ປະທານກອງປະຊຸມໃຫຍ່ ໜ່ວຍພັກ ປກສ ເມືອງຜົ້ງສາລີ
ປະທານກອງປະຊຸມໃຫຍ່ ໜ່ວຍພັກ ປກສ ເມືອງຜົ້ງສາລີ

ໜ່ວຍພັກກອງບັນຊາການ ປກສ ເມືອງຜົ້ງສາລີ ໄດ້ຈັດກອງປະຊຸມໃຫຍ່ ຄັ້ງທີ X ຂຶ້ນ, ໃນອາທິດຜ່ານມາ, ເປັນປະທານໂດຍ ສະຫາຍ ພັທ ເຫຼັກ ວົງໄຊ ເລຂາໜ່ວຍພັກ ຫົວໜ້າກອງບັນຊາການ ປກສ ເມືອງຜົ້ງສາລີ; ມີ ສະຫາຍ ທອງສຸກ ເປົາສຸລີ ກໍາມະການພັກແຂວງ ເລຂາພັກເມືອງ ເຈົ້າເມືອງໆຜົ້ງສາລີ, ສະຫາຍ ພັຕ ນາງ ບົວພັນ ແສງນວນໄຊ ຮອງຫົວໜ້າຫ້ອງການເມືອງ ປກສ ແຂວງ, ມີບັນດາພາກສ່ວນທີ່ກ່ຽວຂ້ອງ ຕະຫຼອດຮອດສະມາຊິກພັກສົມບູນ-ສໍາຮອງ ປກສ ເມືອງ ເຂົ້າຮ່ວມ.

ສະຫາຍ ພັຕ ຈິດ ໄຊຍະວົງ ຮອງເລຂາໜ່ວຍພັກ ຮອງຫົວໜ້າກອງບັນຊາການ ປກສ ເມືອງຜົ້ງສາລີ ກ່າວວ່າ: ໃນຕະຫຼອດໄລຍະທີ່ຜ່ານມາ, ຄະນະໜ່ວຍພັກ ປກສ ເມືອງ ໄດ້ເອົາໃຈໃສ່ເຮັດວຽກງານສຶກສາອົບຮົມການເມືອງ-ແນວຄິດເປັນວຽກງານກົກ ແລະ ເປັນບັນຫາສຳ ຄັນໃນຂອດການຕັດສິນທຸກຂົງເຂດວຽກງານ; ໂດຍການຕິດຕາມ, ຄຸ້ມຄອງພະນັກງານ-ສະມາຊິກພັກ, ເສີມຂະຫຍາຍລະບອບການຮ່ວມຊີວິດຂອງແຕ່ລະອົງການຈັດຕັ້ງ ຄື: ຮ່ວມຊີວິດໜ່ວຍພັກອົງການຈັດຕັ້ງຊາວໜຸ່ມ-ແມ່ຍິງ ແລະ ປະຈໍາອາທິດຢ່າງເປັນປົກກະຕິ ໂດຍການນຳເອົາແນວທາງນະໂຍບາຍຂອງພັກ-ລະບຽບກົດໝາຍຂອງລັດ ກໍຄືທຸກມະຕິ-ຄໍາສັ່ງຂອງຂັ້ນເຖິງວາງອອກໃນແຕ່ລະໄລຍະ ແລະ ເອກະສານຕ່າງໆມາຈັດຕັ້ງ, ເຊື່ອມຊຶມໃຫ້ພະນັກງານ-ສະມາຊິກພັກຢ່າງເປັນປົກກະຕິ ແລະ ຕໍ່ເນື່ອງ; ພ້ອມນີ້, ກໍໄດ້ນຳພາເຄື່ອນໄຫວແກ້ໄຂວຽກງານວິຊາສະເພາະຕາມພາລະບົດບາດ, ສິດ ແລະ ຂອບເຂດຄວາມຮັບຜິດຊອບຂອງຕົນສະແດງອອກໄດ້ ກໍສ້າງມະຫາຊົນຜູ້ທີ່ມີຄວາມກ້າວໜ້າເຂົ້າເປັນສະມາຊິກພັກສໍາຮອງມີ 12 ສະຫາຍ ຍິງ 5 ສະຫາຍ ແລະ ສະມາຊິກພັກສໍາຮອງເລື່ອນຂຶ້ນເປັນສົມບູນມີ 11 ສະຫາຍ, ສົ່ງພະນັກງານ-ນັກຮົບໄປບໍາລຸງລະດັບວັດທະນະທໍາ 4 ສະຫາຍ, ໄປຮຽນບໍາລຸງວິຊາສະເພາະຢູ່ ສປ ຈີນ 2 ສະຫາຍ, ໄປຮຽນບໍາລຸງວິຊາສະເພາະຕໍ່ເນືອງ 4 ສະຫາຍ, ໄປ ຮຽນທິດສະດີການເມືອງການປົກຄອງ 5 ເດືອນ ມີ 1 ສະຫາຍ, ໄປຮຽນທິດສະດີການເມືອງການປົກຄອງຊັ້ນກາງ 3 ສະຫາຍ ຍິງ 1 ສະຫາຍ; ໄປຮຽນພາສາຫວຽດນາມ 9 ເດືອນ ມີ 1 ສະຫາຍ; ທົ່ວເມືອງຜົ້ງສາລີ ມີຄະດີເກີດຂຶ້ນທັງໝົດ 152 ລາຍ ມີ 208 ຄົນ ຍິງ 10 ຄົນ, ວຽກງານຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານໃນທົ່ວເມືອງ ມີ 8 ກຸ່ມບ້ານ, ມີ 69 ບ້ານ ປະກອບເອກະສານແຕ່ງດອງຖືກ ຕ້ອງແລ້ວ ມີ 12 ຄົນ ບໍ່ຖືກຕ້ອງຍັງມີ 8 ຄົນ.

ໃນກອງປະຊຸມຍັງໄດ້ປ່ອນບັດຄັດເລືອກເອົາຄະນະ ໜ່ວຍພັກ ຊຸດໃໝ່, ໃນນີ້ ມີຜູ້ສະໝັກ 7 ສະຫາຍ ເລືອກເອົາ 5 ສະຫາຍ ແລະ ໄດ້ຕົກລົງເຫັນດີເປັນເອກະພາບເລືອກເອົາ ສະຫາຍ ພັທ ເຫຼັກ ວົງໄຊ ເປັນເລຂາໜ່ວຍພັກຊຸດໃໝ່; ເລືອກເອົາ ສະຫາຍ ພັຕ ຈິດ ໄຊຍະວົງ ເປັນ ຮອງເລຂາ; ເລືອກເອົາສະຫາຍ ພັທ ເສັດ ອິນທະວົງ ເປັນຄະນະເລືອກເອົາສະຫາຍ ພັຕ ບຸນຕາ ສົມພູທອງ ເປັນຄະນະ ແລະ ເລືອກເອົາ ສະຫາຍ ພັທ ສີໄຊຫຼ້າ ເປັນຄະນະ.

ໃນໂອກາດດັ່ງກ່າວ, ສະຫາຍ ທອງ ສຸກ ເປົາສຸລີ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະພັກຊຸດເກົ່າ ແລະ ສະມາຊິກພັກ ປກສ ເມືອງ ທີ່ຍາດມາໄດ້ໃນຕະຫຼອດໄລຍະທີ່ຜ່ານມາ ແລະ ຮຽກຮ້ອງມາຍັງຄະນະໜ່ວຍພັກຊຸດໃໝ່ ຈົ່ງສືບຕໍ່ເພີ່ມທະວີສຶກສາອົບຮົມທາງດ້ານ ການເມືອງ-ແນວຄິດໃຫ້ເຂັ້ມແຂງກ່ວາເກົ່າ; ມີຄວາມຈົງຮັກພັກດີຕໍ່ພັກ, ຍົກສູງຄຸນທາດການເມືອງ, ຄຸນສົມບັດ-ສິນທໍາປະຕິວັດ, ປັບປຸງແບບແຜນການນໍາພາຕາມຫຼັກການລວມສູນປະຊາທິປະໄຕ, ຕົກລົງເປັນໝູ່ຄະນະ, ມີສະຕິລະວັງຕົວຕໍ່ທຸກກົນອຸບາຍຫັນປ່ຽນໂດຍສັນຕິຂອງພວກສັດຕູ ແລະ ກຸ່ມຄົນບໍ່ດີ, ປະຕິບັດໜ້າທີ່ອັນໜັກໜ່ວງຂອງອົງຄະນະພັກ ກອງບັນຊາການມອບໝາຍໃຫ້ປະສົບຜົນສໍາເລັດ ແລະ ມີປະສິດທິພາບສູງ ເພື່ອປັບປຸງໜ່ວຍພັກຂອງຕົນໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ.

- Advertisement -
Visual Composer Website Builder