ວິທະຍາຄານຕຳຫຼວດປະຊາຊົນ (ວຕປ) ກະຊວງ ປກສ, ໄດ້ຈັດພິທີມອບ-ຮັບໜ້າທີ່ລະຫວ່າງ ພົຈວ ປອ ບຸນຊູ ນາມມະຈັກ ຫົວໜ້າວຕປ (ຜູ້ເກົ່າ) ແລະ ພັອ ປອ ວົງເຊໂດນ ພັນທະແກ້ວ ຮັກສາການວຕປ (ຜູ້ໃໝ່) ໃນວັນທີ 27 ມີນາ 2020; ເຂົ້າຮ່ວມໂດຍ ພົຕ ປອ ສົມຫວັງ ທຳມະສິດ ຮອງລັດຖະມົນຕີກະຊວງ ປກສ, ມີຄະນະພັກ-ຄະນະບັນຊາ, ສູນ, ຫ້ອງ ແລະ ຄະນະວິຊາເຂົ້າຮ່ວມ.
ພັທ ປອ ຄຳຕັນ ບຸນທອນອຸໄທ ຫົວໜ້າຫ້ອງການວຕປ ໄດ້ຜ່ານບົດບັນທຶກມອບ-ຮັບໜ້າທີ່ ລະຫວ່າງຫົວໜ້າ ແລະ ຮັກສາການວຕປ ໂດຍອີງຕາມມະຕິຕົກລົງຂອງຄະນະພັກກະຊວງ ປກສ ວ່າດ້ວຍການບົ່ງຕົວແຕ່ງຕັ້ງເລຂາຄະນະບໍລິຫານງານພັກວຕປ; ລະຫວ່າງ ພົຈວ ປອ ບຸນຊູ ນານມະຈັກ ຫົວໜ້າວຕປ ກັບ ພັອ ປອ ວົງເຊໂດນ ພັນທະແກ້ວ ເປັນຮັກສາການຫົວໜ້າການວຕປ ເພື່ອສືບຕໍ່ນຳພາ-ບັນຊາວຕປ ໃຫ້ມີຄວາມເຕີບໃຫຍ່ເຂັ້ມແຂງຖືກຕ້ອງ; ສອດຄ່ອງຕາມມາດຕາ 15 ຂອງກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ ແລະ ຂໍ້ຕົກລົງຂອງລັດຖະມົນຕີກະຊວງ ປກສ; ສ່ວນ ພົຈວ ປອ ບຸນຊູ ນານມະຈັກ ແມ່ນເຂົ້າພັກຜ່ອນຮັບບຳນານ.
ໃນໂອກາດນີ້, ພົຕ ປອ ສົມຫວັງ ທຳມະສິດ ໄດ້ຍົກໃຫ້ເຫັນແນວທາງ-ນະໂຍບາຍຂອງພັກ-ລັດ ແລະ ຄວາມຈຳເປັນຂອງການສັບປ່ຽນຕຳແໜ່ງຂັ້ນນຳພາ-ບັນຊາຢູ່ໃນກຳລັງ ປກສ; ເຊິ່ງທ່ານໄດ້ຊີ້ນຳຜູ້ເກົ່າ ແລະ ຜູ້ໃໝ່ ຈົ່ງຮັກສາ ແລະ ເສີມຂະຫຍາຍມູນເຊື້ອດຸໜັ້ນໃນການຄົ້ນຄວ້າ, ຊອກຮູ້, ກຳແໜ້ນສະພາບການຮອບດ້ານຕົວຈິງ ເພື່ອມານຳວາງແຜນ ແລະ ນຳພາປະຕິວັດໃຫ້ເກີດໝາກຜົນສູງສຸດໃນໜ້າທີ່ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ເວົ້າສະເພາະໃນການສ້າງບຸກຄະລາກອນໃນສະເພາະໃໝ່.