ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໄດ້ສົມທົບກັບ ປກສ ເມືອງຊະນະສົມບູນ ພ້ອມດ້ວຍອຳນາດການປົກຄອງ ບ້ານຄີລີ ເຂົ້າຈັບຕົວກຸ່ມແກ້ງຄ້າຂາຍຢາເສບຕິດໄດ້ 4 ຄົນ, ຂະນະທີ່ນັດຊື້-ຂາຍຮ່ວມກັນ ພ້ອມຂອງກາງຢາບ້າ 10.042 ເມັດ ໃນວັນທີ 8 ມີນາ 2020.

ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ເປີດເຜີຍວ່າ: ຜູ້ຖືກຫາ ຊື່ ທ້າວ ພູ ເຂົາກ້າ ອາຍຸ 32 ປີ, ທ້າວ ສົມໄຊ ອາຍຸ 29 ປີ ທັງ 2 ຄົນ ຢູ່ບ້ານນາທີງ ເມືອງຄົງເຊໂດນ, ທ້າວ ກິ ອາຍຸ 50 ປີ ຢູ່ບ້ານແກ້ງຫວດ ແລະ ທ້າວ ຂຽວ ອາຍຸ 22 ປີ ຢູ່ບ້ານແກ້ງ ໂຄນ ທັງ 4 ຄົນ ຢູ່ເມືອງຄົງເຊໂດນ ແຂວງສາລະວັນ ພ້ອມເຄື່ອງຂອງກາງຢາບ້າ 10.042 ເມັດ, ໂທລະສັບ 1 ເຄື່ອງ ແລະ ລົດຈັກ 1 ຄັນ.

ຜ່ານການຕິດຕາມຮອດວັນທີ 8 ມີນາ 2020, ເຈົ້າໜ້າທີ່ຕຳຫຼວດສືບຮູ້ວ່າ ພວກກ່ຽວໄດ້ນັດຊື້ຂາຍຢບ້າໃຫ້ກັນຢູ່ບ້ານຄີລີ ຈຶ່ງເຂົ້າຈັບຕົວພວກກ່ຽວ ພ້ອມຂອງກາງຢາບ້າ 10.042 ເມັດ, ໂທລະສັບ 1 ເຄື່ອງ, ລົດຈັກ 1 ຄັນ. ໂດຍພວກກ່ຽວສາລະພາບວ່າ ໄດ້ຕິດຕໍ່ພົວພັນຊື້ຂາຍຢາບ້ານໍາກັນມາໄລຍະໜຶ່ງແລ້ວ ມື້ຖືກຈັບຕົວແມ່ນໄດ້ນັດແບ່ງປັນຢາບ້າໃຫ້ກັນໄປຈໍາໜ່າຍ ພໍໄປຮອດບ້ານຄີລີ ກໍຖືກເຈົ້າໜ້າທີ່ຕໍາຫຼວດເຂົ້າຈັບຕົວພ້ອມຂອງກາງຈໍາ ນວນດັ່ງກ່າວ.

ຂ່າວໃຫ້ຮູ້ຕື່ມອີກວ່າ: ໃນວັນດຽວກັນນີ້, ເຈົ້າໜ້າທີ່ປະຈຳຈຸດຫຼັກ 84 ບ້ານນາຝັ່ງ ເມືອງໂຂງ ແຂວງຈຳປາສັກ ໄດ້ກັກຕົວເປົ້າໝາຍຄ້າຂາຍຢາເສບຕິດໄດ້ 2 ຄົນ; ໃນນັ້ນ, ຊື່ ທ້າວ ພອນ ອາຍຸ 27 ປີ ຢູ່ບ້ານຫ້ວຍໃຜ່ ເມືອງໂຂງ ແລະ ທ້າວ ຈົງ ຢູ່ບ້ານທົ່ງເສັດ ເມືອງປາກຊ່ອງ ແຂວງຈຳປາສັກ ພ້ອມຢາບ້າ ຈຳນວນ 1.043 ເມັດ, ໂທລະສັບ 1 ເຄື່ອງ, ລົດຈັກ 1 ຄັນ, ເງິນ 1 ແສນກີບ.

ທັງ 2 ຄະດີດັ່ງກ່າວ, ເຈົ້າໜ້າທີ່ ປກສ ແຂວງຈໍາປາສັກ ພວມດໍາເນີນການສືບສວນ-ສອບສວນ ເພື່ອຂະຫຍາຍຜົນຊອກຫາຜູ້ຮ່ວມຂະບວນການໄປດຳເນີນຄະດີຕາມລະບຽບກົດໝາຍ.

Are you looking for the best web hosting?