ພິທີເປີດຂະບວນການແຂ່ງຂັນກິລາຂອງ ຮທມ
ພິທີເປີດຂະບວນການແຂ່ງຂັນກິລາຂອງຮທມ

ໂຮງຮຽນທິດສະດີການເມືອງ (ຮທມ) ປກສ ກົມໃຫຍ່ການ ເມືອງ ກະຊວງ ປກສ ໄດ້ເປີດຂະບວນການ ແຂ່ງຂັນກິລາ ເພື່ອຂໍ່ານັບຮັບຕ້ອນວັນຄູແຫ່ງຊາດ 7 ຕຸລາ ຄົບຮອບ 25 ປີ (7 ຕຸລາ 1994-7 ຕຸລາ 2019); ເຂົ້າຮ່ວມໂດຍ ພັທ ປອ ສຸກນິລັນດອນ ກຸນລະວົງ ຮອງຜູ້ອຳນວຍການ ຮທມ, ມີບັນດາຄະນະອົງການຈັດຕັ້ງຊາວໜຸ່ມ, ແມ່ຍິງ, ຄູ-ອາຈານ ແລະ ນັກສຶກສາ ຕະຫຼອດຮອດນັກກິລາ ເຂົ້າຮ່ວມ.

ພັຕ ພູທອນ ທຳມະສິດ ເລຂາຊາວໜຸ່ມຮທມ ກ່າວວ່າ: ການເປີດຂະບວນການແຂ່ງຂັນກິລາໃນຄັ້ງນີ້ ນອກຈາກຈະເປັນການຂໍ່ານັບຮັບຕ້ອນວັນສຳຄັນດັ່ງກ່າວແລ້ວ ຍັງເປັນການເສີມສ້າງຄວາມສາມັກຄີເຊິ່ງກັນແລະກັນລະ ຫວ່າງພະນັກງານຄູ-ອາຈານ ແລະ ນັກສຶກສາ ໃຫ້ມີຄວາມແໜ້ນແຟ້ນຍິ່ງຂຶ້ນ, ທັງເປັນການສ້າງບັນຍາກາດເບີກບານມ່ວນຊື່ນ ແລະ ເຮັດໃຫ້ບັນດານັກກິລາມີສຸຂະພາບແຂງແຮງ, ພາລະນາໄມສົມບູນ ແລະ ມີຄວາມບຸກບືນໃນການສຶກ ສາຄົ້ນຄວ້າຮໍ່າຮຽນໃຫ້ມີຜົນເລັດຕາມຄາດໝາຍ; ເຊິ່ງກິລາທີ່ນຳມາແຂ່ງຂັນປະ ກອບມີ ຄື: ກິລາບານສົ່ງຊາຍ ມີ 18 ທີມ ແລະ ຍິງ 5 ທີມ; ກິລາເປຕັງຊາຍ 5 ທີມ ແລະ ຍິງ 3 ທີມ, ໂດຍເລີ່ມແຕ່ວັນທີ 26 ກັນຍາ ຫາ 4 ຕຸລາ 2019 ຈຶ່ງຈະສຳເລັດ.

ໂອກາດດັ່ງກ່າວ, ທ່ານຮອງຜູ້ອຳນວຍການຮທມ ໄດ້ເນັ້ນໃຫ້ບັນດາກໍາມະການຕັດສິນການແຂ່ງຂັນ ຈົ່ງພ້ອມ ກັນປະຕິບັດຕາມແຜນການທີ່ວາງໄວ້ຢ່າງເຂັ້ມງວດ ເປັນຕົ້ນແມ່ນການຕັດ ສິນໃຫ້ຊັດເຈນ ແລະ ຍຸຕິທຳ, ປະຕິບັດໂມງເວລາແຂ່ງຂັນໃຫ້ມີຄວາມຖືກຕ້ອງ ເພື່ອໃຫ້ການແຂ່ງຂັນເຕັມໄປດ້ວຍຄວາມມ່ວນຊື່ນ, ມິດຕະພາບ, ຮູ້ໄດ້-ຮູ້ເສຍ ແລະ ມີນໍ້າໃຈເປັນນັກກິລາ ເພື່ອຮັບປະກັນໃຫ້ການແຂ່ງຂັນດັ່ງກ່າວມີຜົນສຳເລັດຢ່າງຈົບງາມ ແລະ ເປັນຂະ ບວນຟົດຟື້ນ.

- Advertisement -
Visual Composer Website Builder