ເນື່ອງໃນໂອກາດ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 58 ປີ (5 ເມສາ 1961 – 5 ເມສາ 2019) ແລະ ວັນສ້າງຕັ້ງກຳລັງປ້ອງກັນຄວາມສະຫງົບ ແຂວງອັດຕະປື ຄົບຮອບ 55 ປີ (9 ເມສາ 1964 – 9 ເມສາ 2019). ດັ່ງນັ້ນ, ມາໃນຕອນເຊົ້າຂອງວັນທີ 8 ເມສາ 2019 ທີ່ຜ່ານມາ ກອງບັນຊາການ ປກສ ແຂວງອັດຕະປື ຈຶ່ງໄດ້ເຂົ້າວາງພວງມາລາ ແລະ ກະຕ່າດອກໄມ້ ຢູ່ທີ່ອະນຸສອນສະຖານນັກຮົບນິລະນາມ ແລະ ຢູ່ຕໍ່ໜ້າຮູບປັ້ນ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ.
ໃຫ້ກຽດເຂົ້າຮ່ວມໂດຍ ທ່ານ ພອນສະໄໝ ມຽງລາວັນ ຮອງເລຂາພັກແຂວງ ຮອງເຈົ້າແຂວງອັດຕະປື, ມີຄະນະພັກ – ຄະນະກອງບັນຊາການ ປກສ ແຂວງ, ຄະນະຫ້ອງ, ຄະນະກອງພັນ, ຄະນະຄ້າຍຄຸມຂັງ – ດັດສ້າງ, ພະນັກງານຫຼັກແຫຼ່ງຂອງ ກອງບັນຊາການ ປກສ ແຂວງອັດຕະປື ເຂົ້າຮ່ວມຢ່າງພ້ອມພຽງ.
ການວາງພວງມາລາ ແລະ ກະຕ່າດອກໄມ້ ໃນຄັ້ງນີ້ ກໍເພື່ອລະນຶກເຖິງຄຸນງາມຄວາມດີ ແລະ ຄວາມໄວ້ອາໄລຮັກ ເຖິງດວງວິນຍານຂອງບັນດາສະຫາຍນັກຮົບປະຕິວັດ ແລະ ດວງວິນຍານຂອງ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ອຸທິດເຮື່ອແຮງ, ສະຕິປັນຍາ ນຳພາປະຊາຊົນລາວບັນດາເຜົ່າຕໍ່ສູ້ປົດປ່ອຍຊາດ ຈົນຍາດໄດ້ໄຊຊະນະ ແລະ ສາມາດສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.