ໃນວັນທີ 23 ມັງກອນ ທີ່ຜ່ານມານີ້, ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ດ່ານສາກົນ ປາກຊັນ ແຂວງບໍລິຄໍາໄຊ ໄດ້ມອບ-ສົ່ງຕົວນັກໂທດ ກັບຄືນປະເທດຊື່ ທ້າວ ສະຫະໄຊ ຢ່າງ ອາຍຸ 45 ປີ ເຊື້ອຊາດ ແລະ ສັນຊາດໄທ ຢູ່ບ້ານເຂດນ້ອຍ ເມືອງເຂົາຄໍ້ ແຂວງເພັດສະບູນ ປະເທດໄທ ທີ່ສົມຮູ້ຮ່ວມຄິດ ຫຼື ປິດບັງການກະທຳຜິດ ຄະດີຂົນສົ່ງຢາເສບຕິດ ປະເພດຢາໄອສ໌ ແລະ ເຮໂຣອິນ, ເຊິ່ງຜູ້ກ່ຽວໄດ້ຮັບການປະຕິບັດໂທດມາແລ້ວຄົບກໍານົດເວລາຕາມຄໍາຕັດສິນຂອງສານ ກໍຄືກົດໝາຍຂອງ ສປປ ລາວ.
ກ່າວມອບໂດຍ ພັທ ນາງ ສີສົມ ພອນ ຈະເລີນລາດ ຫົວໜ້າດ່ານຕໍາຫຼວດກວດຄົນເຂົ້າ-ອອກເມືອງ ດ່ານສາກົນ ປາກຊັນ, ກ່າວຮັບ ທ່ານ ພັນຕໍາຫຼວດຕີ ທະນະພົນ ໂພທິດາ ສາລະວັດ ດ່ານສາກົນບຶງການ, ມີເຈົ້າໜ້າທີ່ທັງ 2 ຝ່າຍ ເຂົ້າຮ່ວມເປັນສັກຂີພະຍານ.
ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ດ່ານສາກົນປາກຊັນ ໄດ້ໃຫ້ຮູ້ວ່າ: ທ້າວ ສະຫະໄຊ ຢ່າງ ຖືກກັກ
ຕົວ ໃນວັນທີ 23 ກັນຍາ 2018, ໃນສະຖານຄວາມຜິດ ສົມຮູ້ຮ່ວມຄິດ ຫຼື ປິດບັງການກະທຳຜິດການຂົນສົ່ງຢາເສບຕິດປະເພດຢາໄອສ໌ ແລະ ເຮໂຣອິນ ໂດຍຖືກສານຕັດສິນຕັດອິດສະລະພາບ ຈໍາຄຸກ 1 ປີ 4 ເດືອນ ໂດຍໄດ້ຮັບການປະຕິບັດໂທດຢູ່ຄ້າຍຄຸມຂັງ-ດັດສ້າງ ປກສ ແຂວງ ບໍລິຄໍາໄຊ, ເຊິ່ງຜູ້ກ່ຽວໄດ້ຮັບການປະຕິບັດໂທດຄົບກໍາ ນົດເວລາຕາມຄໍາຕັດສິນຂອງສານ ກໍຄື ກົດໝາຍ ຂອງ ສປປ ລາວ ແລະ ອີງຕາມຄຳສັ່ງປ່ອຍຕົວ ສະບັບເລກທີ 0381/ປກສ ຂ ລົງວັນທີ 20 ມັງກອນ 2020.
ດັ່ງນັ້ນ; ຈຶ່ງໄດ້ມອບ-ສົ່ງຜູ້ກ່ຽວໃຫ້ເຈົ້າໜ້າທີ່ໄທ ເພື່ອສົ່ງກັບຄືນສູ່ຄອບຄົວ, ຍາດພີ່ນ້ອງ ແລະ ອໍານາດການປົກຄອງທ້ອງຖິ່ນສືບຕໍ່ສຶກສາອົບຮົມ, ຊ່ວຍເຫຼືອກໍ່ສ້າງຜູ້ກ່ຽວໃຫ້ກາຍເປັນພົນລະເມືອງດີ ແລະ ບໍ່ໄປກະທໍາຜິດຊ້ຳອີກ.
