ຫ້ອງການກະສິກຳ ແລະ ປ່າໄມ້ ເມືອງເງິນ ແຂວງໄຊຍະບູລີ ໄດ້ຈັດກອງປະຊຸມຄົ້ນຄວ້າ-ປຶກສາຫາລືການ ເຝົ້າລະວັງ ການຕ້ານ ແລະ ສະກັດກັ້ນພະຍາດອະຫິວາໝູ ໃນວັນທີ 13 ສິງຫາ 2019; ເປັນປະທານໂດຍ ທ່ານ ທອງສຸກ ຈັນປະເສີດ ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ເຂົ້າຮ່ວມໂດຍ ທ່ານ ບຸນສົດ ອິນທະປັນຍາ ຮອງເຈົ້າເມືອງ, ມີຫົວໜ້າຫ້ອງ ການທີ່ກ່ຽວຂ້ອງ, ກຸ່ມລ້ຽງໝູ, ນັກທຸລະກິດຜູ້ປະກອບການຂ້າ ສັດ ແລະ ກຸ່ມສະໜອງຊີ້ນປ່ອນຕະຫຼາດ ເຂົ້້າຮ່ວມ.
ທ່ານ ທອງສຸກ ຈັນປະເສີດ ໄດ້ເຜີຍແຜ່ແຈ້ງການຂອງກະຊວງກະສິກຳ ແລະ ປ່າໄມ້ ກ່ຽວກັບ ການສະກັດກັ້ນຫ້າມນຳເຂົ້າໝູ, ຜະລິດຕະພັນໝູທຸກຊະນິດ ລວມທັງຜະລິດຕະພັນທີ່ປຸ່ງແຕ່ງ ເບື້ອງຕົ້ນຈາກປະເທດຈີນ, ຫວຽດນາມ ເຂົ້າສູ່ປະເທດເຮົາ ເພື່ອຕ້ານ ແລະ ສະກັດກັ້ນພະຍາດອະຫິວາໝູ ແລະ ແຈ້ງການຂອງທ່ານເຈົ້າແຂວງໄຊຍະບູລີ ເລື່ອງການເພີ່ມທະວີ ຄວາມຮັບຜິດຊອບໃນການກະກຽມຕ້ານໄພແຫ້ງແລ້ງ-ຕ້ານໄພນໍ້າຖ້ວມ, ການປ້ອງກັນກຳຈັດບົ້ງຝູງສາລີ ແລະ ຕິດຕາມເຝົ້າລະວັງການປ້ອງກັນພະຍາດອາຫິວາໝູ.
ໂອກາດດັ່ງກ່າວ, ທ່ານ ບຸນສົດ ອິນທະປັນຍາ ຮອງເຈົ້າເມືອງໆເງິນ ໄດ້ເໜັ້ນໜັກພາກສ່ວນທີ່ ກ່ຽວຂ້ອງ ໂດຍສະເພາະນັກທຸລະກິດຜູ້ປະກອບການໃຫ້ມີສະຕິເຝົ້າລະວັງຕ້ານພະຍາດອະຫິວາໝູຢ່າງໃກ້ຊິດ, ຕິດຕາມການເຄື່ອນຍ້າຍສັດເຂົ້າ-ອອກເມືອງຢ່າງເຄັ່ງຄັດ; ພ້ອມທັງຕິດຕາມ-ກວດກາທຸກໆຄັ້ງໃນການນຳເອົາສັດເຂົ້າເຕົາຂ້າ ແລະ ສະໜອງຊີ້ນປ່ອນຕະຫຼາດ ພາຍໃນເມືອງ ເພື່ອຮັບປະກັນໃຫ້ຜູ້ບໍລິໂພກມີຄວາມປອດໄພ.