ກອງປະຊຸມໃຫ່ຍ ຄັ້ງທີ 6 ຂອງ ຄະນະພັກຮາກຖານ ກອງພັນ 411 ແຂວງໄຊຍະບູລີ ໄດ້ຈັດຂຶ້ນໃນທ້າຍອາທິດຜ່ານມາ, ໂດຍການເປັນປະທານຂອງສະຫາຍ ພັທ ພິໄລວັນ ພິລາຈັນ ເລຂາຄະນະພັກຮາກຖານ ຫົວໜ້າການເມືອງ ກອງພັນ 411, ມີສະຫາຍ ພົຈວ ຄຳໝັ້ນ ວັນນະວົງ ຄະນະປະຈຳພັກແຂວງ ເລຂາຄະນະພັກ ຫົວໜ້າກອງບັນຊາການທະຫານແຂວງ ຕະຫຼອດຮອດສະມາຊິກພັກພາຍໃນ ກອງພັນ 411 ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ພ້ອມກັນຄົ້ນຄວ້າ ແລະ ເປັນເອກະພາບກັນ ຮັບຮອງເອົາຮ່າງລາຍງານການເມືອງທັງ 2 ພາກ ແລະ ບົດສໍາຫຼວດການນໍາພາລວມ ຂອງຄະນະພັກຊຸດເກົ່າ; ໃນນັ້ນ, ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ໃນການຊີ້ນຳ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ໃນໄລຍະ 5 ປີຜ່ານມາ, ເຊິ່ງຂອບເຂດການນໍາພາ ມີ 5 ໜ່ວຍພັກຂຶ້ນກັບ, ມີສະມາຊິກພັກທັງໝົດ 95 ສະຫາຍ ຍິງ 3 ສະຫາຍ, ສຳຮອງ 1 ສະຫາຍ. ຜ່ານການສໍາຫຼວດກວດກາຕີລາຄາແບ່ງປະເພດ ມີສະມາຊິກພັກແຂງ 95 ສະຫາຍ, ໜ່ວຍພັກທີ່ຂຶ້ນກັບທັງ 5 ໜ່ວຍ ໄດ້ປະເພດ ແຂງ, ຄະນະພັກຮາກຖານ ໄດ້ປະເພດ ເຂັ້ມແຂງ-ຮູ້ນຳພາຮອບດ້ານ.
ກອງປະຊຸມ ຍັງໄດ້ພ້ອມກັນປ່ອນບັດເລືອກຕັ້ງເອົາຄະນະພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທີ່ຖືກຕ້ອງ ແລະ ສອດຄ່ອງກັບມາດຖານ ໂດຍມີຜູ້ສະໝັກ 7 ສະຫາຍ, ເລືອກເອົາ 5 ສະຫາຍ ຄື: ໄດ້ເປັນເອກະສັນກັນເລືອກຕັ້ງເອົາສະຫາຍ ພັທ ວິໄລວັນ ພິລາຈັນ ເປັນເລຂາຄະນະພັກຮາກຖານ, ສະຫາຍ ພັຕ ວົງທອງ ວົງວິໄລ ເປັນຮອງເລຂາຄະນະພັກຮາກຖານ, ສະຫາຍ ພັຕ ຈັນສວຍ ວົງພະອິນແປງ, ສະຫາຍ ພັຕ ຄຳໄພ້ ແສນອຳໄພ ແລະ ສະຫາຍ ພັຕ ເຕີນ ທະນູມາ ເປັນຄະນະພັກຮາກຖານ.
