ກອງບັນຊາການ ປກສ ແຂວງ ບໍລິຄໍາໄຊ ໄດ້ປະກາດສັບຊ້ອນນັກຮຽນທີ່ຈົບມາຈາກໂຮງຮຽນ ປກສ ຊັ້ນຕົ້ນ ໃນຂອບເຂດທົ່ວປະເທດ ປະຈໍາປີ 2019 ແລະ ສັບຊ້ອນນາຍຕໍາຫຼວດທີ່ມາຈາກກົມກອງອື່ນ ໃນວັນທີ 25 ມີນາ 2019 ນີ້ ໂດຍການເປັນປະທານຂອງ ພັທ ອານົງ ພະບາດໄຊ ຫົວໜ້າຫ້ອງການເມືອງ ປກສ ແຂວງບໍລິຄໍາໄຊ, ມີຄະນະຫ້ອງ, ກອງ, ເມືອງ, ຄ້າຍຄຸມຂັງ-ດັດສ້າງ, ພະແນກທີ່ກ່ຽວຂ້ອງຕະຫຼອດຮອດນັກຮຽນ, ນາຍ ແລະ ພົນຕໍາຫຼວດ ທີ່ຖືກສັບຊ້ອນເຂົ້າຮ່ວມ.
ພັຕ ບຸນລັບ ລາດຊະວົງສຸກ ຮອງຫົວໜ້າຫ້ອງການເມືອງ ປກສ ແຂວງ ໄດ້ຂຶ້ນຜ່ານຂໍ້ຕົກລົງຂອງກອງບັນຊາການ ປກສ ແຂວງ ວ່າດ້ວຍການສັບ ຊ້ອນພົນຕໍາຫຼວດທີ່ສໍາເລັດການສຶກສາລະດັບຊັ້ນຕົ້ນໃນຂອບເຂດທົ່ວປະເທດ ປະຈໍາປີ 2019 ຈໍານວນ 45 ສະຫາຍ ຍິງ 15 ສະຫາຍ, ສໍາເລັດການສຶກສາຈາກ ວປຕ 1 ສະຫາຍ ແລະ ຂໍ້ຕົກລົງວ່າ ດ້ວຍການສັບຊ້ອນບ່ອນປະຈໍາການ 1 ສະຫາຍ, ໃນນີ້ຖືກສັບຊ້ອນໄປປະຈໍາການຢູ່ຫ້ອງການກອງບັນຊາການ ປກສ ແຂວງ ຈໍານວນ 14 ສະຫາຍ ຍິງ 7 ສະຫາຍ, ຫ້ອງການເມືອງ 3 ສະຫາຍ ຍິງ 2 ສະຫາຍ, ຫ້ອງສັນຕິບານ 4 ສະຫາຍ ຍິງ 2 ສະຫາຍ, ຫ້ອງພະລາທິການ ຍິງ 1 ສະຫາຍ, ຫ້ອງ 509 ຈໍານວນ 1 ສະຫາຍ, ກອງພັນປ້ອງກັນເຄື່ອນທີ່ 12 ສະຫາຍ ຍິງ 2 ສະຫາຍ, ຄ້າຍຄຸມຂັງ-ດັດສ້າງ 5 ສະຫາຍ ແລະ ສັບຊ້ອນໄປປະຈໍາຢູ່ ປກສ ເມືອງ ມີ 5 ສະຫາຍ ຍິງ 1 ສະຫາຍ.
ທ່ານຫົວໜ້າກອງບັນຊາການ ໄດ້ຊີ້ນໍາໃຫ້ນັກຮຽນຈົ່ງນໍາເອົາຄວາມຮູ້ຄວາມສາມາດທີ່ຮຽນມາໝູນໃຊ້ໃນການປະຕິບັດວຽກງານພາຍໃນກົມກອງທີ່ຕົນສັງກັດຢູ່ໃຫ້ມີຄວາມເຂັ້ມແຂງ, ຝຶກຝົນຫຼໍ່ຫຼອມຕົນເອງໃນທຸກດ້ານໃຫ້ສົມກັບເປັນພະນັກງານສືບທອດໃນກໍາລັງປ້ອງກັນຄວາມສະຫງົບ.