ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ນຳເອົາສຳນວນຄະດີອາຍາ 2 ເລື່ອງ ລວມມີຈໍາເລີຍ 2 ຄົນ ຂຶ້ນພິ ຈາລະນາຄົ້ນຄວ້າຕາມຂໍ້ກ່າວຫາ ແລະ ສະຖານການກະທຳຜິດຂອງພວກຈໍາເລີຍ ໃນກາງເດືອນຕຸລານີ້. ຜ່ານການວິນິດໄສຂອງສານຢ່າງລະອຽດຄົບຖ້ວນ, ຮອບດ້ານ ແລະ ພາວະວິໄສແລ້ວ ຈຶ່ງລົງໂທດຕັດອິດສະຫຼະພາບຜູ້ລະ 5 ປີ ປັບໃໝຜູ້ລະ 10.000.000 ກີບ.
ເລື່ອງທີ່ 1. ຈໍາເລີຍຊື່ ທ້າວ ສຸພັນ ອາຍຸ 29 ປີ ຢູ່ບ້ານນາຊາຍເໜືອ ເມືອງນາຊາຍທອງ ໃນສຳນວນຄະດີຈຳ ເລີຍ ສາລະພາບວ່າ: ໄດ້ເລີ່ມເສບຢາບ້າມາ ແຕ່ປີ 2015 ໂດຍຊື້ນໍາ ທ້າວ ເລ້ ອາ ຍຸປະມານ 30 ປີ. ນອກຈາກນີ້, ຍັງໄດ້ຊື້ນຳທ້າວ ໂບ້ ອາຍຸປະມານ 32 ປີ ທັງ 2 ຄົນ ເປັນຄົນບ້ານດຽວກັນ ຊື້ໄປເສບຄັ້ງລະ 4-5 ເມັດ. ມາໃນເດືອນພະຈິກ 2018, ຈຳເລີຍໄດ້ເລີ່ມເຄື່ອນໄຫວຂາຍຢາເສບຕິດ, ເຊິ່ງຢາບ້າທີ່ເອົາໄປຂາຍ ແມ່ນຊື້ ທ້າວ ລີ ອາຍຸປະມານ 33 ປີ ຢູ່ບ້ານຫົວຊ້າງ ເມືອງນາຊາຍທອງ ຄັ້ງລະ 1 ຖົງ ເທົ່າກັບ 200 ເມັດ, ເມື່ອໄດ້ຢາບ້າມາແລ້ວ ກໍເອົາຢາບ້າໄປຂາຍໃຫ້ກຸ່ມມົ້ວສຸມ ແລະ ຂາຍໃຫ້ກັບ ທ້າວ ແສນ ອາຍຸປະມານ 31 ປີ, ທ້າວ ປຸ້ຍ ອາຍຸປະມານ 35 ປີ, ທ້າວ ໂທ ອາຍຸ ປະມານ 30 ປີ ແລະ ໄວ້ລຸ້ນທົ່ວໄປ ບໍ່ຮູ້ຊື້ຢູ່ພາຍໃນບ້ານ, ຂາຍຄັ້ງລະ 10-50 ເມັດ. ມາວັນທີ 23 ມັງກອນ 2019, ເວລາປະມານ 8:00 ໂມງ ຈຳເລີຍໄດ້ ຊື້ຢາບ້ານໍາ ທ້າວ ລີ ຈໍານວນ 1 ຖົງ ແລ້ວເອົາໄປຂາຍໃຫ້ ທ້າວ ແສນ ຈໍານວນ 40 ເມັດ ແລະ ເສບຈໍານວນ 3 ເມັດ ຍັງເຫຼືອຢາບ້າ 157 ເມັດ. ມາວັນ ທີ 24 ມັງກອນ, ຈໍາເລີຍ ຖືກເຈົ້າໜ້າທີ່ ກັກຕົວພ້ອມຂອງກາງຢາບ້າຈໍານວນດັ່ງກ່າວໄປດໍາເນີນຄະດີ.
ເລື່ອງທີ່ 2. ຈໍາເລີຍ ຊື່ ທ້າວ ນວນຕາ ຫຼື ຕາ ອາຍຸ 49 ປີ ຢູ່ບ້ານນາຊາຍທອງເໜືອ ເມືອງນາຊາຍທອງ ໂດຍ ເນື້ອໃນຄະດີຂອງ ທ້າວ ນວນຕາ ແມ່ນເລີ່ມເສບຢາເສບຕິດປະເພດຢາບ້າມາ ແຕ່ເດືອນສິງຫາ 2018 ຊື້ຈາກ ທ້າວ ລີ ທີ່ຈຳເລີຍເຄີຍໄປຊື້ມາຂາຍ, ຊື້ຄັ້ງລະ 5-6 ເມັດ ມາເດືອນພະຈິກ 2018 ທ້າວ ນວນຕາ ໄດ້ເລີ່ມຂາຍຢາບ້າຢາບ້າ ທີ່ເອົາໄປຂາຍແມ່ນໄດ້ຊື້ຈາກ ທ້າວ ລີ ຊື້ຄັ້ງລະ 20-100 ເມັດ ແລ້ວກໍເອົາໄປຂາຍຕໍ່ໃຫ້ ທ້າວ ໂຂງ ຄົນບ້ານ ດຽວກັນ, ຂາຍໃຫ້ທ້າວ ຂຽດ, ທ້າວ ຫຼ້າ ທັງ 2 ຢູ່ບ້ານດ່ານຊີ ແລະ ຂາຍໃຫ້ ໄວລຸ້ນທີ່ມົ້ວສຸມເສບຢາ ມາວັນທີ 24 ມັງກອນ 2019 ທ້າວ ນວນຕາ ໄດ້ຊື້ຢາບ້ານໍາ ທ້າວ ລີ ຈຳນວນ 100 ເມັດ ແລ້ວນຳໄປເສບ 2 ເມັດ. ຈາກນັ້ນ, ຖືກເຈົ້າໜ້າທີ່ຕໍາຫຼວດ ເຂົ້າຈັບຕົວ ແລະ ກວດຄົ້ນຕົວພົບຂອງກາງຢາບ້າ 98 ເມັດ ໄປດຳເນີນຄະດີ.
ການກະທຳຂອງພວກຈຳເລີຍທັງ 2 ເປັນການກະທຳຜິດທາງອາຍາ ໃນສະຖານການຄ້າຂາຍຢາເສບຕິດທີ່ກົດ ໝາຍລະບຸໄວ້ວ່າ: ບຸກຄົນຜູ້ໃດຫາກຜະລິດ, ປຸງແຕ່ງ ຫຼື ມີໄວ້ໃນຄອບຄອງ, ຄ້າຂາຍ, ຈໍາໜ່າຍ, ນໍາເຂົ້າ-ສົ່ງອອກ, ຂົນສົ່ງນໍາຢາອີ, ຢາບ້າ, ຢາໄອສ໌ (Ice) ຫຼື ວັດຖຸອອກລິດຕໍ່ຈິດປະສາດຜ່ານ ສປປ ລາວ ເກີນກວ່າ 0,3-100 ກຼາມ ຈະຖືກລົງໂທດຕັດອິດສະລະພາບ 5-10 ປີ ຈະຖືກປັບໃໝແຕ່ 10.000. 000-100.000.000 ກີບ ແລະ ຈະຖືກຮີບຊັບຕາມທີ່ໄດ້ກໍານົດໄວ້ ໃນມາດຕາ 34 ຂອງກົດໝາຍອາຍາ.
