ກອງບັນຊາການປ້ອງກັນສູນກາງ ກະຊວງ ປກສ ໄດ້ຈັດພິທີປາຖະກະຖາມູນເຊື້ອ ວັນສະຖາປະນາ ສປປ ລາວ ຄົບຮອບ 43 ປີ ( 2 ທັນວາ 1975-2 ທັນວາ 2018 ), ວັນເກີດ ປະທານ ໄກສອນ ພົມວິຫານ ຄົບຮອບ 98 ປີ ( 13 ທັນວາ 1920-13 ທັນວາ 2018 ) ໃນວັນທີ 6 ທັນວາ 2018, ປາຖະກະຖາໂດຍ ພັອ ຄໍາເກຶ່ອງ ຜິວວັນນາ ຮອງຫົວໜ້າກອງບັນຊາການປ້ອງກັນສູນກາງ, ມີຄະນະພັກ-ຄະນະຫ້ອງ, ກອງຮ້ອຍ ແລະ ພະນັກງານຫຼັກແຫຼ່ງພາຍໃນ ກອງບັນຊາການ ເຂົ້າຮ່ວມ.
ພັອ ຄໍາເກື່ອງ ຜິວວັນນາ ປາຖະກະຖາ:
ຊາດລາວແມ່ນຊາດໜຶ່ງທີ່ມີປະຫວັດສາດຫຼາຍຮ້ອຍຫຼາຍພັນປີ, ມີມູນເຊື້ອທີ່ສະຫງ່າອົງອາດແຫ່ງການຕໍ່ສູ້ຕ້ານການຮຸກຮານຂອງພວກສັດຕູຈາກພາຍນອກ, ການຄອບຄອງຂອງຈັກກະພັດລ່າເມືອງຂຶ້ນ ທັງແບບເກົ່າ ແລະ ໃໝ່, ຮູ້ເຖິງຄວາມສາມັກຄີຕໍ່ສູ້ຢ່າງພິລະອາດຫານຕ້ານການຮຸກຮານອັນຍືດເຍື້ອຍາວນານ, ມີນໍ້າໃຈຮັກເຊື້ອແພງຊາດຮັກບ້ານເກີດເມືອງນອນຍອມເສຍສະຫຼະຊີວິດ ແລະ ເລືອດເນື້ອ ເພື່ອຊາດ ແລະ ສາມາດປົດປ່ອຍປະເທດຊາດຢ່າງມີໄຊ, ສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.
ພັອ ຄໍາເກື່ອງ ຜິວວັນນາ
ມູນເຊື້ອການເຄື່ອນໄຫວຂອງ ປະທານ ໄກສອນ ພົມວິຫານ ເຊິ່ງທ່ານແມ່ນຜູ້ທີ່ຮັກຊາດ, ເປັນນັກປະຕິວັດທີ່ຍິ່ງໃຫຍ່ຂອງຊາດ, ວິລະບູລຸດ, ຜູ້ນໍາຂອງພັກ-ລັດທີ່ປີຊາສາມາດ, ສະຫຼາດສ່ອງໃສ ແລະ ສະດຸ້ງໄວ, ທັງເປັນນັກທິດສະດີ, ເປັນນັກປຸກລະດົມຂົນຂວາຍ ແລະ ເປັນນັກໂຄສະນາ-ປາຖະກະຖາອັນດີເລີດ, ເປັນສັນຍາລັກ ແລະ ເປັນແກນສານຂອງຄວາມສາມັກຄີພາຍໃນພັກ ແລະ ໃນຊາດ, ຍາມໃດເພີ່ນກໍເອົາໃຈໃສ່ສ້າງ, ເພີ່ມທະວີຄວາມສາມັກຄີປອງດອງລະຫວ່າງເຜົ່າ, ຄວາມເປັນປຶກແຜ່ນພາຍໃນຊາດ ແລະ ຄວາມເປັນເອກະພາບພາຍໃນພັກ, ເປັນຜູ້ນໍາທີ່ມີຄຸນສົມບັດສິນທໍາປະຕິວັດສູງສົ່ງ, ມີທັດສະນະມະຫາຊົນກວ້າງຂວາງ, ດຸໝັ່ນ, ດໍາລົງຊີວິດແບບລຽບງ່າຍ, ປະຢັດ, ບໍລິສຸດປອດໃສ, ເປັນນັກເຄື່ອນໄຫວສາກົນຜູ້ດີເດັ່ນ, ເປັນຜູ້ວາງແນວທາງ ແລະ ເປັນແບບຢ່າງປະຕິບັດແນວທາງຕ່າງປະເທດຢ່າງຖືກຕ້ອງ ເຮັດໃຫ້ ສປປ ລາວ ມີບົດບາດໃນເວທີສາກົນນັບມື້ສູງຂຶ້ນ.
ຂ່າວຍັງໃຫ້ຮູ້ຕື່ມອີກວ່າ: ໃນວັນດຽວກັນ, ກອງບັນຊາການ ປກສ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ຕັ້ງປາຖະກະຖາ ວັນສະຖາປະນາ ສປປ ລາວ ຄົບຮອບ 43 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 98 ປີ ແລະ ວັນສ້າງຕັ້ງເມືອງວຽງໄຊ-ຖານທີ່ໝ້ັ້ນຂອງການປະຕິວັດລາວ ຄົບຮອບ 50, ປາຖະກະຖາໂດຍ ທ່ານ ຂັນທອງ ແກ້ວດວງສີ ຄະນະປະຈໍາພັກເມືອງ ຫົວໜ້າຫ້ອງການກວດກາພັກ ເມືອງຫາດຊາຍຟອງ; ເຂົ້າຮ່ວມຮັບຟັງມີ ພັທ ສັງວານ ຂາວປະເສີດ ຫົວໜ້າກອງບັນຊາການ ປກສ ເມືອງຫາດຊາຍຟອງ ແລະ ພະນັກງານ-ນັກຮົບອ້ອມຂ້າງ ເຂົ້າຮ່ວມ.