ການຈັດແບ່ງວຽກນຳຈັບຕົວ ຄົນຮ້າຍລາຍນີ້ ( ເປົ້າໝາຍປຸ້ນທະນາຄານ ), ມີ ພັອ ຟາມດິ່ງທີ ເປັນຮອງຫົວໜ້າຄະນະມ້າງລາຍຄະດີ ພ້ອມດ້ວຍ ພະນັກງານ – ນັກຮົບ ທີ່ຂຶ້ນກັບ ຕຳຫຼວດກຸ່ມ ຟູເຖາະ, ຟູ່ນິ້ງ, ແທງບາ, ເລິ້ມທາວ, ຫວຽດຈີ່ ແລະ ກຸ່ມເກີມເຄ ໄດ້ພ້ອມກັນເຕົ້າລວມກຳລັງ ແລະ ອາວຸດ ເພື່ອປະກອບສ່ວນເຂົ້າໃນການນຳຈັບຕົວ ຜູ້ກໍ່ເຫດນີ້.
ນອກຈາກ ການປະສານສົມທົບຈາກ ພະນັກງານວິຊາການພາກສ່ວນຕ່າງໆ ແລ້ວ, ຍັງມີ ເຈົ້າໜ້າທີ່ຕຳຫຼວດຈະລາຈອນ ຂອງທຸກພາກສ່ວນ ເຂົ້າຮ່ວມນຳ; ຜ່ານການແບ່ງໜ້າທີ່ ໃນການຕິດຕາມ ເປົ້າໝາຍປຸ້ນຊັບທະນາຄານ, ຜູ້ຊີ້ນຳ ແລະ ທຸກພາກສ່ວນ ໄດ້ປະຕິບັດໂດຍເລີ່ມຈາກການຕັ້ງດ່ານກວດກາຂອງ ຕຳຫຼວດຈະລາຈອນ ເຮັດໜ້າທີ່ກວດກາທຸກພາຫະນະທີ່ສົງໄສ, ລົງລັດຕາມຮ່ອມຊອຍ ທີ່ເຫັນວ່າ ຈະເປັນເສັ້ນທາງຫຼົບໜີຂອງເປົ້າໝາຍ; ພ້ອມດຽວກັນນີ້, ພາກສ່ວນອື່ນ ກໍເຮັດໜ້າທີ່ອອກລາດຕະເວນ ຕິດຕາມການເຄື່ອນໄຫວຂອງ ເປົ້າໝາຍທີ່ສົງໄສໃນທົ່ວຂົງເຂດ ແຂວງຟູເຖາະ.
ທັ້ງນີ້, ທາງເຈົ້າໜ້າທີ່ ເນັ້ນໃສ່ຕໍ່ບັນດາເປົ້າໝາຍທີ່ມີປະຫວັດເຄີຍຕ້ອງໂທດມາກ່ອນ ໂດຍສະເພາະແມ່ນ ຜູ້ທີ່ເຄີຍມີປະຫວັດ ຄະດີລັກຊັບພົນລະເມືອງ, ເປົ້າໝາຍທີ່ເຄີຍຖືກດຳເນີນຄະດີ ກ່ຽວກັບ ການຫຼິ້ນການພະນັນ, ເລກ, ຕິດຢາເສບຕິດ ແລະ ເປົ້າໝາຍເປັນໜີ້ສິນ ບໍ່ມີຄວາມສາມາດຈ່າຍ.
ໂດຍຈຸດປະສົງຂອງ ຄະນະຮັບຜິດຊອບມ້າງລາຍຄະດີ ວາງໄວ້ວ່າ:
ຖ້າຫາກພາກສ່ວນໃດ ຫາກເຮັດວຽກເກັບກຳເປົ້າໝາຍ ຫຼື ປ່ອຍໃຫ້ເປົ້າໝາຍທີ່ເປັນຜູ້ກໍ່ເຫດຄັ້ງນີ້ ຫຼຸດໄປໄດ້ ພາກສ່ວນນັ້ນຈະຖືກຕຳນິ ຫຼື ລົງວິໄນ ຢ່າງໜັກ; ສະນັ້ນແລ້ວ, ເຈົ້າໜ້າທີ່ທຸກພາກສ່ວນ ຈຶ່ງໄດ້ເຮັດໃບປິວ ໂດຍນຳຮູບພາບທີ່ເກັບກຳໄດ້ຈາກກ້ອງວົງຈອນປິດ ພ້ອມທັງຂຽນເນື້ອໃນຮູບຊົງຂອງຄົນຮ້າຍ ໄວ້ໃນເຈ້ຍນັ້ນຢ່າງລະອຽດ. ຈາກນັ້ນ, ໄດ້ເອົາໄປເລາະຕິດຕາມຢູ່ເຂດຊຸມນຸມຊົນ ຫຼື ຕາມສະຖານທີ່ຕ່າງໆ ເພື່ອໃຫ້ຜູ້ຮູ້ເຫັນ ຜູ້ກ່ຽວ ແລ້ວແຈ້ງເຂົ້າຫາ ເຈົ້າໜ້າທີ່ ບ່ອນໃກ້ສຸດ.
ຜ່ານການລົງຕິດຕາມ ດ້ວຍວິທີການວິຊາສະເພາະ, ເຈົ້າໜ້າທີ່ ສາມາດເກັບກຳຂໍ້ມູນເປົ້າໝາຍສົງໄສໄດ້ ໂດຍແມ່ນ ທ້າວ ນາມ, ເຊິ່ງເປັນຄົນຕິດຫຼິ້ນການພະນັນ; ຜູ້ກ່ຽວ ເປັນລູກຊາຍຫຼ້າ ແລະ ລູກຊາຍດຽວ ໃນເຮືອນ, ມີອ້າຍ – ນ້ອງ ຮ່ວມກັນຫຼາຍຄົນ ຫຼັງຈາກທີ່ຮຽນຈົບ ມໍ 6 ຜູ້ກ່ຽວ ບໍ່ໄດ້ໄປຮຽນຕໍ່ ຈຶ່ງໄດ້ຊອກວຽກເຮັດໄປເລື້ອຍໆ; ໃນນັ້ນ, ຜູ້ກ່ຽວໄດ້ເຮັດວຽກເປັນພິທິກອນງານດອງ ແລະ ກໍເຄີຍເປີດຮ້ານອິນເຕີເນັດ.
ແຕ່ຍ້ອນ ຜູ້ກ່ຽວ ຍັງຫຼິ້ນກິນຟຸມເຟືອຍ ຈຶ່ງບໍ່ສາມາດດຳເນີນທຸລະກິດດັ່ງກ່າວໄດ້ ແລະ ກາຍມາເປັນຄົນບໍ່ມີວຽກເຮັດ ຫາຫຼິ້ນກິນໄປມື້ໆ, ສຸດທ້າຍ ທ້າວ ນາມ ກາຍເປັນລູກໜີ້ຂອງຫຼາຍໆຄົນ ຍ້ອນການຢືມເງິນມື້, ເງິນດອກເບ້ຍສູງ; ນອກນັ້ນ, ຜູ້ກ່ຽວ ຍັງຢືມເງິນນຳພີ່ນ້ອງ, ຄົນຮູ້ຈັກຮັກແພງອີກຈຳນວນໜຶ່ງ ແລະ ຫຼ້າສຸດ, ຜູ້ກ່ຽວ ບໍ່ມີຄວາມສາມາດຈະຫາເງິນມາຈ່າຍຈຳນວນທີ່ຢືມນັ້ນ ຈຶ່ງເຮັດໃຫ້ໝູ່ຄູ່ຂອງຜູ້ກ່ຽວບໍ່ສົນໃຈ ຜູ້ກ່ຽວ ແລະ ປ່ອຍ ໃຫ້ຜູ້ກ່ຽວໄປຕາມທາງຂອງຕົນເອງ.
ຂະນະດຽວກັນນີ້, ພະນັກງານຕິດຕາມເປົ້າໝາຍທີ່ໄດ້ຕິດຕາມຜູ້ກ່ຽວ ຕາມເສັ້ນທາງໜີ ຫຼັງກໍ່ເຫດນັ້ນ ສາມາດເກັບກຳໄດ້ບາງຂໍ້ມູນ ສຸດທີ່ສຳຄັນ, ເຊິ່ງມີປະຊາຊົນມາແຈ້ງກັບ ເຈົ້າໜ້າທີ່ ວ່າ: ພົບເປົ້າໝາຍຢູ່ທີ່ເຂດຕາແສງແບັກລິ້ວ ເມືອງຊົງໂລ ແຂວງຫວິງຟຸກ ເປັນໄວ້ລຸ້ນຊາຍ ຂັບຂີ່ລົດຈັກ ແລະ ມີຮູບລັກສະນະຄ້າຍຄືກັບພາບທີ່ ເຈົ້າໜ້າທີ່ ຕິດປະກາດຊອກຈັບຕົວ ໃນ ຄະດີປຸ້ນຊັບທະນາຄານ.
ຈາກນັ້ນ, ເຈົ້າໜ້າທີ່ ໄດ້ຕິດຕາມການເຄື່ອນໄຫວຂອງ ເປົ້າໝາຍ ກໍ່ເຫດປຸ້ນທະນາຄານ ລາຍນີ້, ເມື່ອເຂົ້າໃກ້ລົດຜູ້ກ່ຽວ ເຈົ້າໜ້າທີ່ ຮູ້ໄດ້ລະອຽດ ກ່ຽວກັບ ເລກທະບຽນລົດທີ່ຜູ້ກ່ຽວຂັບຂີ່ຢູ່ ນັ້ນແມ່ນ 22H8 – 8274 ແລ້ວຈຶ່ງໄດ້ລາຍງານຂຶ້ນຫາຂັ້ນເທິງ ເພື່ອກວດກາເບິ່ງເຈົ້າຂອງລົດຄັນດັ່ງກ່າວ ເຊິ່ງພົບວ່າເປັນລົດຂອງ ທ້າວ ຫງວຽນຫງັອກແທ້ງ ເກີດປີ 1977 ຢູ່ເມືອງເຊີນເຢືອງ ແຂວງຕຽນກວາງ.
ເມື່ອເຈົ້າໜ້າທີ່ ນຳໄປຮອດເຮືອນຂອງຜູ້ກ່ຽວ ປະກົດວ່າ: ທ້າວ ຫງວຽນຫງັອກແທ້ງ ບໍ່ຢູ່, ທາງເຈົ້າໜ້າທີ່ ຈຶ່ງໄດ້ລົມກັບລູກຊາຍຂອງຜູ້ກ່ຽວ ແລ້ວຮູ້ຂໍ້ມູນອີກວ່າ ກ່ອນໜ້ານີ້ບໍ່ດົນ ທ້າວ ຫງວຽນຫງັອກແທ້ງ ໄດ້ເອົາລົດຈັກຄັນດັ່ງກ່າວໃຫ້ຜູ້ຊາຍທີ່ຊື່ ນາມ ຢືມ, ເຊິ່ງຊາຍຄົນນີ້ ຢູ່ເມືອງຟູນິ້ງ.
ໃນຄະນະນີ້, ເຈົ້າໜ້າທີ່ ໄດ້ຕັ້ງຄຳຖາມຂຶ້ນວ່າ: ທ້າວ ນາມ ກໍແມ່ນ ທ້າວ ຫງວຽນແທ່ງນາມ ທີ່ເປັນເປົ້າໝາຍກໍ່ເຫດ ຕາມການສັນນິຖານຂອງ ເຈົ້າໜ້າທີ່ ຫຼື ບໍ?; ຈາກນັ້ນ, ເຈົ້າໜ້າທີ່ ໄດ້ພົບກັບ ທ້າວ ແທ້ງ ເຈົ້າຂອງລົດຄັນດັ່ງກ່າວ ຈຶ່ງໄດ້ຢັ້ງຢືນວ່າ ທ້າວ ນາມ ແມ່ນຄົນໆດຽວກັບ ທ້າວ ຫງວຽນແທ່ງນາມ ແລະ ປັດຈຸບັນ ຜູ້ກ່ຽວ ກຳລັງເອົາຕົວຫຼົບໜີ.
ຈາກນັ້ນ, ເຈົ້າໜ້າທີ່ ເຮັດວຽກງານຕິດຕາມເປົ້າໝາຍ ກໍ່ເຫດປຸ້ນທະນາຄານ ໄດ້ສຸມໃສ່ເລັ່ງຕິດຕາມເສັ້ນທາງທີ່ ຜູ້ກ່ຽວກຳລັງເອົາຕົວຫຼົບໜີ; ເຊິ່ງຜ່ານການລາຍງານ ກໍຮູ້ວ່າ: ຜູ້ກ່ຽວ ກຳລັງຫາທາງຫຼົບໜີອອກໄປທີ່ ປະເທດຈີນ ແລະ ຖ້າຫາກສະກັດ ຜູ້ກ່ຽວ ບໍ່ທັນ, ເຫື່ອແຮງຂອງອ້າຍ – ນ້ອງພະນັກງານທັງໝົດ ແມ່ນບໍ່ມີຄວາມໝາຍຫຍັງທັງໝົດ.
ເມື່ອເປັນເຊັ່ນນັ້ນ, ທຸກພາກສ່ວນ ຈຶ່ງພ້ອມກັນສຸມໃສ່ສະກັັດເສັ້ນທາງທີ່ເປັນໄປໄດ້ວ່າ ຜູ້ກ່ຽວ ຈະໜີອອກນອກປະເທດ ແລະ ຕາມການຄາດຄະເນຂອງ ເຈົ້າໜ້າທີ່ ໃຫ້ຮູ້ວ່າ: ຜູ້ກ່ຽວ ອາດຈ້າງລົດແທັກຊີ ກັບໄປທີ່ ແຂວງຕຽນກວາງ ແຕ່ຜູ້ກ່ຽວຈະພັກ ຫຼື ລີ້ຊ່ອນຢູ່ໃສນັ້ນ ແມ່ນຍັງບໍ່ຮູ້ແນ່ນອນ.
