່ນ ແຂວງວຽງຈັນ ຖືກຂໍ້ຫາສໍ້ໂກ້ງຊັບພົນລະເມືອງ, ການໂຄສະນາຕ້ານ ສປປ ລາວ ແລະ ການເຕົ້າໂຮມກຸ່ມຄົນເພື່ອສ້າງຄວາມປັ່ນປ່ວນ.

ຜ່ານການໄຕສ່ວນໃນຫ້ອງປະຊຸມສານ ເຫັນວ່າ ມີຂໍ້ມູນຫຼັກຖານທີ່ຮັດກຸມ ແລະ ໜັກແໜ້ນ ທີ່ສາມາດຢັ້ງຢືນການກະທຳຜິດຂອງພວກຈຳເລີຍ, ເຊິ່ງມັນສະແດງອອກໃນປີ 2012 ນາງ ສຸກນາລີ (ຈໍາເລີຍ) ໄດ້ຂໍອະນຸຍາດດໍາເນີນທຸລະກິດ ບໍລິສັດ ພີເອັສ ຈໍາກັດຜູ້ດ່ຽວ, ເຊິ່ງດໍາເນີນທຸລະກິດໂຮງງານນໍ້າດື່ມລາວ ແລະ ພຶດຜັກປອດສານພິດ ຕາມໃບທະບຽນວິຊາຫະກິດ ສະບັບເລກທີ 089/ຈທວ, ລົງວັນທີ 20 ເມສາ 2012 ໂດຍສໍາປະທານດິນເນື້ອທີ່ 41 ເຮັກຕ່າຂອງກະຊວງການເງິນ ເປັນບ່ອນປຸກສ້າງໂຮງງານ. ພາຍຫຼັງດໍາເນີນທຸລະກິດ ມາຮອດປີ 2014 ນາງ ສຸກນາລີ ໄດ້ຂໍອານຸຍາດຂະຫຍາຍດໍາເນີນທຸລະກິດເພີ່ມເຕີມ ຄື: ກ່ຽວກັບກະສິກໍາ, ປ່າໄມ້, ການປະມົງ, ອຸດສາຫະກໍາ ແລະ ການປຸ່ງແຕງ, ການຄ້າ ແລະ ຂາຍຍົກ-ຂາຍຍ່ອຍຄົບວົງຈອນ ດ້ວຍຮູບແບບບໍລິສັດ ຈໍາກັດຜູ້ດ່ຽວ ຕາມໃບທະບຽນວິສາຫະກິດ ສະບັບເລກທີ 0829/ຈທລ, ລົງວັນທີ 23 ກັນຍາ 2014 ໂດຍມີຈໍາເລີຍເປັນປະທານຜູ້ຊີ້ນໍາລວມ, ສ່ວນທ້າວ ປໍເຮີ ປະທານຮ່ວມ ເປັນຜູ້ຂຽນລະບົບ 6 ຄູນ 8 ຂອງບໍລິສັດ, ທ້າວ ຈັນຄໍາ ເປັນຜູ້ອໍານວຍການ, ທ້າວ ອານົງສັກ ເປັນຮອງຜູ້ອໍານວຍການ.

ຕໍ່ການການເຄື່ອນໄຫວດຳເນີນທຸລະກິດຂອງບໍລິສັດ ພີເອັສ ໃນໄລຍະຜ່ານມາ, ມີພາກສ່ວນທີ່ກ່ຽວຂ້ອງຫຼາຍພາກສ່ວນໄດ້ກ່າວເຕືອນມາແລ້ວ ຄື: ພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ໄດ້ເຮັດບົດບັນທຶກກ້າວເຕື່ອນແລ້ວ 2 ຄັ້ງ ໃຫ້ຢຸດເຊົາການລະດົມທຶນທີ່ບໍ່ຖືກຕ້ອງ ແລະ ແຈ້ງການຂອງທະນາຄານ 3 ສະບັບ ພ້ອມທັງໃຫ້ບໍລິສັດ ສົ່ງເງິນຄືນໃຫ້ປະຊາຊົນທັງໝົດ. ແຕ່ພວກຈໍາເລີຍຍັງບໍ່ຢຸດເຊົາການເຄື່ອນໄຫວ. ນອກນີ້, ຈໍາເລີຍ 1 ແລະ 2 ຍັງໄດ້ຊື້ຊິ້ນສ່ວນສັດປ່າປະເພດຫ່ວງຫ້າມມາຄອບຄອງ ແລະ ວັດຖຸບູຮານ ຈຳນວນໜຶ່ງມາຄອບຄອງ.

ເງິນທີ່ຈຳເລີຍ 1 ແລະ 2 ທີ່ໄດ້ມາຈາການລະດົມມາແຕ່ປີ 2013 ນັ້ນ ແມ່ນໄດ້ນໍາໄປຊື້ວັດຖຸເງິນຄໍາ, ສ້າງ ອາຄານ, ໂຮງງານ, ຫ້ອງການ, ເຮືອແພ ແລະ ໃຊ້ຈ່າຍເງິນເດືອນພະນັກງານ ຈ່າຍບໍລິຫານວຽກຕ່າງໆ ແລະ ຊື້ລົດສ່ວນຕົວ 3 ຄັນ ຄື: ຍີ່ຫໍ້ຈິບແລນໂລເວີ ໝາຍເລກທະບຽນ ລພ 5555 ກໍາແພງນະຄອນ ໃນລາຄາ 175.000 ໂດລາສະຫະລັດ, ລົດຈິບຍີ້ຫໍ້ແລນໂລເວີ ໝາຍເລກທະບຽນ ວພ 5555 ກໍາແພງນະຄອນ ໃນລາຄາ 250.000 ໂດລາສະຫະລັດ ແລະ ລົດບີເອັມດັບເບີນຢູ ໝາຍທະບຽນ ຮພ 5555 ກໍາແພງນະຄອນ ໃນລາຄາ 160.000 ໂດລາສະຫະລັດ ແລະ ຊື້ລົດລວມຂອງບໍລິສັດ 12 ຄັນ ແລະ ດິນ 37 ຕອນ, ເຊິ່ງຮູບການດັ່ງກ່າວ ເປັນການຟອກເງິນ, ເມື່ອຜູ້ເສຍຫາຍຮູ້ວ່າ: ບໍລິສັດບໍ່ສາມາດສົ່ງເງິນເປີເຊັນ ຫຼື ດອກເບ້ຍໃຫ້ກັບສະມາຊິກຕາມທີ່ຕົກລົງກັນໄວ້ ຈຶ່ງພາກັນມາຖອນຕົວອອກຈາກບໍລິສັດ. ແຕ່ບໍລິສັດບໍ່ມີເງິນສົ່ງຄືນໃຫ້ກັບສະມາຊິກ ແລະ ຍັງອ້າງຫຼາຍສິ່ງຫຼາຍຢ່າງເພື່ອຍືດເວລາອອກໄປໃຫ້ໄດ້ດົນທີ່ສຸດ. ມາວັນທີ 12 ກັນຍາ 2017F ຈຶ່ງຖືກເຈົ້າໜ້າທີ່ໜ່ວຍສະເພາະກິດກັກຕົວພວກຈຳເລີຍໄປດຳເນີນຄະດີ.

ຕໍ່ກັບຄະດີດັ່ງກ່າວນີ້, ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຈຶ່ງເຫັນຕາມກົດໝາຍວ່າດ້ວຍການດຳເນີນຄະດີອາຍາ ສະບັບປັບປຸງປີ 2012 ແລະ ມາດຕາ 156, ກົດໝາຍອາຍາມາດຕາ 120 ວັກ 2, ມາດຕາ 65,72 ວັກ 1, ມາດຕາ 76 ວັກ 1, ມາດຕາ 77 ວັກ 1, ມາດຕາ 34 ກົດໝາຍວ່າດ້ວຍການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ມາດຕາ 66 ຂໍ້ 2 ວັກ 2 ກົດໝາຍວ່າດ້ວຍສັດນໍ້າ ແລະ ສັດປ່າ ມາດຕາ 71 ຂໍ້ 4 ກົດໝາຍວ່າດ້ວຍຂໍ້ຜູກພັນໃນ ແລະ ນອກສັນຍາ ມາດຕາ 83. ດ້ວຍເຫດນີ້ ຈຶ່ງລົງໂທດຕັດອັດອິດສະຫຼະພາບ ນາງ ສຸກນາລີ ຈໍາຄຸກ 29 ປີ ໃຫ້ປະຕິບັດຕົວຈິງ 15 ປີ ປັບໃໝ 2.846.000.000 ກີບ, ຕັດອັດອິດສະຫຼະພາບ ທ້າວ ປໍເຮີ 27 ປີ ໃຫ້ປະຕິບັດຕົວຈິງ 15 ປີ ປັບໃໝ 2 ຕື້ 816.000.000 ກີບ, ຕັດອັດອິດສະຫຼະພາບ ທ້າວ ຈັນຄໍາ 3 ປີ 3 ເດືອນ ປັບໃໝ 6.000.000 ກີບ, ຕັດອັດອິດສະຫຼະພາບ ທ້າວ ອານົງສັກ 12 ປີ 3 ເດືອນ ປັບໃໝ 704.000.000 ກີບ, ຕັດອັດອິດສະຫຼະພາບທ້າວ ໄມວັນ 2 ປີ 6 ເດືອນ ປະຕິບັດໂທດຕົວຈິງ 1 ປີ ປັບໃໝ 5.000.000 ກີບ,  ຕັດອັດອິດສະຫຼະພາບ ຄໍາສິງ 3 ປີ 3 ເດືອນ ປັບໃໝ 7.000.000 ກີບ, ຕັດອັດອິດສະຫຼະພາບ ທ້າວ ໄຊຊົງ 4 ປີ 9 ເດືອນ ປັບໃໝ 26.000.000 ກີບ, ຕັດອັດອິດສະຫຼະພາບ ບຸນທຳ 5 ປີ ປັບໃໝ 27.000.000 ກີບ, ຕັດອັດອິດສະຫຼະພາບທ້າວ ແກ້ວ 6 ປີ ປະຕິບັດໂທດຕົວຈິງ 5 ປີ ປັບໃໝ 28 ປີ, ຕັດອັດອິດສະຫຼະພາບ ນາງ ຈັນສະໝອນ 5 ປີ ປັບໃໝ 27.000.000 ກີບ, ຕັດອັດອິດສະຫຼະພາບ ທ້າວ ໄຊດວງສີ 4 ປີ 6 ເດືອນ ປັບໃໝ 25.000.000 ກີບ ແລະ ຕັດອັດອິດສະຫຼະພາບ ທ້າວ ໄຈເຮີ 6 ປີ 6 ເດືອນ ປະຕິບັດໂທດຕົວຈິງ 5 ປີ ປັບໃໝ 30.000.000 ກີບ. ນອກນີ້, ຄະນະສານຍັງໃຫ້ນາງ ສຸກນາລີ ແລະ ທ້າວ ປໍເຮີ ໃຊ້ແທນຄ່າເສຍຫາຍໃຫ້ໂຈດທາງແພ່ງ ຈໍານວນ 237.772 ຄົນ ລວມມູນຄ່າ 1.000.412.000.000 ກີບ.