ພະແນກຕຳຫຼວດສືບສວນ-ສອບສວນຄະດີອາຍາ ກອງບັນຊາການ ປກສ ແຂວງຄຳມ່ວນ ມອບລົດຄືນເຈົ້າຂອງເດີມ ປະເພດລົດກະບະ DAEHAN ( ແດຮັນ ) ສີຂາວ ໝາຍເລກທະບຽນ ກສ 0652 ສະຫວັນນະເຂດ; ກ່າວມອບໂດຍ ຮອ ສີທາ ແກ້ວສະຫວັນ ພະນັກງານວິຊາການ ພະແນກຕຳຫຼວດສືບສວນ-ສອບສວນຄະດີອາຍາ ປກສ ແຂວງຄຳມ່ວນ ແລະ ກ່າວຮັບໂດຍ ທ່ານ ແສງຈັນ ອາຍຸ 52 ປີ ຢູ່ບ້ານສຸນັນທາ ນະຄອນໄກສອນພົມວິຫານ ແຂວງສະຫວັນນະເຂດ ໃນວັນທີ 21 ສິງຫາ 2019.
ຮອ ສີທາ ແກ້ວສະຫວັນ ໃຫ້ຮູ້ວ່າ:
ໃນວັນທີ 12 ມິຖຸນາ 2019, ທາງເຈົ້າໜ້າທີ່ ພະແນກຕຳຫຼວດສືບສວນ-ສອບສວນຄະດີອາຍາ ປກສ ແຂວງຄຳມ່ວນ ໄດ້ຮັບແຈ້ງຄວາມຈາກ ທ້າວ ແສງຈັນ ໄຊຍະວົງ ວ່າ: ໃນວັນທີ 9 ມິຖຸນາ 2019, ໄດ້ມີຄົນຮ້າຍບໍ່ຮູ້ຊື່ ຈຳນວນ 4 ຄົນ ມາທຳຮ້າຍຮ່າງກາຍ ພ້ອມທັງບັງຄັບເອົາລົດຄັນດັ່ງກ່າວໄປ; ຈາກນັ້ນ, ຈຶ່ງໄດ້ຈັດກຳລັງວິຊາສະເພາະ ລົງກວດກາເກັບກຳຂໍ້ມູນຫຼັກຖານ ພ້ອມຄັດຈ້ອນເປົ້າໝາຍຜູ້ກະທຳຜິດ ຈຶ່ງຮູ້ວ່າຜູ້ລົງມືກໍ່ເຫດແມ່ນ ທ້າວ ເຈີ່ນເຟືອງຫ່າວ ອາຍຸ 48 ປີ ສັນຊາດຫວຽດນາມ ຢູ່ບ້ານບັກຫຼີ ນະຄອນດົງເຮີຍ ແຂວງກວາງບິ່ງ ສສ ຫວຽດນາມ ເຊົ່າເຮືອນຢູ່ບ້ານໂພນຄຳ ເມືອງຍົມມະລາດ ແຂວງຄຳມ່ວນ ເປັນໜຶ່ງໃນຈໍານວນ 4 ຄົນຮ້າຍ.
ມາຮອດວັນທີ 6 ສິງຫາ 2019, ທາງເຈົ້າໜ້າທີ່ວິຊາສະເພາະ ໄດ້ສົມທົບກັບ ເຈົ້າໜ້າທີ່ ປກສ ເມືອງຍົມມະລາດ ກັກຕົວ ທ້າວ ເຈີນເຟືອງຫ່າວ ໄປດຳເນີນຄະດີຕາມລະບຽບກົດໝາຍ; ສຳຫຼັບຄະດີດັ່ງກ່າວ, ເຈົ້າໜ້າທີ່ພວມດໍາເນີນການຕິດຕາມຕົວພວກຮ່ວມກະທໍາຜິດໃນຄັ້ງນີ້ ເພື່ອນຳຕົວມາລົງໂທດຕາມລະບຽບກົດໝາຍຕໍ່ໄປ.