ກະຊວງ ປກສ ໄດ້ຈັດກອງປະຊຸມປຶກສາຫາລື ເພື່ອກຽມຄວາມພ້ອມໃນການສະເຫຼີມສະຫຼອງ ວັນສ້າງຕັ້ງກໍາລັງປ້ອງກັນຄວາມສະຫງົບ ປະຊາຊົນ ຄົບຮອບ 60 ປີ ( 5 ເມສາ 1961 – 5 ເມສາ 2021 ) ໃນວັນທີ 2 ຕຸລາ 2019, ເປັນປະທານໂດຍ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ ທັງເປັນ ຫົວໜ້າອະນຸກໍາມະການຊີ້ນໍາລວມ ໃນການສະເຫຼີມສະຫຼອງຄັ້ງນີ້, ໂດຍມີ ບັນດາຄະນະພັກກະຊວງ, ຫົວໜ້າກົມໃຫຍ່, ອໍານວຍການວິທະຍາຄານ ແລະ ຄະນະຮັບຜິດຊອບ ເຂົ້າຮ່ວມ.
ໃນກອງປະຊຸມ, ຄະນະອະນຸກໍາມະການ ໄດ້ປຶກສາຫາລືດ້ານຕ່າງໆ ເພື່ອກະກຽມບັນດາໜ້າວຽກ ເຊັ່ນ:
ເນື້ອໃນ, ກິດຈະກໍາ, ການປັບປຸງ – ກໍ່ສ້າງພື້ນຖານໂຄງລ່າງ, ວັດຖຸອຸປະກອນເຕັກນິກ, ງົບປະມານຮັບໃຊ້ ແລະອື່ນໆ ເພື່ອກະກຽມຈັດຕັ້ງສະເຫຼີມສະຫຼອງ ວັນສ້າງຕັ້ງກໍາລັງປ້ອງກັນຄວາມສະຫງົບ ປະຊາຊົນ ຄົບຮອບ 60 ປີ ໃຫ້ບັນລຸຜົນຕາມຄາດໝາຍທີ່ວາງໄວ້ ເປັນຕົ້ນແມ່ນ:
ອະນຸກໍາມະການໂຄສະນາປາຖະກະຖາ ແລະ ດໍາເນີນຊີວິດການເມືອງ ແມ່ນໄດ້ຄົ້ນຄວ້າປັບປຸງ, ຮຽບຮຽງບັນດາເນື້ອໃນເອກະສານມູນເຊື້ອ 60 ປີ ຂອງ ກໍາລັງປ້ອງກັນຄວາມສະຫງົບ ປະຊາຊົນ ເພື່ອໂຄສະນາປາຖະກະຖາ.
ກະກຽມເອກະສານຕ່າງໆ ຮັບໃຊ້ໃຫ້ແກ່ບັ້ນດໍາເນີນຊີວິດ ການເມືອງ ຕິດພັນກັບ ການຕີລາຄາຄຸນນະພາບການກໍ່ສ້າງກົມກອງ – ຮາກຖານພັກ ປອດໃສ, ເຂັ້ມແຂງ, ໜັກແໜ້ນ ໃນທົ່ວກໍາລັງປ້ອງກັນຄວາມສະຫງົບ ປະຊາຊົນ.
- ໄດ້ຄົ້ນຄວ້າສ້າງແຜນການເຄື່ອນໄຫວພິທີການ – ຮັບແຂກ, ການກະກຽມ ແລະ ຈັດສະຖານທີ່ໂຮມຊຸມນຸມ, ສະຖານທີ່ງານລ້ຽງ, ຂຶ້ນແຜນເຊີນແຂກ ແລະ ພິທີການຕ້ອນຮັບແຂກ ທັງພາຍໃນ ແລະ ຕ່າງປະເທດ ທີ່ມາອວຍພອນ ແລະ ເຂົ້າຮ່ວມພິທີສະເຫຼີມສະຫຼອງວັນດັ່ງກ່າວ.
ພ້ອມກັນນີ້, ອະນຸກໍາມະການປ້ອງກັນ ໄດ້ຄົ້ນຄວ້າສ້າງແຜນການປ້ອງກັນ, ງົບປະມານຮັບໃຊ້ຂອງ ອະນຸກໍາມະການ ແລ້ວນໍາສະເໜີຄະນະ ເພື່ອໃຫ້ຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພຂອງສັງຄົມ ໃນໄລຍະປົກກະຕິ ແລະ ໄລຍະຈັດຕັ້ງສະເຫຼີມສະຫຼອງ ໃຫ້ມີຜົນສໍາເລັດຢ່າງຈົບງາມ.