ເມື່ອບໍ່ດົນມານີ້, ເຈົ້າໜ້າທີ່ພະແນກວິຊາສະເພາະຫ້ອງຕໍາຫຼວດ ປກສ ແຂວງໄຊຍະບູລີ ນໍາໂດຍ ພັຕ ບຸນຈັນ ໄຊຍະວົງ ພ້ອມດ້ວຍຄະນະ ໄດ້ລົງເຄື່ອນໄຫວໂຄສະນາສຶກສາອົບຮົມ, ປຸກລະດົມພໍ່ແມ່ປະຊາຊົນ ບ້ານລ້ອງປໍ ເມືອງໄຊຍະບູລີ ຍົກສູງສະຕິຕື່ນຕົວເຄົາລົບ ແລະ ປະຕິບັດລະບຽບ ກົດໝາຍໃຫ້ເຂັ້ມງວດ; ພ້ອມກັນເປັນເຈົ້າການຕ້ານ ແລະ ສະກັດກັ້ນປະກົດການຫຍໍ້ທໍ້ທີ່ອາດຈະເກີດຂຶ້ນ; ຮັບປະກັນໃຫ້ຄອບຄົວ ແລະ ຮາກຖານບ້ານຂອງຕົນມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍເທື່ຶອລະກ້າວ ໂດຍມີທ່ານ ນາງ ກຽງໄຂ ວໍລະຈິດ ນາຍບ້ານລ້ອງປໍ ພ້ອມດ້ວຍຄະນະເຂົ້າຮ່ວມ.
ໂອກາດດັ່ງກ່າວ, ຄະນະຮັບຜິດຊອບໂຄສະນາເຜີຍແຜ່ລະບຽບກົດໝາຍ ໄດ້ຮຽກຮ້ອງໃຫ້ພໍ່ແມ່ປະຊາຊົນມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບລະບຽບການຕ່າງໆ ທີ່ຕິດພັນກັບຊີວິດປະຈໍາວັນ ແລະ ການເຄື່ອນໄຫວຢູ່ໃນສັງຄົມເປັນຕົ້ນ ແມ່ນລະບຽບການສັນຈອນຕາມທ້ອງຖະໜົນ, ການພົວພັນແຕ່ງດອງກັບຄົນຕ່າງປະເທດ ທີ່ຖືກຕ້ອງຕາມກົດໝາຍຂອງພົນລະເມືອງລາວ, ການປົກປັກຮັກສາສິ່ງແວດລ້ອມ-ປ່າໄມ້ທໍາມະຊາດໃຫ້ຍືນຍົງ ເພື່ອຕ້ານທານຄວາມແຫ້ງແລ້ງ ແລະ ຊ່ວຍກັນລະມັດລະວັງໃນການນໍາໃຊ້ໄຟເຂົ້າໃນຊີວິດປະຈໍາວັນ ເພື່ອຫຼີກລ່ຽງບັນຫາອັກຄີໄພອັນຕະລາຍຕໍ່ຊີວິດ, ສຸ ຂະພາບ ແລະ ກໍ່ໃຫ້ເກີດມີຄວາມບໍ່ສະຫງົບຢູ່ໃນສັງຄົມ.
ນອກຈາກນີ້ ຍັງມີປະກົດການຄົນບໍ່ດີສວຍໂອກາດນໍາໃຊ້ເງິນປອມອອກເຄື່ອນໄຫວໃຊ້ຈ່າຍໃນເວລາກາງຄືນ ແລະ ກຸ່ມຄົນທີ່ຮູ້ເທົ່າບໍ່ເຖິງການ ໂດຍຮຽກຮ້ອງໃຫ້ທຸກຄົນ ຈົ່ງຊ່ວຍກັນມີສະຕິໃນການໃຊ້ຈ່າຍເງິນຕາທຸກປະເພດ ເພື່ອສະກັດກັ້ນບໍ່ໃຫ້ເກີດຂຶ້ນຢູ່ໃນສັງຄົມເຮົາ.