ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ (ພຊສ ນວ) ໄດ້ປະກາດຂໍ້ຕົກລົງ ວ່າດ້ວຍການແຕ່ງຕັ້ງຫົວໜ້າພະແນກ-ຄະນະຂະແໜງການອ້ອມຂ້າງ ພຊສ ຂຶ້ນໃນ ວັນທີ 6 ກັນຍາ 2019, ເຂົ້າຮ່ວມ ໂດຍ ທ່ານ ລາດຊະນີວົງ ອະມະຣະທິທາດາ ປະທານອົງການກວດກາລັດ ນະຄອນຫຼວງວຽງຈັນ; ທ່ານ ໄຊຍະເວດ ວິໄຊ ຫົວໜ້າກົມຈັດຕັ້ງ ແລະ ພະນັກງານ ກະຊວງຊັບພະຍາກອນທໍາມະຊາດ ແລະ ສິ່ງແວດ ລ້ອມ, ມີຮອງຫົວໜ້າຄະນະຈັດ ຕັ້ງ ນວ, ແຂກຮັບເຊີນ ພ້ອມດ້ວຍພະນັກງານ-ລັດຖະກອນ ເຂົ້າຮ່ວມ.
ທ່ານ ນາງ ດຳດວນ ຈັນທະວົງ ຮອງຫົວໜ້າຄະນະຈັດຕັ້ງ ນະຄອນຫຼວງວຽງຈັນ ໄດ້ຂຶ້ນຜ່ານຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ວ່າດ້ວຍການແຕ່ງຕັ້ງພະນັກງານ ອີງຕາມໜັງສືສະເໜີຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ; ອີງຕາມການຕົກລົງເຫັນດີເປັນເອກະພາບຂອງກອງປະຊຸມປຶກສາຫາລືລະ ຫວ່າງ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ຄະນະຈັດຕັ້ງ ແລະ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ເຈົ້າຄອງນະຄອນຫຼວງວຽງຈັນ ຕົກລົງແຕ່ງຕັ້ງ ທ່ານ ແອງພອນ ແພງສຸວັນ ຫົວໜ້າພະແນກຄຸ້ມຄອງການນໍາໃຊ້ນໍ້າ ກົມຊັບພະຍາກອນນໍ້າເປັນ ຮອງຫົວໜ້າພະແນກຊັບພະຍາກອນ ແລະ ສິ່ງແວດລ້ອມ ນະຄອນຫຼວງວຽງຈັນ.
ພ້ອມດຽວກັນນັ້ນ, ກໍໄດ້ແຕ່ງຕັ້ງຫົວໜ້າຂະແໜງ ແລະ ຮອງຫົວໜ້າຂະແໜງ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ຄື: ຂະແໜງບໍລິຫານ ແລະ ການເງິນ; ສະຖິຕິ ແລະ ຂໍ້ມູນຂ່າວສານ; ຈັດຕັ້ງ ແລະ ພະນັກງານ; ກວດກາ; ທີ່ດິນ; ຊັບພະຍາກອນນໍ້າ ແລະ ອຸຕຸນິຍົມ; ສິ່ງແວດລ້ອມ ແລະ ການປ່ຽນແປງ ດິນຟ້າອາກາດ ແລະ ຂະແໜງຕິດຕາມກວດກາຊັບພະຍາກອນທໍາມະຊາດ ແລະ ສິ່ງແວດລ້ອມໃນໂອກາດດັ່ງກ່າວ, ທ່ານ ໄຊຍະເວດ ວິໄຊ ໄດ້ເນັ້ນໃຫ້ຫົວໜ້າ ພະແນກ-ຄະນະຂະແໜງການອ້ອມຂ້າງ ພຊສ ທຸກສະຫາຍທີ່ໄດ້ຮັບການແຕ່ງຕັ້ງຄັ້ງນີ້, ໃຫ້ເອົາໃຈໃສ່ຕັ້ງໜ້າປະຕິບັດໜ້າທີ່ຢ່າງມີຄວາມຮັບຜິດຊອບສູງ, ມີຄວາມກ້າຫານ, ໄຫວພິກໃນການເຄື່ອນໄຫວວິຊາສະເພາະ, ກໍາແໜ້ນແນວທາງ, ລະບຽບກົດໝາຍເປັນສໍາຄັນ, ຢຶດຖືຄວາມຊື່ສັດ, ຖືກຕ້ອງ, ເປັນທໍາ ເພື່ອສະກັດກັ້ນບໍ່ໃຫ້ມີປະກົດການຫຍໍ້ທໍ້ດ້ານຕ່າງໆເກີດຂຶ້ນພາຍໃນສໍານັກງານ-ອົງການຂອງຕົນເອງ.