ກອງປະຊຸມສະຫຼຸບ ວຽກງານປ້ອງກັນຄວາມສະຫງົບ ປະຈຳປີ 2019 ແລະ ທິດທາງແຜນການວຽກງານຈຸດສຸມ ປີ 2020 ໄດ້ຈັດຂຶ້ນໃນລະຫວ່າງວັນທີ 7-8 ມັງກອນ 2020, ເປັນປະທານໂດຍ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງ ປກສ, ມີບັນດາຮອງລັດຖະມົນຕີກະຊວງ ປກສ, ບັນດາຄະນະບັນຊາກົມໃຫຍ່, ຫ້ອງວ່າການ ກະຊວງ, ກົມ, ກອງບັນຊາການ, 2 ວິທະຍາຄານ, 2 ບໍລິສັດ, ຫົວໜ້າຫ້ອງການ ປກຊ-ປກສ ສູນກາງ, ປກສ ນະຄອນຫຼວງວຽງຈັນ, ປກສ ແຂວງ ທົ່ວປະເທດ ແລະ ພະນັກງານຫຼັກແຫຼ່ງຂອງ ກຳລັງ ປກສ ເຂົ້າຮ່ວມ.
ໃນກອງປະຊຸມ, ພົຈວ ສົມວັນ ສາຍລ້ອງພາ ຫົວໜ້າຫ້ອງວ່າການ ກະຊວງ ປກສ ໄດ້ຜ່ານຮ່າງບົດສະຫຼຸບ ການເຄື່ອນໄຫວວຽກງານປ້ອງກັນຄວາມສະຫງົບ ປະຈຳປີ 2019 ແລະ ທິດທາງແຜນການວຽກງານຈຸດສຸມ ປີ 2020 ໃຫ້ຮູ້ວ່າ:
ໃນໄລຍະປີ 2019, ກຳລັງປ້ອງກັນຄວາມສະຫງົບ ບັນດາເຫຼົ່າວິຊາສະເພາະ ໃນຂອບເຂດທົ່ວປະເທດ ໄດ້ເອົາໃຈໃສ່ປະຕິບັດວຽກງານວິຊາສະເພາະ ຕາມຂົງເຂດຄວາມຮັບຜິດຊອບ ໂດຍສະເພາະແມ່ນ ວຽກງານປົກປັກຮັກສາຄວາມເປັນລະບຽບຮຽບຮ້ອຍ ທາງດ້ານສັງຄົມ ໄດ້ສຸມໃສ່ແກ້ໄຂປະກົດການຫຍໍ້ທໍ້ທາງສັງຄົມ ໂດຍຈັດຕັ້ງຜັນຂະຫຍາຍຄຳສັ່ງຕ່າງໆທີ່ຂັ້ນເທິງວາງອອກ ເຊິ່ງສາມາດຮັບປະກັນໃຫ້ສັງຄົມມີຄວາມສະຫງົບໂດຍພື້ນຖານ.
ແຕ່ວ່າ ຍັງປັດສະຈາກບໍ່ໄດ້ ບັນຫາປະກົດການຫຍໍ້ທໍ້ ທີ່ເກີດຂຶ້ນ ເຊິ່ງສະແດງອອກປີ 2019 ຄື:
- ມີຄະດີອາຍາທົ່ວປະເທດ ເກີດຂຶ້ນທັງໝົດ 7.657 ເລື່ອງ (ບໍ່ນັບອຸບັດຕິເຫດ ແລະ ອັກຄີໄພ), ມ້າງໄດ້ 5.554 ເລື່ອງ, ຜູ້ຖືກຫາ 8.364 ຄົນ ຍິງ 1.094 ຄົນ, ຄົນຕ່າງປະເທດ 162 ຄົນ (ທຽບໃສ່ປີ 2018 ຄະດີເພີ່ມຂຶ້ນ 1.292 ເລື່ອງ),
- ຄະດີທີ່ເພີ່ມຂຶ້ນຫຼາຍ ເຊັ່ນ: ບັນຫາຄ້າຂາຍຢາເສບຕິດ, ຄາດຕະກຳ, ລັກພາຕົວ, ປຸ້ນຊັບ-ຊີງຊັບ, ລັກຊັບ, ນຳໃຊ້ບັດ ATM ປອມ ແລະ ບັນຫາອື່ນໆ, ເຊິ່ງຫຼາຍກວ່າໝູ່ແມ່ນ: ບັນຫາຢາເສບຕິດ 3.957 ເລື່ອງ, ລັກຊັບພົນລະເມືອງ 2.146 ເລື່ອງ (ລົດຈັກເສຍ 1.819, ລົດໃຫຍ່ 11 ຄັນ).
+ ສໍາລັບທິດທາງປີ 2020
ກະຊວງ ປກສ ໄດ້ວາງທິດທາງແຜນການ ຈະສຸມໃສ່ແກ້ໄຂປະກົດການຫຍໍ້ທໍ້ທາງສັງຄົມ, ເອົາໃຈໃສ່ຈັັດຕັ້ງຜັນຂະຫຍາຍ ຄຳສັ່ງເລກທີ 27/ນຍ, ຄຳສັ່ງເລກທີ 22/ຄລສພ, ຄຳສັ່ງເລກທີ 15/ນຍ ແລະ ຄຳສັ່ງເລກທີ 1470/ປກສ ແລະ ບັນດານິຕິກຳອື່ນໆທີ່ກ່ຽວຂ້ອງ ໃຫ້ມີປະສິດທິຜົນ ແລະ ເປັນຮູບປະທຳຫຼາຍຂຶ້ນ ໂດຍອີງໃສ່ກຳລັງແຮງທົ່ວປວງຊົນ ເປັນຕົ້ນແມ່ນ:
ກຳແໜ້ນເປົ້າໝາຍທີ່ເປັນຫົວໂປ່ໂຕການ, ກຸ່ມແກ້ງ, ເຄືອຂ່າຍ ໃຫ້ຖືກຕ້ອງຊັດເຈນ ແລະ ໃຊ້ມາດຕະການທີ່ເໝາະສົມ ເພື່ອສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ໃຫ້ຫຼຸດລົງກວ່າປີຜ່ານມາ.
ໃນກອງປະຊຸມ, ບັນດາທ່ານທີ່ເຂົ້າຮ່ວມ ໄດ້ຍົກສູງຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄຳຄິດເຫັນໃສ່ຮ່າງບົດສະຫຼຸບ ເພື່ອສ້າງຄວາມເປັນເອກະພາບ, ເພີ່ມຄວາມລະອຽດຊັດເຈນ ຕໍ່ບັນດາວຽກງານຈຸດສຸມ ທີ່ບັນດາເຫຼົ່າວິຊາສະເພາະ ຈະພ້ອມກັນນຳໄປຈັດຕັ້ງຜັນຂະຫຍາຍເຂົ້າໃນວຽກງານປ້ອງກັນຄວາມສະຫງົບ ໃຫ້ປະສົບຜົນສຳເລັດຂຶ້ນກວ່າເກົ່າ.