ພິທີໂຮມຊຸມນຸມ ສະເຫຼີມສະຫຼອງ ວັນສ້າງຕັ້ງກອງບັນຊາການປ້ອງກັນທີ່ຕັ້ງ ກະຊວງ ປກສ ຄົບຮອບ 25 ປີ ( 10 ມັງກອນ 1994-10 ມັງກອນ 2019 ) ໃນວັນທີ 10 ມັງກອນ ຜ່ານມາ ໃຫ້ກຽດເຂົ້າຮ່ວມໂດຍ ພົຕ ສິນທະວົງ ໄຊຍະກອນ ຮອງລັດຖະມົນຕີ ກະຊວງ ປກສ, ມີບັນດາອະດີດການນໍາ, ຄະນະພັກກະຊວງ, ຕາງໜ້າກົມກອງອ້ອມຂ້າງກະຊວງ, ກອງບັນຊາການ ເຂົ້າຮ່ວມ.
ພັອ ບົວພັນ ຍໍລະວົງສາ ຫົວໜ້າກອງບັນຊາການປ້ອງກັນທີ່ຕັ້ງ ໄດ້ກ່າວປາໄສກ່ຽວກັບວັນສ້າງຕັ້ງກອງບັນຊາການປ້ອງກັນທີ່ຕັ້ງວ່າ:
ກອງບັນຊາການປ້ອງກັນທີ່ຕັ້ງ ແມ່ນກໍາລັງປະກອບອາວຸດໜຶ່ງ ໃນໂຄງປະກອບກົງຈັກການຈັດຕັ້ງ ກະຊວງປ້ອງກັນຄວາມສະຫງົບ ເຊິ່ງກອງບັນຊາການປ້ອງກັນທີ່ຕັ້ງ ໃນເມື່ອກ່ອນແມ່ນຊື່ ກອງພັນ 15 ກອງທັບປົດປ່ອຍປະຊາຊົນລາວ ໂດຍແມ່ນ ທ່ານ ສຸບັນ ແກ້ວພິລາ ເປັນຫົວໜ້າ, ຕໍ່ມາໃນປີ 1973 ຂັ້ນເທິງໄດ້ຕົກລົງປ່ຽນຊື່ຈາກ ກອງພັນ 15 ປົດປ່ອຍປະຊາຊົນລາວ ມາເປັນ ກອງພັນຕໍາຫຼວດ 206 ໃນນະຄອນຫຼວງວຽງຈັນ ມີໜ້າທີ່ປ້ອງກັນສໍານັກງານອົງການ,
ຜູ້ຕາງໜ້າແນວລາວສ້າງຊາດ ແລະ ປ້ອງກັນເຮືອນພັກຂອງບັນດາຜູ້ນໍາປະຕິວັດ, ເພື່ອຕອບສະໜອງກັບຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່ ກ່ຽວກັບ ການປັບປຸງກົງຈັກການຈັດຕັ້ງຂອງກະຊວງພາຍໃນ ນາຍົກລັດຖະມົນຕີ ໄດ້ອອກດໍາລັດ ເລກທີ 03/ນຍ ລົງວັນທີ 10 ມັງກອນ 1994 ວ່າດ້ວຍ ການແຕ່ງຕັ້ງຫົວໜ້າ, ຮອງຫົວໜ້າຫ້ອງການ, ບັນດາກົມໃຫຍ່ຂຶ້ນກັບກະຊວງພາຍໃນ ແລະ ໃນມາດຕາ 2 ຂອງດໍາລັດດັ່ງກ່າວ ໄດ້ສ້າງຕັ້ງ ກອງບັນຊາການຕໍາຫຼວດປະກອບອາວຸດ ຂຶ້ນຢ່າງເປັນທາງການ, ມາເຖິງວັນທີ 21 ພຶດສາພາ 2002 ກອງບັນຊາການຕໍາຫຼວດປະກອບອາວຸດ ໄດ້ປ່ຽນຊື່ມາເປັນ ກອງບັນຊາການປ້ອງກັນທີ່ຕັ້ງ.
ຕະຫຼອດໄລຍະ 25 ປີຜ່ານມາ, ກອງບັນຊາການປ້ອງກັນທີ່ຕັ້ງ ໄດ້ສຸມໃສ່ຈັດຕັ້ງປະຕິບັດໜ້າທີ່ວຽກງານວິຊາສະເພາະ ປ້ອງກັນຈຸດທີ່ຕັ້ງສໍາຄັນ ເຊິ່ງປັດຈຸບັນໄດ້ຫັນກໍາລັງເຂົ້າປ້ອງກັນຈຸດສໍາຄັນຕ່າງໆ ມີ 113 ຈຸດ. ນອກຈາກການປ້ອງກັນຈຸດຍຸດທະສາດສໍາຄັນຕ່າງໆຂອງພັກ-ລັດແລ້ວ, ຍັງໄດ້ປະກອບສ່ວນຢ່າງຕັ້ງໜ້າເອົາກໍາລັງເຂົ້າປ້ອງກັນແຂກພາຍໃນ ແລະ ຕ່າງປະເທດ, ກອງປະຊຸມລະດັບຊາດ-ລະດັບສາກົນ, ວັນບຸນສໍາຄັນຕ່າງໆຂອງພັກ-ຂອງຊາດ ເຊິ່ງເປັນການປະກອບສ່ວນຢ່າງຕັ້ງໜ້າ ໃນການປົກປັກຮັກສາອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ໄວ້ຢ່າງໝັ້ນຄົງ.
ດັ່ງນັ້ນ, ເພື່ອຕອບສະໜອງກັບນໍ້າໃຈເສຍສະຫຼະພິລະອາດຫານ, ທົນທານໜຽວແໜ້ນຂອງກໍາລັງປ້ອງກັນທີ່ຕັ້ງທີ່ໄດ້ອຸທິເລືອດເນື້ອເຫື່ອແຮງ, ສະຕິປັນຍາເຂົ້າໃນການປົກປັກຮັກສາ ແລະ ພັດທະນາປະເທດຊາດ ຕະຫຼອດໄລຍະ 25 ປີ ຜ່ານມາ ພັກ-ລັດຖະບານ ຍັງໄດ້ຍ້ອງຍໍ ກອງບັນຊາການປ້ອງກັນທີ່ຕັ້ງ ຄື: ໄດ້ຮັບຫຼຽນໄຊອິດສະຫຼະຊັ້ນ II 2 ໜ່ວຍ, ຫຼຽນໄຊອິດສະຫຼະ ຊັ້ນ III 4 ໜ່ວຍ, ຫຼຽນໄຊພິລະອາດຫານ ຊັ້ນ II 1 ໜ່ວຍ, ຊັ້ນ III 3 ໜ່ວຍ, ໄດ້ຮັບຫຼຽນໄຊປະຕິວັດຊະນະເລີດ 1 ໜ່ວຍ, ຫຼຽນໄຊແຮງງານ ຊັ້ນ I 1 ໜ່ວຍ, ຊັ້ນ II 3 ໜ່ວຍ, ຊັ້ນ III 5 ໜ່ວຍ, ຫຼຽນກາແຮງງານ 4 ໜ່ວຍ, ທຸງພິລະອາດຫານ 1 ຜືນ ແລະ ທຸງອາດຫານສູ້ຮົບກັບຍົນອາເມລິກາ 1 ຜືນ.