ທ້າວ ວິໄລສັກ ຫຼື ເລ້ ອາຍຸ 44 ປີ ເຄີຍຖືກສານຕັດສິນ ຈຳຄຸກ 5 ປີ 6 ເດືອນ ໃນຄະດີປຸ້ນຊັບພົນລະເມືອງ ພາຍຫຼັງພົ້ນໂທດອອກມາປີ 2018. ຈາກນັ້ນ, ໄດ້ສ້າງຄອບຄົວກັບ ນາງ ອໍລະຍາ ຫຼື ມັອດດີ້ ອາຍຸ 24 ປີ ແລ້ວພາກັນໄປເຊົ່າຫ້ອງຢູ່ບ້ານໂນນສະຫວັນ ເມືອງໄຊເສດຖາ ນະຄອນຫຼວງວຽງຈັນ ຢູ່ກິນມາໄລຍະໜຶ່ງ ໄດ້ພາກັນລັກລອບເຄື່ອນໄຫວຄ້າຂາຍຢາເສບຕິດ ແລະ ຖືກເຈົ້າໜ້າທີ່ ປກສ ເມືອງຫາດຊາຍຟອງ ຈັບຕົວຢູ່ເສັ້ນທາງເຂດບ້ານນາໄຫ. ກ່ອນເຂົ້າກວດຄົ້ນຫ້ອງເຊົ່າພົບຢາບ້າ 700 ກວ່າ ເມັດ ແລະ ຢາໄອສ໌ 1 ຖົງນ້ອຍ.

ພັຕ ເໝົາ ໄຊຍະສານ ຫົວໜ້າໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງຫາດຊາຍຟອງ ໄດ້ເປີດ ເຜີຍການແກ້ໄຂຄະດີດັ່ງກ່າວນີ້ ໃນອາທິດຜ່ານມາວ່າ: ເບື້ອງຕົ້ນແມ່ນໄດ້ຮັບລາຍງານຈາກແຫຼ່ງຂ່າວວ່າ ມີຜົວ-ເມຍຄູ່ໜຶ່ງໄດ້ເອົາຢາບ້າໄປຂາຍໃຫ້ພວກໄວລຸ້ນມົ້ວສຸມຢາເສບຕິດ ຢູ່ເຂດເມືອງຫາດຊາຍຟອງ ເປັນປະຈໍາ ຈຶ່ງຈັດກຳລັງຕໍາຫຼວດວິຊາສະເພາະຕິດຕາມເປົ້າໝາຍ. ມາຮອດເວລາປະມານ 2:00 ໂມງຂອງວັນທີ 19 ກຸມພາ 2020, ພົບເປົ້າໝາຍຂັບຂີ່ລົດຈັກເວບຮ້ອຍ ສີໝາກຄໍ້ ເລກທະບຽນ ຈກ 9289 ກໍາແພງນະຄອນ ຊ້ອນທ້າຍກັນໄປຕາມເສັ້ນທາງບ້ານນາໄຫ ຈຶ່ງເຂົ້າຈັບກຸມພ້ອມກວດຄົ້ນພົບຂອງກາງຢາບ້າ 367 ເມັດ ແລະ ຢາໄອສ໌
1 ຖົງນ້ອຍ. ຈາກນັ້ນ, ກໍໄດ້ສືບຕໍ່ເຂົ້າກວດຄົ້ນບ່ອນພັກເຊົາຢູ່ຫ້ອງເຊົ່າບ້ານໂນນສະຫວັນ ພົບເຫັນຢາບ້າອີກຈຳນວນ 400 ເມັດ, ຊຸກເຊື່ອງຢູ່ຫຼັງຕູ້ເຢັນ ແລະ ອີກ 1 ເມັດ ຢູ່ບ່ອນນອນຂອງພວກກ່ຽວ ລວມຂອງກາງທັງໝົດ 768 ເມັດ ແລະ ຢາໄອສ໌ 1 ຖົງນ້ອຍ.

ຜ່ານການສອບສວນ ພວກກ່ຽວຮັບສາລະພາບວ່າ: ໄດ້ຮ່ວມກັນເສບ ແລະ ຄ້າຂາຍຢາເສບຕິດ ມາແຕ່ຕົ້ນເດືອນ
ມັງກອນ 2020 ລວມ 4 ຄັ້ງ, ເຊິ່ງແຕ່ລະຄັ້ງແມ່ນຈະໂທສັ່ງຊື້ ແລ້ວມີຄົນເອົາມາສົ່ງໃຫ້ຢູ່ຫ້ອງເຊົ່າ ໂດຍສັ່ງຊື້ນຳຊາຍ 3 ຄົນ, ຄົນໜຶ່ງຢູ່ບ້ານຊໍາເຄ້, ຄົນທີສອງຢູ່ບ້ານທາດຫຼວງເໜືອ ເມືອງໄຊເສດຖາ ແລະ ຄົນທີ່ສາມຢູ່ບ້ານວັດໄຕ ເມືອງສີໂຄດຕະບອງ ເມື່ອໄດ້ຢາມາແລ້ວ ກໍເອົາມາປັນກັນເສບ ແລະ ເອົາໄປຂາຍໃຫ້ຜູ້ທີ່ຕ້ອງການຢູ່ຕາມຮ້ານເກມພາຍໃນເຂດໃກ້ຄຽງ ແລະ ກ່ອນຖືກຈັບທັງສອງຜົວ-ເມຍ ໄດ້ຂີ່ລົດຈັກເວບຮ້ອຍສີໝາກຄໍ້ ເລກທະບຽນ ຈກ 9289 ກໍາແພງນະຄອນ ຊ້ອນທ້າຍກັນອອກຈາກຫ້ອງເຊົ່າ ມຸ່ງໜ້າໄປບ້ານນາໄຫ ເພື່ອໄປສົ່ງຢາໃຫ້ຜູ້ສັ່ງຊື້ ແຕ່ຖືກເຈົ້າໜ້າທີ່ກັກຕົວ ພ້ອມຢາບ້າ ນວນ 367 ເມັດ ແລະ ຢາໄອສ໌ 1 ຖົງນ້ອຍ ທີ່ຊຸກເຊື່ອງໄວ້ໃນເສື້ອຊ້ອນຂອງນາງ ອໍລະຍາ ແລະ ສືບຕໍ່ເຂົ້າກວດຄົ້ນຫ້ອງເຊົ່າ ບ້ານໂນນສະຫວັນ ພົບຢາບ້າຕື່ມອີກ.

Are you looking for the best web hosting?