ກອງປະຊຸມໃຫ່ຍຄັ້ງທີ III ຂອງ ອົງຄະນະພັກ ກອງບັນຊາການ ປກສ ແຂວງຫຼວງນໍ້າທາ ຈັດຂຶ້ນໃນວັນທີ 27 ມັງກອນ 2020, ເປັນປະທານໂດຍ ສະຫາຍ ພັອ ສົມໄຊ ຈັນທະວົງ ກຳມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການ ປກສ ແຂວງຫຼວງນໍ້າທາ; ເຂົ້າຮ່ວມມີ ສະຫາຍ ເພັດຖາວອນ ພິລາວັນ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຫຼວງນໍ້າທາ, ມີຕາງໜ້າຈາກກະຊວງປ້ອງກັນຄວາມສະຫງົບ, ການນຳຂອງແຂວງ; ແຂກຮັບເຊີນຈາກອ້ອມຂ້າງແຂວງ, ປກສ ເມືອງ, ປກສ ເຂດ, ລປພ, ກອງກໍ່ສ້າງຮາກຖານ 914, ພະນັກງານອາວຸໂສບໍານານ, ອະດີດການນຳຂອງກອງບັນຊາການ, ຜູ້ເເທນກອງປະຊຸມໃຫ່ຍເຂົ້າຮ່ວມທັງໝົດ 110 ສະຫາຍ ຍິງ 11 ສະຫາຍ ເຂົ້າຮ່ວມ.
ສະຫາຍ ພັອ ສົມໄຊ ຈັນທະວົງ ໄດ້ຂຶ້ນກ່າວເປີດກອງປະຊຸມ ວ່າ: ໃນກອງປະຊຸມຄັ້ງນີ້, ໄດ້ພ້ອມກັນຕີລາຄາ, ປະເມີນຜົນກ່ຽວກັບຈຸດດີ-ຜົນງານໄຊຊະນະແຫ່ງການນຳພາຂອງຄະນະພັກ ໃນໄລຍະ 5 ປີຜ່ານມາ ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຄົງຄ້າງເພື່ອພ້ອມກັນດັດແປງແກ້ໄຂໃຫ້ຂາດຕົວ; ຄົ້ນຄ້ວາປຶກສາຫາລື ແລະ ເອກະພາບຮັບຮອງເອົາທິດທາງໜ້າທີ່ແຫ່ງການສືບຕໍ່ຊີ້ນຳ-ນຳພາແຕ່ນີ້ຮອດປີ 2024 ດ້ວຍການຕີລາຄາສະພາບການໃນແງ່ປ້ອງກັນຄວາມສະຫງົບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະ ບຽບຮຽບຮ້ອຍ ແລະ ສະຫງົບປອດໄພໃນລະດັບດີ ເພື່ອໃຫ້ປະຊາຊົນສ້າງສາ ທຳມາຫາກິນ ແລະ ພັດທະນາບ້ານເມືອງ.
ກອງປະຊຸມດັ່ງກ່າວ, ຈະໄດ້ດໍາເນີນການເລືອກຕັ້ງເອົາຄະນະພັກຊຸດໃໝ່ ແລະ ເລືອກຕັ້ງເອົາຜູ້ແທນໄປເຂົ້າຮ່ວມກອງປະຊຸມໃຫ່ຍ ຄັ້ງທີ VIII ຂອງຄະນະບໍລິຫານງານພັກແຂວງ ໃຫ້ໄດ້ຕາມມາດຖານເງື່ອນໄຂ ເພື່ອຮັບປະກັນໃຫ້ ແກ່ການຊີ້ນຳ-ນໍາພາໃນຂົງເຂດປ້ອງກັນຄວາມສະຫງົບໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ ໂດຍມີການນໍາພາຂອງພັກ.