ນາງ ແພງຄໍາ ອາຍຸ 61 ປີ ຢູ່ບ້ານພູລຸ້ງ ເມືອງແບງ ແຂວງອຸດົມໄຊ ຖືກຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ຕັດອິດສະຫຼະພາບລົງໂທດຕອນເຖົ້າ ຈໍາຄຸກ 3 ປີ ປັບໃໝ 6.000.000 ກີບ ໃນສະຖານຄ້າ ຂາຍຢາເສບຕິດ ແລະ ມີໄວ້ຄອບຄອງ.

ໃນວັນທີ 20 ມີນາ 2020 ນີ້, ຄະນະສານອາຍາ ສານປະຊາຊົນຈັ້ນຕົ້ນແຂວງອຸດົມໄຊ ໄດ້ນໍາຄະດີຂອງ ນາງ ແພງຄຳ ອາຍຸ 61 ປີ ຢູ່ບ້ານພູລຸ້ງ ເມືອງແບງ ແຂວງອຸດົມໄຊ ຖືກຫາວ່າ ຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງປະເພດຢາບ້າ ຈຳນວນ 100 ເມັດ, ນ້ຳໜັກ 10 ກຼາມ, ຖືກກັກຕົວ ໃນວັນທີ 2 ກໍລະກົດ 2019, ຜ່ານການພິຈາລະນາຈໍາເລີຍ ມີຄວາມຜິດແທ້, ສານຈຶ່ງລົງໂທດຕັດອິດສະຫຼະພາບຈໍາເລີຍ 3 ປີ ແລະ ປັບໃໝ 6.000.000 ກີບ, ຮິບຢາບ້າ 100 ເມັດ, ນ້ຳໜັກ 10 ກຼາມ ໄປທຳລາຍຖິ້ມຕາມລະບຽບກົດໝາຍ.

ນອກນີ້, ໃນຫ້ອງປະຊຸມຄະນະສານອາຍາໄດ້ນຳເອົາສຳນວນສະຫຼຸບຄະດີຂອງເຈົ້າໜ້າທີ່ວິຊາສະເພາະທີ່ສັ່ງຟ້ອງຂອງໄອຍະການປະຊາຊົນແຂວງພິຈາລະນາຕັດສິນຈຳເລີຍຊື່ ທ້າວ ຈົງວາ ຫຼື ສາ ອາຍຸ 25 ປີ ເຮັດໄຮ່ຢູ່ບ້ານນ້ຳຍື່ງ ເມືອງຮຸນ ແຂວງອຸດົມໄຊ ຖືກເຈົ້າໜ້າທີ່ກັກຕົວໃນຄັ້ງວັນທີ 30 ເມສາ 2019 ໃນຂໍ້ຫາ ຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງ ປະເພດຢາບ້າ ຈໍານວນ 17 ຖົງ ມີ 3.400 ເມັດ, ນ້ຳໜັກ 341 ກຼາມ ແລະ ຝິ່ນຈໍານວນ 1 ກ້ອນ, ໜັກ 146 ກຼາມ, ເຄື່ອງຕິດຕົວມີ ໂທລະສັບມືຖື 2 ເຄື່ອງ.

ຜ່ານການກວດກາພິຈາລະນາຂໍ້ມູນຫຼັກຖານການກະທຳຜິດຢ່າງລະອຽດທີ່ຖ້ວນພາວະວິໄສ ແລະ ຄຳສາລະ ພາບຂອງຈຳເລີຍໃນທີ່ປະຊຸມສານໂດຍຊ່ອງໜ້າໄອຍະການປະຊາຊົນແຂວງ, ຈຳເລີຍ ມີເຈດຕະນາເຄື່ອນໄຫວກະທໍາຜິດຕໍ່ ມາດຕາ 146 ຂອງກົດໝາຍອາຍາແຫ່ງ ສປປ ລາວ; ຄະນະສານອາຍາຂັ້ນຕົ້ນແຂວງອຸດົມໄຊ ໄດ້ພິຈາລະນາລົງໂທດຕັດອິດສະຫຼະພາບ ທ້າວ ຈົງວາ ຫຼື ສາ (ຈຳເລີຍ) ໃນການຄ້າຂາຍຢາບ້າ ແລະ ໍມີຢາບ້າໄວ້ໃນຄອບຄອງ 10 ປີ, ປັບໃໝເງິນ 100.000.000 ກີບ ແລະ ຕັດອິດສະຫຼະພາບໃນການຄ້າຂາຍຝິ່ນ ແລະ ມີຝີ່ນໄວ້ໃນຄອບຄອງ 2 ປີ ປັບໃໝ 1.000.000 ກີບ, ລວມໂທດຕັດອິດສະຫຼະພາບທ້າວ ຈົງວາ ຫຼື ສາ ( ຈຳ ເລີຍ ) 12 ປີ, ຮິບໂທລະສັບມືຖື 2 ເຄື່ອງ ມາເປັນຂອງລັດ, ຮິບຢາບ້າ ຈໍານວນ 17 ຖົງ, ລວມມີຢາບ້າ 3.400 ເມັດ, ໜັກ 341 ກຼາມ ແລະ ຮິບຝິ່ນ ຈຳນວນ 1 ກ້ອນ, ໜັກ 146 ກຼາມ ຂອງຈໍາເລີຍ ໄປທຳລາຍຖີ້ມ.

Are you looking for the best web hosting?