ກ້ອງວົງຈອນປິດພາຍໃນບໍລິສັດ ຈຳໜ່າຍເຄື່ອງດື່ມຊູກຳລັງແຫ່ງໜຶ່ງ ໄດ້ບັນທຶກພາບຄົນຮ້າຍລັກລອບເຂົ້າໄປ ລັກເງິນພາຍໃນບໍລິສັດດັ່ງກ່າວ ເສຍຫາຍ 50 ກວ່າລ້ານກີບ ກ່ອນເຈົ້າຂອງບໍລິສັດນໍາຫຼັກຖານເຂົ້າແຈ້ງຄວາມຕໍ່ເຈົ້າໜ້າ ທີ່ ປກສ ເມືອງຈັນທະບູລີ ນະຄອນຫຼວງວຽງຈັນ ຕິດຕາມຈັບຕົວຄົນຮ້າຍໄດ້ໃນວັນຕໍ່ມາ, ເຊິ່ງແມ່ນລູກຈ້າງຂັບລົດພາຍໃນບໍລິສັດຂອງຜູ້ກ່ຽວເອງ.

ເຈົ້າໜ້າທີ່ ປກສ ເມືອງຈັນທະບູລີ ໃຫ້ຮູ້ວ່າ: ໃນວັນທີ 12 ມີນາ ຜ່ານມາ, ໄດ້ຮັບແຈ້ງຄວາມຈາກບໍລິສັດຈຳ ໜ່າຍເຄື່ອງດື່ມຊູກຳລັງແຫ່ງໜຶ່ງວ່າ ໃນວັນທີ 11 ມີນາ 2020 ໄດ້ມີຄົນຮ້າຍໄປງັດຕູ້ເກັບມ້ຽນເງິນຂອງບໍລິສັດ ເສຍຫາຍຈໍານວນຫຼາຍ. ຈາກນັ້ນ, ເຈົ້າໜ້າທີ່ໄດ້ລົງສົມທົບກັບບໍລິສັດກວດພາບຈາກກ້ອງວົງຈອນປິດ ແລະ ເກັບກຳຂໍ້ມູນຫຼັກຖານຕົວຈິງ ຈຶ່ງຮູ້ໄດ້ວ່າຄົນຮ້າຍເປັນພະນັກງານຂອງບໍລິສັດ ຮອດວັນທີ 13 ມີນາ 2020 ຈຶ່ງໄດ້ເຂົ້າກັກຕົວຜູ້ກໍ່ເຫດຊື່ ທ້າວ ທອງໃບ ອາຍຸ 31 ປີ ຢູ່ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ໃນຂະ ນະທີ່ຜູ້ກ່ຽວກຳລັງກວດສະພາບລົດ ເພື່ອໄປສົ່ງເຄື່ອງໃຫ້ກັບລູກຄ້າຕາມປົກກະຕິ ພ້ອມທັງເກັບກູ້ຂອງກາງມີເງິນ 3 ລ້ານກວ່າກີບ ແລະ ເງິນ 2 ແສນກວ່າບາດ ໄປດຳເນີນການສອບສວນ.

ຜ່ານການສືບສວນ ທ້າວ ທອງໃບ ຮັບສາລະພາບວ່າ ຕົນໄດ້ເຮັດວຽກຢູ່ບໍລິສັດຈຳໜ່າຍເຄື່ອງດື່ມຊູກຳລັງດັ່ງກ່າວໄດ້ປະມານ 6 ເດືອນ ໂດຍມີໜ້າທີ່ຮັບຜິດຊອບຂັບລົດຂົນສົ່ງສິນຄ້າ. ມາຮອດວັນ ທີ 11 ມີນາ 2020, ເວລາປະມານ 17:00 ໂມງ; ເຊິ່ງເປັນເວລາເລີກວຽກ ຕົນໄດ້ສັງເກດເຫັນກະແຈປະຕູມ້ວນປະໄວ້ຢູ່ທາງເຂົ້າບໍລິສັດ ຈຶ່ງໄດ້ລັກເອົາກະແຈ 1 ລູກ ແລ້ວເອົາໄປຮັກສາໄວ້. ຈາກນັ້ນ, ຈຶ່ງໄດ້ຂີ່ລົດກັບເຮືອນ. ຮອດເວລາປະ ມານ 22:30 ໂມງ ຂອງວັນດຽວກັນ ຈຶ່ງໄດ້ຂີ່ລົດຈັກອອກຈາກເຮືອນ ເພື່ອໄປລັກເອົາເງິນຢູ່ບໍລິສັດ. ພໍໄປຮອດຕົນໄດ້ຈອດລົດປະໄວ້ຢູ່ໃກ້ກັບສະຖານບັນ ເທີງແຫ່ງໜຶ່ງ. ຈາກນັ້ນ, ໄດ້ເອົາກະແຈທີ່ຕົນເກັບໄວ້ນັ້ນໄປໄຂປະຕູມ້ວນດ້ານໜ້າບໍລິສັດ ແລ້ວໄດ້ຊອກຫາກະແຈຕູ້ລີ້ນຊັກ, ແຕ່ບໍ່ເຫັນ ຈຶ່ງໄດ້ລອງໃຊ້ມືດຶງລິ້ນຊັກຕູ້ໃສ່ເງິນບໍ່ໄດ້ລ໋ອກ; ເຊິ່ງຢູ່ໃນຕູ້ລິ້ນຊັກມີທັງເງິນບາດ ແລະ ເງິນກີບ ຈໍາ ນວນຫຼາຍ ຈຶ່ງໄດ້ເອົາເງິນທັງໝົດຢູ່ໃນຕູ້ລີ້ນຊັກ ແລ້ວກັບເມືອເຮືອນ ແລະ ເກັບ ເງິນທັງໝົດທີ່ໄດ້ລັກມາໄວ້ຢູ່ໃນເຮືອນພີ່ນ້ອງບ້ານຊ້າງຄູ້. ໃນມື້ຕໍ່ມາ, ກໍໄປເຮັດ ວຽກປົກກະຕິ ເຮັດຄືບໍ່ມີຫຍັງເກີດຂຶ້ນ.

ຕອນເຊົ້າຂອງວັນທີ 13 ມີນາ 2020, ເວລາປະມານ 10:00 ໂມງ ກໍຖືກເຈົ້າໜ້າທີ່ເຂົ້າກັກຕົວໄປສອບສວນ ແລ້ວ ຜູ້ກ່ຽວຈຶ່ງໄດ້ພາເຈົ້າໜ້າທີ່ໄປເອົາເງິນທີ່ເຊື່ອງໄວ້ຢູ່ເຮືອນຂອງພີ່ນ້ອງບ້ານຊ້າງຄູ້ເມືອງໄຊທານີ ມີເງິນກີບ 3 ລ້ານກວ່າກີບ ແລະ ເງິນບາດ 2 ແສນກວ່າບາດ; ການກະທໍາໃນຄັ້ງນີ້ແມ່ນຢາກໄດ້ເງິນໄປໃຊ້ໜີ້.

Are you looking for the best web hosting?