ໃນວັນທີ 15 ພຶດສະພາ 2019 ຜ່ານມາ, ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ໄດ້ຈັດພິທີປິດຊຸດຝຶກອົບຮົມ ສ້າງເປັນຄູຝຶກ ກ່ຽວກັບ ການນໍາໃຊ້ເຄື່ອງຈັບຄວາມໄວ, ການສຶກສາອົບຮົມ ແລະ ການບັງຄັບໃຊ້ກົດໝາຍ ໃຫ້ພະນັກງານວິຊາການ ກົມຕໍາຫຼວດຈະລາ ຈອນ ນະຄອນຫຼວງວຽງຈັນ ພາຍຫຼັງທີ່ໄດ້ດຳເນີນມາເປັນເວລາ 3 ວັນ ແຕ່ວັນທີ 13-15 ພຶດສະພາ 2019, ເປັນກຽດເຂົ້າຮ່ວມໂດຍ ພັທ ຄໍາເຫຼັກ ໄຊຍະສິດ ຮອງຫົວໜ້າກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ, ພ້ອມທັງມີ ທ່ານ ຊ່ຽວຊານ ດຣ ຊຸຮີ ອະດີດຫົວໜ້າຕໍາຫຼວດຈະລາຈອນ ອົດສະຕາຣີ, ມີ ບັນດາຄະນະພັກ-ຄະນະກົມ, ນັກສຳມະນາກອນ ແລະ ແຂກຖືກເຊີນ ເຂົ້າຮ່ວມ.
ພັຕ ສັງຄົມ ພົມມະລາດ ຮອງຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ກ່າວວ່າ:
ຊຸດຝຶກອົບຮົມຄັ້ງນີ້, ມີນັກສຳມະນາກອນເຂົ້າຮ່ວມທັງໝົດ 15 ຄົນ, ມາຈາກກົມຕໍາຫຼວດຈະລາຈອນ ນະຄອນຫຼວງວຽງຈັນ ແລະ ຜູ້ຕິດຕາມການຝຶກອົບຮົມ; ຜ່ານການຝຶກອົບຮົມຕະຫຼອດໄລຍະເວລາ 3 ວັນ, ບັນດາຄູ-ອາຈານ ກໍໄດ້ເອົາໃຈໃສ່ຖ່າຍທອດຄວາມຮູ້ ແລະ ປະສົບການຕ່າງໆ ໃຫ້ແກ່ນັກສໍາມະນາກອນຢ່າງເຕັມຄວາມສາມາດ, ສ່ວນນັກສຳມະນາກອນທີ່ໄດ້ເຂົ້າຮ່ວມ ກໍໄດ້ມີຄວາມຕັ້ງໃຈຟັງ ແລະ ປະກອບສ່ວນດ້ວຍການຕັ້ງຄຳຖາມສົນທະນາ ເພື່ອແລກປ່ຽນຄວາມຮູ້ ທີ່ຈະນຳມາໝູນໃຊ້ເຂົ້າໃນໜ້າທີ່ວຽກງານຕົວຈິງ ໃຫ້ມີປະສິດທິຜົນ ແລະ ເປັນເອກະພາບ.
ນອກນີ້, ຍັງໄດ້ເອົາໃຈໃສ່ປະຕິບັດໂມງເວລາຂຶ້ນຫ້ອງ-ລົງຫ້ອງ ຢ່າງເຂັ້ມງວດ, ມີຄວາມສາມັກຄີຮັກແພງຊ່ວຍເຫຼືອເຊິ່ງກັນແລະກັນ ແລະ ມີບັນຍາກາດດີໃນການຮໍ່າຮຽນ.
ພາຍຫຼັງຮຽນທິດສະດີວິຊາການແລ້ວ ແມ່ນຝຶກປະຕິບັດຕົວຈິງຄຽງຄູ່ກັນ ໂດຍການນຳເອົາເນື້ອໃນດັ່ງກ່າວທີ່ພົວພັນກັບວຽກງານວິຊາສະເພາະ ເປັນຕົ້ນເລື່ອງຄວາມໄວ, ຜົນກະທົບດ້ານອຸບັດຕິເຫດ, ຄວາມເປັນຜູ້ນໍາໃນການກວດກາການນໍາໃຊ້, ຄວາມຄິດລິເລີ່ມໃນການຫາວິທີແກ້ໄຂ, ພາກຕົວຈິງ ແລະ ຫຼັກການນໍາໃຊ້ກ້ອງກວດຈັບຄວາມໄວ. ທັງນີ້, ກໍເພື່ອນຳເອົາບົດຮຽນດັ່ງກ່າວ, ໄປໝູນໃຊ້ເຂົ້າໃນວຽກງານຕົວຈິງ ໃນສະເພາະໜ້າ ແລະ ຍາວນານ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.
ພ້ອມດຽວກັນນີ້, ໃນພິທີ ກໍຍັງໄດ້ມອບໃບຢັ້ງຢືນໃຫ້ນັກສຳມະນາກອນທີ່ສຳເລັດການຝຶກອົບຮົມ ເຊິ່ງໃຫ້ກຽດມອບໂດຍ ທ່ານ ຊ່ຽວຊານ ດຣ ຊຸຮີ ອະດີດຫົວໜ້າຕໍາຫຼວດຈະລາຈອນ ອົດສະຕາຣີ.
