ໂດຍການສວຍໃຊ້ໂອກາດຂອງຜູ້ຍິງທີ່ຍັງໄຮ້ດຽງສາ ແລະ ບໍ່ທັນມີປະສົບການໃນການຊອກວຽກເຮັດ ເປັນເຄື່ອງມືກໍ່ເຫດ, ໂດຍຄົນຮ້າຍໄດ້ໃຊ້ຮູບແບບຕົວະວ່າຊອກວຽກໃຫ້ໄດ້ ແລ້ວຫາວິທີໃຫ້ຍິງສາວທີ່ຕົກເປັນເຫຍື່ອມາຫາ ເພື່ອຫາວິທີຂົ່ມຂືນ ແລະ ລັກຊັບ.

ການໃຊ້ກໍາລັງບັງຄັບຂົ່ມຂືນ ຖືວ່າ ເປັນປະກົດການທີ່ເຮັດຜິດລະບຽບກົດໝາຍ ແລະ ເປັນບັນຫາທີ່ສໍາຄັນ ໃນປັດຈຸບັນ. ແຕ່ເຖິງຢ່າງນັ້ນກໍຕາມ, ຕໍ່ກັບ ທ້າວ ຈູເຖກວ້າງ ອາຍຸ 38 ປີ ສະຖານທີ່ເກີດແມ່ນ ເມືອງລັອງແທ່ງ ແຂວງດົ່ງນາຍ, ຜູ້ກ່ຽວຄົນນີ້ ອັນທີ່ເປັນໜ້າຢ້ານກົວທີ່ສຸດ ນອກຈາກຜູ້ກ່ຽວຈະເປັນຄົນລົງມືໃຊ້ກໍາລັງບັງຄັບຍິງສາວແລ້ວ ເມື່ອມີການຕໍ່ສູ້ຄືນຈາກຜູ້ຖືກເຄາະຮ້າຍ ເຖິງຂັ້ນຖືກກັດລີ້ນຂອງຜູ້ກ່ຽວເກືອບຂາດ ແຕ່ຜູ້ກ່ຽວກໍຍັງໃຊ້ຮູບແບບອື່ນ ເພື່ອບັງຂັບຂົ່ມຂືນຍິງສາວ ຈົນສຳເລັດ.

ຕາມການໃຫ້ຮູ້ຂອງ ກໍາລັງເຈົ້າໜ້າທີ່ຕຳຫຼວດສືບສວນ-ສອບສວນ ເຂດເກົ່າເຢີຍ ໄດ້ປະຕິບັດຕາມຄຳສັ່ງຈັບກຸມຕົວ ທ້າວ ກວ້າງ ແບບກະທັນຫັນ ວ່າ:

ເມື່ອເບິ່ງຮູບໂສມພາຍນອກ ຜູ້ກ່ຽວແມ່ນເປັນຄົນຮູບຮ່າງໜ້າຕາດີ, ສູງຍາວ, ລີ້ນທີ່ຖືກຜູ້ຖືກເຄາະຮ້າຍກັດນັ້ນ ແມ່ນໄດ້ຮັບການຫຍິບເກືອບ 10 ເຂັມ ເຮັດໃຫ້ພະນັກງານທີ່ເຂົ້າຈັບຕົວຜູ້ກ່ຽວຕື່ນຕົກໃຈ ແລະ ບໍ່ໜ້າເຊື່ອວ່າ ຜູ້ກ່ຽວຈະຍັງສາມາດສືບຕໍ່ທຳຮ້າຍຜູ້ຖືກເສຍຫາຍໄດ້.

ສ່ວນຜູ້ກ່ຽວ ເບິ່ງແລ້ວແມ່ນບໍ່ມີລັກສະນະວ່າ ຈະມີຄວາມຢ້ານກົວພໍໜ້ອຍ, ຜູ້ກ່ຽວຍັງມີຄວາມມ່ວນໃຈເລົ່າທຸກເຫດການຄືນໄດ້ ແຕ່ສຽງເວົ້າອ່າວຟັງຍາກແດ່ ເພາະລິ້ນຂອງຜູ້ກ່ຽວຍັງໄດ້ຮັບບາດເຈັບຢູ່.

ຜູ້ທີ່ຖືກເຄາະຮ້າຍໃນຄະດີດັ່ງກ່າວນີ້ ແມ່ນ ນາງ H ອາຍຸ 25 ປີ, ນາງແມ່ນຍັງບໍ່ທັນມີອາລົມເປັນປົກກະຕິ ເພາະຍັງກັງວົນກັບເຫດການທີ່ເກີດຂຶ້ນກັບຕົນເອງ ແລະ ຫຼັງຈາກທີ່ຮຽນຈົບວິທະຍາໄລນາງ H ກໍໄດ້ໄປເຮັດວຽກກັ ບໍລິສັດເອກະຊົນ ຫຼາຍແຫ່ງມາແລ້ວ.

ນາງ H ໃຫ້ຮູ້ວ່າ:

ບັນດາບໍລິສັດທີ່ຕົນໄດ້ເຄີຍເຂົ້າເຮັດວຽກ ລ້ວນແຕ່ເປັນບໍລິສັດນ້ອຍ ເຊິ່ງມີສະຖານທີ່ຕັ້ງແມ່ນ ເຂດບ້ານຈັດສັນ ຫຼື ເຮືຶອນເຊົ່າ, ຫ້ອງການເຮັດວຽກແມ່ນງ່າຍໆ, ມີໂຕະເຮັດວຽກບໍ່ເທົ່າໃດໜ່ວຍ ແຕກຕ່າງກັບບັນດາບໍລິສັດໃຫຍ່ ເພາະສະນັ້ນເມື່ອໄດ້ຮັບການແນະນໍາຈາກ ທ້າວ ກວ້າງ ໂດຍການເຂົ້າໄປທີ່ຫ້ອງເຊົ່າຂອງຜູ້ກ່ຽວ ທີ່ເຂດຖະໜົນເຈິ່ນບິ່ງ ຄຸ້ມມາຍຢິກ ເຂດເກົ່າເຢີຍ ເພື່ອທົດລອງເຮັດວຽກ; ເມື່ອໄປຮອດຫ້ອງຂອງຜູ້ກ່ຽວ ປະກົດເຫັນໃນຫ້ອງມີໂຕະຄອມພິວເຕີໜຶ່ງຊຸດ, ເຄື່ອງປິນເຕີ ແລະ ໂທລະສັບໜຶ່ງຊຸດ. ດັ່ງນັ້ນ, ນາງ H ຈຶ່ງບໍ່ໄດ້ຄິດວ່າ ຈະມີຫຍັງເກີດຂຶ້ນກັບຕົນເອງ.

ເຫດການດັ່ງກ່າວ ແມ່ນໄດ້ເລີ່ມຕົ້ນຈາກ ນາງ H, ເຊິ່ງໃນວັນທີ 27 ມີນາ 2017 ນາງ H ໄດ້ລົງຂ່າວເທິງອິນເຕີເນັດວ່າ: ຢາກມີວຽກເຮັດ, ໜ້າວຽກແມ່ນບັນຊີການເງິນ.

ນາງ H ເວົ້າຕື່ມວ່າ:

ປັດຈຸບັນ, ການຊອກວຽກເຮັດ ແມ່ນຜ່ານສື່ອອນລາຍເປັນສ່ວນຫຼາຍ. ດັ່ງນັ້ນ, ຖ້າຫາກມີຄົນທີ່ຕ້ອງການ ແມ່ນຕ້ອງຕິດຕໍ່ກັບມາຫາຕົນເອງ ໂດຍທີ່ບໍ່ຈໍາເປັນຈະໄປຂໍສະໝັກວຽກທີ່ຫ້ອງການແບບໂດຍກົງ.

ມາຮອດວັນທີ 4 ເມສາ 2017, ນາງ H ໄດ້ຮັບໂທລະສັບຂອງ ທ້າວ ຈູເຖກວ້າງ ຜູ້ກ່ຽວໄດ້ແນະນໍາຕົວເອງວ່າ ແມ່ນນາຍໜ້າຮັບພະນັກງານເຂົ້າເຮັດວຽກ ແລະ ຜູ້ກ່ຽວກໍໄດ້ນັດໃຫ້ ນາງ H ເຂົ້າສໍາພາດ ແຕ່ຍ້ອນເວລານັ້ນ ນາງ H ບໍ່ສະບາຍ ຈຶ່ງບໍ່ສາມາດມາພົບໄດ້ຕາມນັດໝາຍ.

ທ້າວ ກວ້າງ ແມ່ນເຮັດວຽກໃຫ້ບໍລິສັດກໍ່ສ້າງແຫ່ງໜຶ່ງ ໃນນະຄອນຫຼວງຮ່າໂນ້ຍ, ເປັນຜູ້ຮັບເອົາພະນັກງານກໍາມະກອນເຂົ້າເຮັດວຽກແທ້, ແຕ່ຄວາມຈິງແລ້ວ ການຊອກຄົນເຂົ້າເຮັດວຽກຂອງຜູ້ກ່ຽວ ກໍເປັນພຽງວຽກເອກະລາດ, ຜູ້ກ່ຽວແມ່ນໄດ້ດຳລົງຊີວິດຢູ່ຮ່ວມກັບ ແຟນສາວອີກຄົນໜຶ່ງ ທີ່ເຮັດວຽກຄຸ້ມຄອງໃຫ້ບັນດາໂຄງການກໍ່ສ້າງ ແລະ ທັງສອງໄດ້ເຊົ່າຫ້ອງຢູ່ນຳກັນແບບຜົວ-ເມຍ ໄດ້ 2 ປີແລ້ວ ເຊິ່ງພວກເຂົາແມ່ນເປັນຮ້າງມາພົບກັນ.

ຕາມການໃຫ້ຮູ້ຂອງແຟນສາວຂອງ ທ້າວ ກວ້າງ ໃຫ້ຮູ້ວ່າ:

ກ່ອນໜ້າວັນເກີດເຫດການນີ້ບໍ່ເທົ່າໃດມື້, ຕົນ ແລະ ທ້າວ ກວ້າງ ເກີດການຜິດຖຽງກັນກ່ຽວກັບໜ້າວຽກ, ຕົນຈຶ່ງໄດ້ໜີອອກຈາກບ້ານ ແລ້ວຫາຊອກເຊົ່າເຮືອນພັກ ໃນເຂດໃກ້ຄຽງນັ້ນຢູ່ຊົ່ວຄາວ ແຕ່ປິດລັບບໍ່ໃຫ້ ທ້າວ ກວ້າງ ຮູ້, ໃນຂະນະທີ່ຕົນໜີອອກຈາກເຮືອນນີ້ ທ້າວ ກວ້າງ ແມ່ນໄດ້ໂທລະສັບ ແລະ ສົ່ງຂໍ້ຄວາມຫາຫຼາຍຄັ້ງ ແຕ່ຕົນກໍບໍ່ຍອມກັບໄປຫ້ອງດັ່ງກ່າວ.

ມາຮອດຕອນທ່ຽງ ວັນທີ 17 ເມສາ 2017, ທ້າວ ກວ້າງ ໄດ້ນຶກເຖິງວ່າ ມີ ນາງ H ຄົນທີ່ກຳລັງຕ້ອງການວຽກເຮັດ ທີ່ຕົນໄດ້ເຫັນຂໍ້ຄວາມເທິງສື່ອິນເຕີເນັດ, ທ້າວ ກວ້າງ ຈຶ່ງໄດ້ໂທລະສັບຫາ ນາງ H ຕາມເບີທີ່ນາງລົງໄວ້ນັ້ນ ແລະ ແຊັດຫານາງຜ່ານສື່ແອັບຊາໂລ, ທ້າວ ກວ້າງ ໄດ້ນັດພົບ ນາງ H ທີ່ຮ້ານກາເຟແຫ່ງໜຶ່ງ ເທິງຖະໜົນເລືອງເຖວິ້ງ ເພື່ອສຳພາດ ແລະ ໄດ້ຮັບການຕົກລົງຈາກ ນາງ H.

ຮອດເວລາ 13:00 ໂມງ ຂອງວັນດຽວກັນ, ນາງ H ໄດ້ອອກມາພົບ ທ້າວ ກວ້າງ ຕາມນັດ ໂດຍໄດ້ຈັບເອກະສານຂໍເຂົ້າເຮັດວຽກອອກມານຳ. ຫຼັງຈາກທີ່ ທ້າວ ກວ້າງ ເບິ່ງເອກະສານທັງໝົດ, ຜູ້ກ່ຽວໄດ້ແນະນຳຕົນຕື່ມອີກວ່າ ຕົນເອງກຳລັງຮັບຜິດຊອບໂຄງການກໍ່ສ້າງໜຶ່ງ ແລະ ກຳລັງຕ້ອງການຄົນຄື ນາງ H ໄປເປັນຜູ້ເຮັດວຽກຕິດຕາມ, ຄຸ້ມຄອງ ແລະ ເບີກຈ່າຍຄ່າແຮງງານໃຫ້ກັບກຳມະກອນ ໃນແຕ່ລະມື້.

( ຕິດຕາມຕອນຕໍ່ໄປ… )