ສານປະຊາຊົນ ເຂດ IV ນະຄອນຫຼວງວຽງຈັນ ໄດ້ຈັດພິທີປະກາດໂຍກຍ້າຍ ແລະ ແຕ່ງຕັ້ງຮອງປະທານ ສານ ປະຊາຊົນ ເຂດ IV ຄົນໃໝ່ ຂຶ້ນໃນວັນທີ 16 ສິງຫາ ນີ້, ໂດຍການເຂົ້າຮ່ວມຂອງທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດ, ມີປະທານສານປະຊາຊົນແຕ່ລະເຂດ, ຜູ້ພິພາກສາ, ພ້ອມດ້ວຍພາກສ່ວນກ່ຽວ ຂ້ອງເຂົ້າຮ່ວມ.
ທ່ານ ກັ້ງ ເຕັມສົມບັດ ຫົວໜ້າກົມຈັດຕັ້ງ-ພະນັກງານສານ ປະຊາຊົນສູງສຸດ ໄດ້ຜ່ານມະຕິ ຂອງຄະນະປະຈໍາສະພາແຫ່ງຊາດ ເລກທີ 116/ຄປຈ, ລົງວັນທີ 25 ກໍລະກົດ 2019 ວ່າດ້ວຍ ການແຕ່ງຕັ້ງຮອງປະທານສານປະຊາຊົນ ເຂດ IV ນະຄອນຫຼວງວຽງຈັນ ໂດຍເຫັນດີແຕ່ງຕັ້ງ ທ່ານ ວົງວິໄລ ໄຊຍະສົມບັດ ຫົວໜ້າຄະນະສານ ອາຍາ ເປັນຮອງປະທານສານປະຊາຊົນເຂດ IV (ຜູ້ໃໝ່) ພ້ອມທັງຜ່ານມະຕິຂອງຄະນະປະຈໍາ ສະພາແຫ່ງຊາດ ເລກທີ 119/ຄປຈ, ລົງວັນທີ 25 ກໍລະກົດ 2019 ວ່າດ້ວຍການໂຍກຍ້າຍ ບ່ອນປະຈໍາການຂອງພະນັກງານ ສານປະຊາຊົນ ໂດຍໂຍກຍ້າຍ ທ່ານ ນາງ ຈອມພັນ ຈັນທະວີ ຮອງປະທານສານປະຊາຊົນເຂດ IV ( ຜູ້ເກົ່າ ) ໄປປະຈໍາການຢູ່ສານປະຊາຊົນພາກກາງ.
ໂອກາດດັ່ງກ່າວ, ທ່ານ ຄຳພັນ ບຸນພາຄົມ ຍັງໄດ້ເນັ້ນໃຫ້ຜູ້ທີ່ໄດ້ຮັບຕໍາແໜ່ງໃໝ່ ຈົ່ງຕັ້ງໃຈສຸມທຸກເຫື່ອແຮງ, ສະຕິປັນຍາ, ຄວາມຮູ້-ຄວາມສາມາດເຂົ້າໃນການຈັດຕັ້ງປະຕິບັດວຽກງານວິຊາສະເພາະ ກໍຄືການຕັດສິນບັນດາຄະດີ, ຄໍາຮ້ອງຟ້ອງອື່ນໆດ້ວຍຄວາມຊື່ສັດ, ໂປ່ງໃສ, ທ່ຽງທໍາ-ຍຸຕິທໍາ ແລະ ເປັນກາງ ເພື່ອເຮັດໃຫ້ລູກຄວາມ ຄະດີເຊື່ອໝັ້ນ ແລະ ເຮັດໃຫ້ວຽກງານມີປະສິດທິຜົນຫຼາຍຂຶ້ນກວ່າເກົ່າ.