ໃນວັນທີ 19 ກັນຍາ 2019, ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ພ້ອມຄະນະ ຢ້ຽມຢາມ ແລະ ເຮັດວຽກຢູ່ບ້ານແຊລະບຳ ເມືອງຊະນະສົມບູນ ແຂວງຈຳປາສັກ ໃຫ້ກຽດຕ້ອນຮັບໂດຍ ທ່ານ ປອ ບຸນຖອງ ດີວີໄຊ ເຈົ້າແຂວງໆຈຳປາສັກ, ທ່ານເຈົ້າເມືອງໆຊະນະສົມບູນ ພ້ອມດ້ວຍພະນັກງານຫຼັກແຫຼ່ງ ອ້ອມຂ້າງເມືອງ
ທ່ານເຈົ້າເມືອງຊະນະສົມບູນ ລາຍງານຜົນເສຍຫາຍຈາກໄພນ້ຳຖ້ວມຂອງ ບ້ານແຊລະບຳ ໃຫ້ຮູ້ວ່າ:
ບ້ານແຊລະບໍາ ປະກອບມີ 2 ຄຸ້ມ ມີ 368 ຫຼັງຄາເຮືອນ 388 ຄອບຄົວ ມີປະຊາກອນທັງໝົດ 2.056 ຄົນ, ມີເນື້ອທີ່ທັງໝົດ 778,26 ເຮັກຕາ ໃນນັ້ນເນື້ອທີ່ເຮັດການຜະລິດ 247,63 ເຮັກຕາ, ຖືກນ້ຳຖ້ວມເສຍຫາຍ 100% ບ້ານເຮືອນສູນເສຍ 19 ຫຼັງຄາ, ເປ່ເພບໍ່ສາມາດສ້ອມແປງໄດ້ 90 ຫຼັງຄາ, ມີສັດລ້ຽງສູນຫາຍຄື: ງົວ 25 ໂຕ, ຄວາຍ 6 ໂຕ, ໝູ 26 ໂຕ, ແບ້ 6 ໂຕ ແລະ ສັດປີກ 1.561 ໂຕ; ນອກຈາກນັ້ນ, ຍັງມີຊົນລະປະທານຖືກເຊາະເຈື່ອນ 500 ແມັດ, ຂົວຂາດ 1 ແຫ່ງ, ໂຮງຮຽນເສຍຫາຍ 3 ຫຼັງ ລວມຜົນເສຍຫາຍໃນໄພພິບັດຄັ້ງນີ້ແມ່ນ ປະມານ 16 ຕື້ກວ່າກີບ ( ຍັງບໍ່ໄດ້ປະເມີນຂົວ, ຊົນລະປະທານ ແລະ ເສັ້ນທາງ ).
ທ່ານ ພູວັນ ແພງມະເກດ ວ່າການຜູ້ອໍານວຍການ ເຂື່ອນໄຟຟ້າ ແຊລະບໍາ ລາຍງານວ່າ: ເຂື່ອນໄຟຟ້າແຊລະບຳ ໄດ້ຮັບຜົນກະທົບຈາກໄພນ້ຳຖ້ວມຄັ້ງນີ້ ໜັກສົມຄວນເຮັດໃຫ້ໂຮງຈັກ work shoft ແລະ Swichy ard ຖືກນ້ຳຖ້ວມທັງໝົດ ( ຍັງບໍ່ສາມາດປະເມີນຜົນເສຍຫາຍໄດ້ ) ເສັ້ນທາງແຕ່ທ່າບັກລົງຮອດໂຮງຈັກຖືກຕັດຂາດ ແລະ ເຊາະເຈື່ອນຍາວ 680 ແມັດ.
ໂອກາດນີ້, ຮອງນາຍົກລັດຖະມົນຕີ ໄດ້ຮຽກຮ້ອງປະຊາຊົນໃຫ້ມີຄວາມສາມັກຄີຮ່ວມແຮງຮ່ວນໃຈກັນ ຟື້ນຟູໃຫ້ກັບໄປສູ່ປົກກະຕິໂດຍໄວ; ດ້ານການຈັດຕັ້ງພັກ-ລັດ ກໍໄດ້ພະຍາຍາມທຸ້ມເທຊັບສິນທັງໝົດ ເທົ່າທີ່ພວກເຮົາມີ ນັບທັງສ່ວນທີ່ລະດົມນຳສັງຄົມ ພ້ອມກັນປະກອບສ່ວນໃນການຟື້ນຟູບັນຫາຕ່າງໆ ເປັນຕົ້ນແມ່ນ ພື້ນຖານໂຄງລ່າງ ແລະ ສິ່ງສາທາລະນະຂອງແຕ່ລະບ້ານທີ່ເສຍຫາຍຕາມຄວາມສາມາດທີ່ພວກເຮົາມີ, ຮັກສາສຸຂະພາບ ເປັນຕົ້ນແມ່ນ ປ້ອງກັນພະຍາດລະບາດທີ່ມາຕາມນ້ຳ, ບໍ່ຫູເບົາຕໍ່ການສວຍໂອກາດຂອງກຸ່ມຄົນບໍ່ດີ ທີ່ໂຄສະນາຊວນເຊື່ອບິດເບືອນຈາກຄວາມເປັນຈິງ ແລະອື່ນໆ.
ນອກນີ້, ຍັງໄດ້ມອບເງິນສົດໃຫ້ແກ່ປະຊາຊົນ ຜູ້ທີ່ປະສົບໄພພິບັດທາງທຳມະຊາດຂອງ ເມືອງຊະນະສົມບູນ ຈຳນວນ 100.000.000 ກີບ ແລະ ເຄື່ອງອຸປະໂພກ – ບໍລິໂພກ, ເຄື່ອງໃຊ້ຄົວເຮືອນ ມູນຄ່າ 40.000.000 ກີບ.