ກອງປະຊຸມລັດຖະບານ ສະໄໝສາມັນ ປະຈໍາເດືອນກໍລະກົດ 2019 ໄດ້ດໍາເນີນການ ໃນວັນທີ 23 ແລະ ໄດ້ສຳເລັດ ໃນວັນທີ 24 ກໍລະກົດ 2019 ດ້ວຍຄວາມຮັບຜິດຊອບສູງຂອງ ສະມາຊິກລັດຖະບານ, ເປັນປະທານໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ມີ ບັນດາຮອງນາຍົກ ແລະ ບັນດາສະມາຊິກລັດຖະບານ ທີ່ໄດ້ພ້ອມກັນພິຈາລະນາ 6 ບັນຫາສຳຄັນ ເຊິ່ງລ້ວນແຕ່ປິ່ນອ້ອມຄວາມເປັນຢູ່ຂອງປະຊາຊົນ.
ທ່ານ ສຈ ປອ ຈະເລີນ ເຢຍປາວເຮີ ລັດຖະມົນຕີ ປະຈຳ ສຳນັກງານນາຍົກ ທັງເປັນ ໂຄສົກລັດຖະບານ ໄດ້ຖະແຫຼງໃຫ້ຮູ້ເຖິງ ຜົນສຳເລັດ ກອງປະຊຸມຄັ້ງນີ້, ບັນດາສະມາຊິກລັດຖະບານ ໄດ້ພ້ອມກັນຄົ້ນຄວ້າ, ປະກອບຄໍາເຫັນ ແລະ ເປັນເອກະພາບກັນສູງຕໍ່ 6 ຫົວຂໍ້ ທີ່ນໍາມາປຶກສາຫາລື ຄື:
- ບັນຫາແຜ່ລະບາດຂອງ ໄຂ້ຍຸງລາຍ ( ໄຂ້ເລືອດອອກ ) ໃນທົ່ວປະເທດ;
- ບັນຫາໂລກອະຫິວາໝູ ລະບາດ;
- ບັນຫາລະບາດຂອງສັດຕູພືດຊະນິດໃໝ່ ( ບົ້ງກິນຕົ້ນສາລີ, ພືດອື່ນໆ );
- ບັນຫາໄພແຫ້ງແລ້ງ ເຮັດໃຫ້ແມ່ນໍ້າລໍາເຊ ແລະ ແມ່ນໍ້າຂອງ ຫຼຸດລະດັບລົງຫຼາຍ ເປັນຜົນກະທົບຕໍ່ການພັດທະນາກະສິກໍາ ແລະ ການປູກຝັງຂອງປະຊາຊົນ;
- ບັນຫາອັດຕາແລກປ່ຽນ ແລະ ຄວາມຄ່ອງຕົວຂອງ ລະບົບເງິນຕາຂອງປະເທດ;
- ສະພາບຫາງສຽງຂອງປະຊາຊົນ ຕໍ່ບັນຫາຕ່າງໆຂອງ ການຄຸ້ມຄອງ ບໍລິຫານລັດ ລວມທັງການຄຸ້ມຄອງລະບົບຂ່າວສານ ໂດຍສະເພາະ ສື່ອອນລາຍ.
ກອງປະຊຸມ ໄດ້ໃຫ້ທິດຊີ້ນໍາ ຢ່າງລະອຽດ ແກ່ບັນດາຂະແໜງການ ແລະ ທ້ອງຖິ່ນ ເພື່ອມີມາດຕະການແກ້ໄຂຕໍ່ສະພາບການດັ່ງກ່າວ ເປັນຕົ້ນແມ່ນ:
ຮັບຟັງການລາຍງານ ກ່ຽວກັບ ສະພາບການພັດທະນາ ແລະ ຄຸ້ມຄອງເຂດເສດຖະກິດພິເສດ ໃນໄລຍະຜ່ານມາ, ບັນຫາຄົງຄ້າງ ແລະ ທິດທາງແກ້ໄຂ ໃນຕໍ່ໜ້າ ເຊິ່ງກອງປະຊຸມໄດ້ມອບໃຫ້ ກະຊວງແຜນການ ແລະ ການລົງທຶນ ເພີ່ມຄວາມເປັນເຈົ້າການ ໃນການຄຸ້ມຄອງທັງ 12 ເຂດເສດຖະກິດພິເສດ ທີ່ໄດ້ອະນຸມັດ.
- ພ້ອມກັນນີ້, ມອບໃຫ້ ອົງການກວດກາລັດຖະບານ ແຕ່ງຕັ້ງໜ່ວຍງານ ລົງໄປກວດກາການປະຕິບັດ ກົດໝາຍ, ລະບຽບການ ແລະ ສັນຍາໂຄງການຂອງບັນດາເຂດເສດຖະກິດດັ່ງກ່າວ ໃຫ້ສໍາເລັດ ໃນກໍານົດ 3 ເດືອນ.
- ການກະກຽມ ກອງປະຊຸມໂຕະມົນ ປະຈໍາປີ 2019 ແລະ ໄດ້ເປັນເອກະພາບມອບໃຫ້ ກະຊວງແຜນການ ແລະ ການລົງທຶນ ແລະ ກະຊວງການຕ່າງປະເທດ ສືບຕໍ່ສົມທົບກັບ ພາກສ່ວນກ່ຽວຂ້ອງ ກະກຽມເນື້ອໃນກອງປະຊຸມດັ່ງກ່າວ ຢ່າງຮອບດ້ານ ແລະ ຮັດກຸມໂດຍໃຫ້ຈັດ ກອງປະຊຸມດ້ານວິຊາການ ຮ່ວມກັບ ຂະແໜງການກ່ຽວຂ້ອງ ເພື່ອເປັນເອກະພາບສູງ ແລ້ວລາຍງານລັດຖະບານຕື່ມ ກ່ອນເປີດກອງປະຊຸມ.
- ກອງປະຊຸມ ໄດ້ຄົ້ນຄວ້າ ຮ່າງດໍາລັດ ວ່າດ້ວຍ ນະໂຍບາຍການພັດທະນາເສດຖະກິດ ແຂວງໄຊສົມບູນ ແລະ ເປັນເອກະພາບ ໃນຫຼັກການຮັບຮອງເອົາຮ່າງດໍາລັດ ສະບັບດັ່ງກ່າວ.
+ ສໍາລັບ ແຜນວຽກຈຸດສຸມຂອງ ລັດຖະບານ ປະຈໍາເດືອນສິງຫາ 2019 ມີຄື:
- ເອົາໃຈໃສ່ ວຽກງານປ້ອງກັນຊາດ – ປ້ອງກັນຄວາມສະຫງົບ ແລະ ແກ້ໄຂ ປະກົດການຫຍໍ້ທໍ້ ທີ່ອາດຈະເກີດຂຶ້ນ ໃນສັງຄົມ;
- ເອົາໃຈໃສ່ປະຕິບັດທິດຊີ້ນໍາຂອງ ກອງປະຊຸມນາຍົກ – ຮອງນາຍົກ, ລັດຖະມົນຕີ ແລະ ກອງປະຊຸມອື່ນໆ ທີ່ ນາຍົກ ແລະ ບັນດາຮອງນາຍົກລັດຖະມົນຕີ ໄດ້ຊີ້ນໍາ ໃນຂົງເຂດເສດຖະກິດ ເປັນຕົ້ນແມ່ນ ການເກັບລາຍຮັບເຂົ້າງົບປະມານ, ການແກ້ໄຂໂຄງການລົງທຶນຂອງລັດ, ການຄຸ້ມຄອງເງິນຕາ ແລະ ອັດຕາແລກປ່ຽນ, ການສົ່ງເສີມ SMEs, ການຄຸ້ມຄອງ ການນໍາເຂົ້າ ສິນຄ້າບໍລິໂພກ, ການສົ່ງເສີມ ການຜະລິດພາຍໃນ ແລະ ບັນຫາອື່ນໆ ທີ່ໄດ້ມີມະຕິອອກໄປແລ້ວ;
- ເອົາໃຈໃສ່ປະຕິບັດວຽກງານ ໃນຂົງເຂດວັດທະນະທໍາ – ສັງຄົມ ໂດຍສະເພາະ ການຜັນຂະຫຍາຍ ແລະ ຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ, ການຟື້ນຟູເຂດຖືກຜົນກະທົບຈາກໄພພິບັດ ໃນປີຜ່ານມາ ແລະ ວຽກງານກວດກາ ການປະຕິບັດຄໍາສັ່ງເລກທີ 15/ນຍ, ວຽກງານການກຽມຄວາມພ້ອມຮັບມືກັບ ໄພພິບັດທໍາມະຊາດ ແລະ ບັນຫາອື່ນໆ;
- ເອົາໃຈໃສ່ປັບປຸງຮ່າງກົດໝາຍ ທີ່ສະພາຮັບຮອງໃນກອງປະຊຸມ ຄັ້ງຜ່ານມາ ແລະ ຮ່າງກົດໝາຍທີ່ຈະນໍາໄປຜ່ານ ກອງ ປະຊຸມສະພາ ໃນຄັ້ງຕໍ່ໄປ ໃຫ້ມີຄຸນນະພາບ ແລະ ທັນກັບກໍານົດເວລາ.
