ໃນຕອນເຊົ້າຂອງວັນທີ 29 ເມສາ 2019, ກອງບັນຊາການ ປກສ ແຂວງໄຊສົມບູນ ໄດ້ຈັດພິທີປາຖະກະຖາ ວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ ຄົບຮອບ 64 ປີ ເພື່ອເຮັດໃຫ້ຊາວໜຸ່ມຄົນຍຸກໃໝ່ ໄດ້ຮັບຮູ້ ແລະ ນຳໄປເປັນແບບຢ່າງ ໃນການຈັດຕັ້ງປະຕິບັດວຽກງານ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍການປາຖະກະຖາຂອງ ພັອ ບົວພັນ ອິນທະປັນຍາ ຮອງຫົວໜ້າກອງບັນຊາການ ປກສ ແຂວງໄຊສົມບູນ ພ້ອມທັງມີບັນດາອົງການຈັດຕັ້ງຊາວໜຸ່ມ-ແມ່ຍິງ ປກສ ແຂວງ ເຂົ້າຮ່ວມ.
ພັອ ບົວພັນ ອິນທະປັນຍາ ໄດ້ຍົກໃຫ້ເຫັນເຖິງປະຫວັດການກຳເນີດ ແລະ ການເຕີບໃຫຍ່ຂອງຫຍາຍຕົວຂອງ ກຳລັງຊາວໜຸ່ມປະຊາຊົນ ປະຕິວັດລາວ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ການຕໍ່ສູ້ກູ້ຊາດຕ້ານກັບສັດຕູຜູ້ມາຮຸກຮານໃນປາງສົງຄາມ ເຊິ່ງຍາມໃດຊາວໜຸ່ມກໍເປັນກຳລັງແຮງໃນການຕໍ່ສູ້ເພື່ອຍາດເອົາໄຊຊະນະມາສູ່ປວງຊົນລາວ ຈົນໄດ້ຮັບນາມມະຍົດວ່: “ຊາວໜຸ່ມປຽບເໝືອນ ແຂນຂວາຂອງພັກ” ເຊິ່ງເປັນກຳລັງແຮງຄຽງບ່າຄຽງໄຫຼ່ກັບປວງຊົນລາວທັງຊາດຕໍ່ສູ້ໃນແຕ່ລະບັ້ນຮົບ ພາຍໃຕ້ການນຳພາອັນສະຫຼາດສ່ອງໃສຂອງພັກ ຈົນສາມາດຍາດໄດ້ໄຊຊະນະ ແລະ ສະຖາປະນາເປັນ ສປປ ລາວ ໃນວັນທີ 2 ທັນວາ 1975.
ພັອ ບົວພັນ ອິນທະປັນຍາ ໄດ້ເນັ້ນໜັກໃຫ້ຊາວໜຸ່ມຮຸ່ນປັດຈຸບັນ ຈົ່ງອອກແຮງປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຊາວໜຸ່ມຮຸ່ນກ່ອນ, ເອົາໃຈໃສ່ສຶກສາອົບຮົມການເມືອງ-ແນວຄິດ, ປູກຈິດສໍານຶກໃຫ້ຊາວໜຸ່ມ ໃຫ້ມີນໍ້າໃຈຮັກຊາດຮັກບ້ານເກີດເມືອງນອນ, ມີມານະຈິດອົດທົນ, ມີຄຸນສົມບັດສິນທຳປະຕິວັດ ແລະ ຮັກການຄົ້ນຄວ້າ-ສຶກສາຮຽນຮູ້, ເອົາໃຈໃສ່ປຸກລະດົມເຕົ້າໂຮມຄວາມສາມັກຄີຊາວໜຸ່ມລາວບັນດາເຜົ່າ ໃຫ້ເປັນປຶກແຜ່ນແໜ້ນໜາ, ເສີມຂະຫຍາຍມູນເຊື້ອຄວາມສາມັກຄີໃຫ້ກວ້າງຂວາງ-ໜັກແໜ້ນ, ເສີມຂະຫຍາຍມູນເຊື້ອນ້ຳໃຈອັນພິລະອາດຫານ, ມີຄວາມເສຍສະລະ, ດຸໝັ່ນຂະຫຍັນພຽນ, ຮັກການອອກແຮງງານ, ມີແບບແຜນການດຳລົງຊີວິດທີ່ຖືກຕ້ອງ, ປະຢັດມັດທະຍັດ, ສັດຊື່ບໍລິສຸດ ແລະ ຮັກສາຮີດຄອງປະເພນີອັນດີງາມ ໄວ້ໃຫ້ຄຽງຄູ່ກັບຊາດລາວຕະຫຼອດໄປ.