ພິທີເປີດໂຮງພິມ ໂຊກພາໄຊ ຈຳກັດ ຢ່າງເປັນທາງການ ໄດ້ຈັດຂຶ້ນໃນວັນທີ 11 ມັງກອນ 2019, ເປັນກຽດເຂົ້າຮ່ວມໂດຍ ພົທ ວິໄລ ຫຼ້າຄຳຟອງ ລັດຖະມົນຕີກະຊວງ ປກສ ມີບັນດາການນຳພັກ-ລັດ, ຄະນະພັກ-ຄະນະກົມກອງອ້ອມຂ້າງ ກະຊວງ ປກສ, ແຂກຮັບເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ນາງ ສຸນັດຕາ ລິດປັນຍາ ປະທານບໍລິສັດ ລິດປັນຍາ ອອກແບບ-ກໍ່ສ້າງ ຈຳກັດ ທັງເປັນອຳນວຍການໂຮງພິມ ໂຊກພາໄຊ ຈຳກັດ ກ່າວວ່າ:
ການເປີດນຳໃຊ້ ໂຮງພິມ ໂຊກພາໄຊ ສືບເນື່ອງມາຈາກການປັບປຸງ ໂຮງພິມ ປກສ ໃຫ້ທັນສະໄໝ ໂດຍປັບປຸງອາຄານ ແລະ ເພີ່ມເຄື່ອງຈັກໃຫ້ທັນສະໄໝຂຶ້ນກວ່າເກົ່າ ເພື່ອຮັບໃຊ້ດ້ານການພິມໃນທົ່ວກົມກອງອ້ອມຂ້າງ ກະຊວງ ປກສ, ແຂວງ ໃນຂອບເຂດທົ່ວປະເທດ ແລະ ສັງຄົມທົ່ວໄປ ພ້ອມທັງສ້າງຜົນກຳໄລທາງດ້ານທຸລະກິດ ແລະ ເປັນການຊຸກຍູ້ຊອກແຫຼ່ງລາຍຮັບໃຫ້ແກ່ ກະຊວງ ປກສ ໃນທ່າກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃຫ້ດີຂຶ້ນເທື່ອລະກ້າວ;
ໂຄງການປັບປຸງ ໂຮງພິມ ປກສ ໃຫ້ທັນສະໄໝ ມາເປັນ ໂຮງພິມ ໂຊກພາໄຊ ຈຳກັດ ແມ່ນໄດ້ປະສານສົມທົບກັບ ກົມໃຫຍ່ພະລາທິການ, ກົມໃຫຍ່ການເມືອງ ປກສ ໂດຍມີມູນຄ່າລົງທຶນທັງໝົດ 75.159.765.000 ກີບ; ໃນນີ້, ທຶນບໍລິລັດ 58.788.734.850 ກີບ ຖືຮຸ້ນ 70% ແລະ ທຶນຈາກ ກະຊວງ ປກສ ມີຈຳນວນ 16.371.030.150 ກີບ ຖືຮຸ້ນ 30%.
ປັດຈຸບັນ, ການປັບປຸງກໍ່ສ້າງ ປະກອບມີອາຄານ 3 ຫຼັງ ໂດຍຕິດຕັ້ງເຄື່ອງຈັກໃໝ່ 13 ລາຍການ ຄື: ເຄື່ອງຈັກພິມອັອບເຊັດ 4 ສີ, ເຄື່ອງຈັກເຂົ້າກາວ, ເຄື່ອງເກັບຊ້ອນ, ເຄື່ອງພິມດີຈີຕອນ, ເຄື່ອງໄດຄັດ, ເຄື່ອງໜີບຫົວປະຕິທິນ, ເຄື່ອງເເປະກາວ, ເຄື່ອງເຮັດກາບປົກແຂງ, ເຄື່ອງລິດສະຕິກເກີ, ເຄື່ອງລີດເຈ້ຍ, ເຄື່ອງເຂົ້າປ່ວງເຫຼັກດູກງູ, ເຄື່ອງພັກ ແລະ ເຄື່ອງແພັກ.
ພາຍຫຼັງສຳເລັດການປັບປຸງກໍ່ສ້າງອາຄານ ແລະ ຕິດຕັ້ງເຄື່ອງຈັກ, ໂຮງພິມ ໂຊກພາໄຊ ໄດ້ຜະລິດສິ່ງພິມທົ່ວໄປ ເຊັ່ນ: ຜະລິດປຶ້ມອ່ານ-ປຶ້ມຂຽນທຸກຊະນິດ, ປະຕິທິນ, ໃບບິນ, ໃບຍ້ອງຍໍ, ຖົງ, ແບບຟອມ ແລະ ແຟ້ມໃສ່ເອກະສານຕ່າງໆ ແລະ ຜະລິດສິ່ງພິມຄວາມປອດໄພ ຄື: ປຶ້ມແຊັກທະນາຄານ, ໃບຕາດິນ ແລະ ໃບປະກາສະນີຍະບັດ ແລະ ຜະລິດສື່ສິ່ງພິມ ແລະ ປ້າຍໂຄສະນາອີກດ້ວຍ ເພື່ອຍົກສູງຄຸນນະພາບທາງດ້ານການພິມຈຳໜ່ວຍ ໃຫ້ມີປະສິດທິພາບ ແລະ ໄດ້ຮັບໝາກຜົນສູງສຸດ.
ສຳລັບຕໍ່ໜ້ານີ້, ໂຮງພິມ ໂຊກພາໄຊ ຈຳກັດ ຈະສືບຕໍ່ຍົກລະດັບຄຸນນະພາບດ້ານການຜະລິດສື່ສິ່ງພິມ ໃຫ້ມີຄວາມປອດໄພລະດັບຊາດ ແລະ ສາກົນ ໂດຍແມ່ນສິ່ງພິມຄວາມປອດໄພ ແລະ ປຶ້ມອີເລັກໂຕຼນິກ ເຊັ່ນ: ອີ-ບໍເດີພາດ, ອີ-ພັດສະປອດ ແລະ ປຶ້ມຟາກເງິນທະນາຄານ, ບັດ ATM, ບັດວີຊາ ແລະ ບັດພະນັກງານຮັບປະກັນ ໃຫ້ມີຄຸນນະພາບດີ ແລະ ຖືກຕ້ອງຕາມຫຼັກການ.
