ຕົ້ນເດືອນກັນຍາຜ່ານມາ, ເຈົ້າໜ້າທີ່ໜ່ວຍງານຕ້ານ ແລະ ສະກັດກັ້ນຢາເສບຕິດ ປກສ ເມືອງ ແລະ ແຂວງຜົ້ງສາລີ ຈັບຕົວເປົ້າໝາຍຊື້-ຂາຍຢາເສບຕິດ ຊື່ ທ້າວ ສີສະໄໝ ອາຍຸ 18 ປີ ຢູ່ບ້ານພະຍາສີ ເມືອງຜົ້ງສາລີ ພ້ອມຂອງກາງ ຢາບ້າ 139 ເມັດ ໄປສອບສວນຂະຫຍາຍຜົນ.
ເຈົ້າໜ້າທີ່ ປກສ ເມືອງຜົ້ງສາລີ ໃຫ້ຮູ້ວ່າ: ພາຍຫຼັງໄດ້ຮັບແຫຼ່ງຂ່າວວ່າ ຈະມີເປົ້າໝາຍເຄື່ອນໄຫວລັກລອບຊື້-ຂາຍຢາເສບຕິດຢູ່ເຂດເທດສະບານເມືອງ ຈຶ່ງຈັດກໍາລັງເຈົ້າໜ້າທີ່ວິຊາສະເພາະ ລົງເຄື່ອນໄຫວຕິດຕາມກຸ່ມເປົ້າ ໝາຍ. ຮອດວັນທີ 9 ກັນຍາ 2019, ກໍສາມາດກັກຕົວເປົ້າໝາຍຊື່ ທ້າວ ສີສະໄໝ ພ້ອມຂອງກາງຢາບ້າ 139 ເມັດ. ຜ່ານການສອບສວນ ຜູ້ກ່ຽວສາລະພາບວ່າ: ຢາບ້າຈໍານວນດັ່ງກ່າວ ແມ່ນໄດ້ຊື້ນໍາຄົນຮູ້ຈັກຢູ່ເຂດຫຼັກ 46 ເມືອງບຸນເໜືອ ເພື່ອນຳໄປເສບ ແລະ ຂາຍ; ນອກນີ້, ຍັງສາລະພາບຕື່ມອີກວ່າ: ໃນເດືອນສິງຫາ ຜ່ານມາ,ໄດ້ມີຄົນຮູ້ຈັກພາໄປຊື້ຢາບ້າມາເສບນໍາກັນ ຈໍານວນ 3 ຄັ້ງ. ແຕ່ບໍ່ຮູ້ວ່າ ໄດ້ຢາຈໍານວນເທົ່າໃດ ເພາະໃນການໄປຊື້ໃນແຕ່ລະຄັ້ງແມ່ນໝູ່ເປັນຄົນເຂົ້າໄປຊື້ ແລະ ແບ່ງໃຫ້ເສບ.
ປັດຈຸບັນ, ຄະດີດັ່ງກ່າວ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງຜົ້ງສາລີ ພວມສືບຕໍ່ດໍາເນີນການສອບສວນຂະຫຍາຍຜົນຫາຜູ້ທີ່ຖືກຊັດທອດໃນການພົວພັນຊື້ຢາເສບຕິດ ເພື່ອຈະໄດ້ຕິດຕາມຈັບຕົວໄປມາດໍາເນີນຄະດີຕາມກົດໝາຍ.