ພິທີ ຖະແຫຼງຂ່າວງານບຸນຊ່ວງເຮືອ ຢູ່ສວນນ້ຳອິນແປງຣີເວີໄຊ
ພິທີ ຖະແຫຼງຂ່າວງານບຸນຊ່ວງເຮືອ ຢູ່ສວນນ້ຳອິນແປງຣີເວີໄຊ

ການແຂ່ງຂັນເຮືອຊ່ວງ, ເຮືອສູດ 55 ສີພາຍ ທີ່ຈະຈັດຂຶ້ນໃນລະຫວ່າງວັນທີ 28-29 ກັນຍານີ້ ຢູ່ສວນນໍ້າອິນແປງຣີເວີໄຊ ເພື່ອໃຫ້ການແຂ່ງຂັນເຮືອນດັ່ງກ່າວດໍາເນີນໄປດ້ວຍຜົນສໍາເລັດອັນຈົບງາມ ແລະ ມີຄວາມປອດໄພຮອບດ້ານ; ສະນັ້ນ, ປະທານ ບໍລິສັດ ອິນແປງ ກຣຸບ ຈຶ່ງໄດ້ ຖະແຫຼງຂ່າວງານບຸນຊ່ວງເຮືອ ດັ່ງກ່າວ ພ້ອມທັງອອກຂໍ້ກໍານົດວ່າດ້ວຍກົດລະບຽບການແຂ່ງຂັນເຮືອຊ່ວງ ເຮືອສູດ 55 ສີພາຍ; ໂດຍມີທ່ານ ສຸກສະຫວັນ ບຸດຕະວົງ ຮອງເຈົ້າເມືອງໆຫາດຊາຍຟອງ, ມີຫົວໜ້າຂະແໜງກິລາລະດັບສູງ, ຫົວໜ້າຫ້ອງການບໍລິສັດ ອິນແປງກຣຸບ ຈໍາກັດ ພ້ອມດ້ວຍຄະນະຮັບຜິດຊອບເຮືອແຕ່ລະພາກສ່ວນເຂົ້າຮ່ວມ.

ການຈົກສະຫຼາກຕັບຄູ່ແຂ່ງຂັນ
ການຈົກສະຫຼາກຕັບຄູ່ແຂ່ງຂັນ

ໃນພິທີຖະແຫຼງດັ່ງກ່າວ, ຄະນະຮັບຜິດຊອບຈັດການແຂ່ງຂັນ ໄດ້ໃຫ້ຮູ້ວ່າ: ເຮືອທີ່ເຂົ້າແຂ່ງຂັນໃນປີນີ້ ມີທັງໝົດ 9 ລໍາ, ເປັນເຮືອສູດຊາຍບັນຈຸບໍ່ເກີນ 55 ຄົນ ຫຼື 55 ສີພາຍ; ມີ 2 ສາຍ ແຕ່ລະສາຍແບ່ງອອກເປັນ 2 ແລວ (ຝັ່ງ-ວັງ), ໄລຍະການແຂ່ງຂັນບໍ່ເກີນ 1.000 ແມັດ, ຄວາມໜາຂອງເຮືອບໍ່ເກີນ 5 ຊັງຕີແມັດ, ທຸກຂັ້ນຂອງເຮືອຕ້ອງຢອງຢູ່ໄມ້ກົງ (ໄມ້ດູກ) ແລະ ຊີໄລຄັດໃສ່ກັບເຮືອ, ຕ້ອງມີໄມ້ຮາວກາງ; ຫົວ-ທ້າຍ ສຽບຕໍ່ອອກໄປຕາມໃຈມັກ ລ໋ອກດ້ວຍນັອດນາຍຫົວ ແລະ ນາຍທ້າຍ ແຕ່ບໍ່ສາມາດຂຶ້ນນັ່ງ ຫຼື ຢືນພາຍໄດ້ ແລະ ທີ່ສໍາຄັນ, ສີພາຍຂອງເຮືອແຕ່ລະລໍາ ຄ້ອງມີສຸຂະພາບແຂງແຮງ; ມີລະບົບກ້າມເນື້ອ ແລະ ລະບົບຫານໃຈດີ, ຕ້ອງເປັນຄົນລາວທີ່ມີພູມລໍາເນົາຢູ່ ສປປ ລາວ ເທົ່ານັ້ນ, ອາຍຸແມ່ນ 16 – 55 ປີ ສ່ວນຄູຝຶກແມ່ນສາມາດລົງພາຍເຮືອຮ່ວມໄດ້ ແຕ່ຕ້ອງນອນຢູ່ໃນຈໍານວນ  55 ສີພາຍ.

ສໍາລັບລາງວັນ ແມ່ນມີ 4 ລາງວັນຄື: ລາງວັັນທີ 1: ໄດ້ຂັນໂລ 1 ໜ່ວຍ ພ້ອມເງິນສົດ 13.000.000 ກີບ; ທີ 2 ໄດ້ຂັນໂລ 1 ໜ່ວຍ ພ້ອມເງິນສົດ 11.000.000 ກີບ; ທີ 3 ໄດ້ຂັນໂລ 1 ໜ່ວຍ ພ້ອມເງິນສົດ 9.000.000 ກີບ; ທີ 4 ໄດ້ຮັບເງິນ ຈໍານວນ 7.000.000 ກີບ ແລະ ລາງວັນນອນທ່າ ແມ່ນເງິນສົດ 5.000.000 ກີບ; ການແຂ່ງຂັນເຮືອຊ່ວງດັ່ງກ່າວນີ້, ແມ່ນຈະແຂ່ງຂັນໃນວັນທີ 29 ກັນຍາ ເວລາ 9:30-16:30 ໂມງ ຢູ່ທີ່ສວນນໍ້າອິນແປງ ຣີເວີໄຊ ສວນວັດທະນະທໍາ ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ.

- Advertisement -
Visual Composer Website Builder