ກົມສື່ສານ ກະຊວງ ປກສ ແລະ ບໍລິສັດ ເຕັກໂນໂລຊີສື່ສານລາວ ຈຳກັດ ໄດ້ຮ່ວມກັນປຶກສາຫາລືຄວາມເປັນໄປໄດ້ ໃນການຮ່ວມມື ໂຄງການອິນເຕີເນັດຮັບໃຊ້ພາຍໃນ ກະຊວງ ປກສ ຄັ້ງທີ I ຂຶ້ນໃນວັນທີ 1 ຕຸລາ 2019 ໂດຍມີ ພົຈວ ພິມພາ ສີໂພໄຊ ຫົວໜ້າກົມສື່ສານ, ທ່ານ ຢາງຢາງ ອຳນວຍການໃຫຍ່ ບໍລິສັດ ເຕັກໂນໂລຊີສື່ສານລາວ ຈຳກັດ ພ້ອມດ້ວຍພະນັກງານທີ່ກ່ຽວຂ້ອງ ຈາກທັງ 2 ພາກສ່ວນ ແລະ ກົມໃຫຍ່ພະລາທິການ ກະຊວງ ປກສ ເຂົ້າຮ່ວມ.

ກົມສື່ສານ ກະຊວງ ປກສ ແລະ ບໍລິສັດ ເຕັກໂນໂລຊີສື່ສານລາວ ຈຳກັດ
ກົມສື່ສານ ກະຊວງ ປກສ ແລະ ບໍລິສັດ ເຕັກໂນໂລຊີສື່ສານລາວ ຈຳກັດ

ໃນກອງປະຊຸມ, ໄດ້ມີການປຶກສາຫາລືຄວາມເປັນໄປໄດ້ດ້ານເສດຖະກິດ ແລະ ເຕັກນິກຂອງ ໂຄງການອິນເຕີເນັດຮັບໃຊ້ພາຍໃນ ກະຊວງ ປກສ ເປັນຕົ້ນແມ່ນ:

ຄາດໝາຍການສ້າງລະບົບເຄືອຂ່າຍອິນເຕີເນັດ ຈະຊ່ວຍອຳນວຍຄວາມສະດວກໃຫ້ລະບົບການສື່ສານພາຍໃນ ກະຊວງ ປກສ ມີຄວາມສະດວກຍິ່ງຂຶ້ນ ແລະ ກ່ຽວພັນເຖິງບັນດາກົມກອງ ໂຄງການທີ່ໄດ້ປະຕິບັດນຳໃຊ້ແລ້ວໃຫ້ມານຳໃຊ້ໄດ້ຮ່ວມກັນ ຫຼື ປ່ຽນແທນ.

ລະບົບດັ່ງກ່າວ ຈະເຂົ້າມາປ່ຽນແທນ ແລະ ແບ່ງເບົາພາລະການໃຊ້ຈ່າຍ ຄ່າອິນເຕີເນັດ-ສາຍສົ່ງທີ່ມີຄຸນນະພາບດີກວ່າເກົ່າ ພ້ອມທັງຮັບປະກັນວຽກງານຂອງ ປກສ ໄດ້ດີ ເພາະເປັນເຄືອຂ່າຍອິນເຕີເນັດທີ່ຮັບໃຊ້ພາຍໃນ ກະຊວງ ປກສ ເຊັ່ນ:

ລະບົບຄອມພິວເຕີ ຈະສາມາດນຳໃຊ້ຢ່າງເຕັມປະສິດທິພາບ, ສາມາດນຳໃຊ້ລະບົບໂທລະສັບໄອພີ, ສາມາດບໍລິຫານອິນເຕີເນັດ ( ເຄືອຂ່າຍສະເພາະພາຍໃນ ) ແລະ ບໍລິການອິນເຕີເນັດ ທີ່ສາມາດສ້າງລາຍຮັບໄດ້, ລະບົບສາມາດປ່ຽນແທນເຄືອຂ່າຍ ການນຳໃຊ້ສາຍສົ່ງ ເປັນຕົ້ນ ໂຄງການອີ-ໄອດີຄາດ, ໂຄງການຄຸ້ມຄອງກວດກາເຂົ້າ-ອອກເມືອງ, ສາຍສົ່ງອິນເຕີເນັດ ໂຄງການໂຈລະກຳທາງອິນເຕີເນັດ, ໂຄງການຕ້ານ ແລະ ສະກັດກັ້ນອັກຄີໄພ, ລະບົບກ້ອງວົງຈອນປິດ ໃນນະຄອນຫຼວງວຽງຈັນ ແລະ ລະບົບເຊື່ອມຕໍ່ພາຍໃນຂອງແຕ່ລະກົມກອງ.

ພາຍຫຼັງການປຶກສາຫາລືກັນໃນຄັ້ງນີ້, ທາງຄະນະຮັບຜິດຊອບ ຈະນຳຜົນຂອງການຫາລືກັນໄປນຳສະເໜີຕໍ່ຂັ້ນເທິງ ແລະ ຖ້າຫາກວ່າ ໂຄງການນີ້ ໄດ້ຮັບການອະນຸມັດສ້າງຂຶ້ນ ກໍຈະເປັນຜົນດີໃນການສາມາດສ້າງລາຍຮັບ ແລະ ເພີ່ມປະສິດທິພາບການບໍລິການປະຊາຊົນ ແລະ ບໍລິຫານວຽກງານສື່ສານຂໍ້ມູນຂ່າວສານ ລະບົບພາຍໃນ ກະຊວງ ປກສ ດີຂຶ້ນ.

- Advertisement -
Visual Composer Website Builder