ພິທີມອບ-ຮັບໜ້າທີ່ ຫົວໜ້າກົມສື່ມວນຊົນ ປ້ອງກັນຄວາມສະຫງົບ ກົມໃຫຍ່ການເມືອງ ກະຊວງ ປກສ ລະຫວ່າງ ພັອ ສີພັນດອນ ຫວ່າງບົວຊົງ ຫົວໜ້າກົມສື່ມວນຊົນ ປກສ (ຜູ້ເກົ່າ) ທີ່ໄດ້ລໍຖ້າພັກຜ່ອນ-ຮັບເບ້ຍບຳນານ ແລະ ພັອ ເພີນຄຳ ແສງດາລາ ຫົວໜ້າກົມສື່ມວນຊົນ ປກສ (ຜູ້ໃໝ່) ໄດ້ຈັດຂຶ້ນວັນທີ 9 ມັງກອນ 2020, ໂດຍມີ ພົຈວ ອຸ່ນຫຼ້າ ວົງພະຈັນ ຮອງຫົວໜ້າກົມໃຫຍ່ການເມືອງ ປກສ ພ້ອມດ້ວຍພະນັກງານທີ່ກ່ຽວຂ້ອງ ເຂົ້າຮ່ວມ.
ໃນພິທີ, ພັອ ສີພັນດອນ ຫວ່າງບົວຊົງ ໄດ້ລາຍງານການຈັດຕັ້ງນຳພາ-ບັນຊາວຽກງານ ຕະຫຼອດໄລຍະ 2009-2019 ຜ່ານມາ ເຊິ່ງອັນພົ້ນເດັ່ນແມ່ນ:
ວຽກງານວິຊາສະເພາະ ໄດ້ເປັນເຈົ້າການໃນການອຳນວຍຄວາມສະດວກ ໃຫ້ແກ່ວຽກງານສື່ມວນຊົນ ເຄື່ອນໄຫວຕາມໜ້າທີ່ວິຊາສະເພາະຂອງຕົນ ດ້ວຍຄວາມຮັບຜິດຊອບສູງ, ສາມາດເຮັດໃຫ້ຂົງເຂດສື່ມວນຊົນ ປກສ ກໍຄື ໂທລະພາບ, ວິທະຍຸ, ໜັງສືພິມ ແລະ ວາລະສານ ປກສ ໄດ້ຮັບຄວາມນິຍົມຈາກສັງຄົມ ນັບມື້ຫຼາຍຂຶ້ນ.
ຈາກນັ້ນ, ພັອ ສີພັນດອນ ຫວ່າງບົວຊົງ ແລະ ພັອ ເພີນຄຳ ແສງດາລາ ກໍໄດ້ເຊັນບົດບັນທຶກມອບ-ຮັບໜ້າທີ່ ຢ່າງເປັນທາງການ, ໂດຍມອບໜ້າທີ່ໃຫ້ ທ່ານຫົວໜ້າກົມສື່ມວນຊົນ ປກສ ຜູ້ໃໝ່ ສືບຕໍ່ນຳພາ-ບັນຊາວຽກງານຂົງເຂດສື່ມວນຊົນ ປກສ ໃຫ້ໄດ້ຮັບການພັດທະນາຍິ່ງຂຶ້ນ; ໂດຍສະເພາະແມ່ນ ສືບຕໍ່ເອົາໃຈໃສ່ຊີ້ນຳປັບປຸງ, ຊຸກຍູ້ອົງການຈັດຕັ້ງມະຫາຊົນ ໃຫ້ເຂັ້ມແຂງ, ມີຄວາມສາມາດເປັນກຳລັງແຮງຊ່ວຍ ຄະນະພັກ-ຄະນະບັນຊາ, ເປັນແບບຢ່າງນຳໜ້າເຄື່ອນໄຫວທຸກໜ້າທີ່ວຽກງານ ທີ່ການຈັດຕັ້ງມອບໝາຍໃຫ້, ສ້າງເງື່ອນໄຂອຳນວຍຄວາມສະດວກ ໃຫ້ແກ່ອົງການຈັດຕັ້ງມະຫາຊົນ ເຄື່ອນໄຫວຕາມພາລະບົດບາດ ແລະ ມີໂອກາດເຂົ້າຮ່ວມ ໃນທຸກຂົງເຂດວຽກງານ.
ໂອກາດນີ້, ພົຈວ ອຸ່ນຫຼ້າ ວົງພະຈັນ ໄດ້ຍ້ອງຍໍຊົມເຊີຍຕໍ່ ທ່ານຫົວໜ້າກົມສື່ມວນຊົນ ປກສ ຜູ້ເກົ່າ ທີ່ສຸມສະຕິປັນຍາໃນການຊີ້ນຳ-ບັນຊາວຽກງານ ຕະຫຼອດໄລຍະຜ່ານມາ, ພ້ອມທັງເນັ້ນໃຫ້ ທ່ານຫົວໜ້າກົມສື່ມວນຊົນ ຜູ້ໃໝ່ ຈົ່ງເພີ່ມທະວີຄວາມຮູ້-ຄວາມສາມາດເຂົ້າໃນທຸກຂົງເຂດວຽກງານ ເພື່ອຮັບປະກັນໃຫ້ວຽກງານສື່ມວນຊົນ ໄດ້ຮັບການພັດທະນາຍິ່ງຂຶ້ນ.