ກອງບັນຊາການ ປກສ ເມືອງວຽງພູຄາ ແຂວງຫຼວງນໍ້າທາ ໄດ້ສະກັດກັກຕົວເປົ້າໝາຍເຄື່ອນໄຫວລັກຊັບ, ປຸ້ນ ຊັບ, ງັດຕູ້ ATM, ລັກລົດຈັກ ແລະ ລົດໃຫຍ່ ຢູ່ຫຼາຍແຂວງ ພ້ອມທັງໄດ້ເຄື່ອນໄຫວກໍ່ເຫດຢູ່ເຂດແຂວງຫຼວງນໍ້າທາ ແລະ ແຂວງບໍ່ແກ້ວ ໄດ້ 1 ຄົນ, ສ່ວນອີກ 1 ຄົນ ໄດ້ເອົາຕົວຫຼົບໜີເຂົ້າປ່າ, ແຕ່ເຈົ້າໜ້າທີ່ໄດ້ຕິດຕາມທັນຢູ່ຖຽງນາແຄມປ່າເຂດບ້ານພູລັນ ເມືອງຫຼວງນໍ້າທາ. ແຕ່ຜູ້ກ່ຽວໄດ້ໃຊ້ປືນຍິງໃສ່ເຈົ້າໜ້າທີ່ ຈຶ່ງມີການຍິງຕອບໂຕ້ ຈົນເຮັດໃຫ້ຄົນຮ້າຍເສຍຊີວິດຄາທີ່.

ເຈົ້າໜ້າທີ່ ປກສ ເມືອງຫຼວງນໍ້າທາ ໃຫ້ຮູ້ວ່າ: ຜູ້ຖືກຫາ ຊື່ ທ້າວ ສົມເພັດ ອາ ຍຸ 41 ປີ ຢູ່ບ້ານໂນນຂີ້ເຫຼັກ ເມືອງສີໂຄດຕະບອງ ນະຄອນຫຼວງວຽງຈັນ ແລະ ທ້າວ ວິລະ ອາຍຸ 42 ປີ ຢູ່ບ້ານດົງດຳດວນ ນະຄອນໄກສອນ ແຂວງສະຫວັນນະເຂດ, ເຊິ່ງໄດ້ເສຍຊີວິດໃນຂະນະຍິງປືນຕອບໂຕ້ກັບເຈົ້າໜ້າທີ່.

ໃນເບື້ອງຕົ້ນ, ໃນວັນທີ 9 ມີນາ 2020 ເຈົ້າໜ້າທີ່ໄດ້ຮັບແຈ້ງທາງໂທລະສັບຈາກກອງບັນຊາການ ປກສ ແຂວງຫຼວງນໍ້າທາ ວ່າ: ມີເປົ້າໝາຍກໍ່ຄວາມບໍ່ສະຫງົບຈຳນວນ 2 ຄົນ ທີ່ເຄື່ອນໄຫວລັກຊັບ, ປຸ້ນຊັບ, ງັດຕູ້ ATM, ລັກລົດຈັກ, ລົດໃຫຍ່ຢູ່ຫຼາຍແຂວງ ພ້ອມທັງໄດ້ເຄື່ອນໄຫວຢູ່ ເຂດແຂວງຫຼວງນໍ້າທາ ແລະ ແຂວງບໍ່ແກ້ວ ໂດຍຄົ້ນຮ້າຍກໍາລັງເດີນທາງຈາກແຂວງບໍ່ແກ້ວ ເຂົ້າໄປແຂວງຫຼວງນໍ້າທາ. ຈາກນັ້ນ, ເຈົ້າໜ້າທີ່ ປກສ ເມືອງ ໄດ້ຈັດກໍາລັງຕໍາຫຼວດວິຊາສະເພາະຕັ້ງຈຸດກວດກາຕາມເສັ້ນທາງເປົ້າໝາຍຈະຜ່ານ. ຜ່ານການກວດກາ, ຮອດເວລາ ປະມານ 21:00 ໂມງຂອງວັນດຽວກັນ ຈຶ່ງພົບເຫັນເປົ້າໝາຍສົງໄສ່ຂັບຂີ່ລົດຈັກຊ້ອນກັນໄປຕາມທາງ ໂດຍມຸ່ງໜ້າເຂົ້າແຂວງຫຼວງນໍ້າທາ, ພໍໄປຮອດດ່ານກວດກາຂອງເຈົ້າໜ້າທີ່ ຈຶ່ງໄດ້ສັ່ງຢຸດລົດທັງ 2 ຄົນ ຊື່ ທ້າວ ສົມເພັດ ແລະ ທ້າວ ວິລະ. ໃນລະຫວ່າງການສອບສວນທ້າວ ສົມເພັດ ຢູ່ນັ້ນ. ທ້າວ ວິລະ ທີ່ກໍາລັງນັ່ງລໍຖ້າຢູ່ນອກຫ້ອງນັ້ນ ໄດ້ຈົກເອົາປືນສັ້ນ ທີ່ຜູ້ກ່ຽວຊຸກເຊື່ອງມານໍານັ້ນໄດ້ຍິງຂູ່ເຈົ້າໜ້າທີ່ 2 ນັດ ພ້ອມທັງແລ່ນຫຼົບໜີເຂົ້າປ່າ.

ກອງບັນຊາການ ປກສ ເມືອງວຽງພູຄາ ຈຶ່ງໄດ້ປະສານສົມທົບກັບກຳລັງວິຊາສະເພາະຈາກກອງບັນຊາການ ປກສ ແຂວງ, ກອງພັນ 418, ກອງບັນຊາການທະຫານເມືອງ ແລະ ສົມທົບກັບ ປກສ ກຸ່ມບ້ານ, ປກສ ບ້ານ ວາງແຜນຈັບກຸມ ໂດຍໄດ້ຈັດວາງກຳລັງຕັ້ງຈຸດກວດກາຢູ່ບັນດາບ້ານປະຊາຊົນທີ່ຢູ່ລຽບຕາມເສັ້ນທາງ R3 ອອກເຄື່ອນໄຫວລາດຕະເວນ ຕະຫຼອດ 24 ຊົ່ວໂມງ. ຮອດວັນທີ 14 ມີນາ 2020 ເວລາປະມານ 19 ໂມງ 30 ນາທີ ຈຶ່ງພົບເຫັນເປົ້າໝາຍລີ້ຊ່ອນຕົວຢູ່ຖຽງນາແຄມປ່າ ເຂດບ້ານພູລັນ. ເຈົ້າໜ້າ ທີ່ໄດ້ໃຊ້ໄຟສາຍເຍືອງໃສ່ ພ້ອມທັງຮ້ອງບອກໃຫ້ ທ້າວ ວິລະ ອອກມາຍອມມອບຕົວ. ແຕ່ຜູ້ກ່ຽວບໍ່ຍອມອອກມາ ພ້ອມທັງໃຊ້ປືນສັ້ນຍິງໃສ່ເຈົ້າໜ້າທີ່ 1 ນັດ ແລະ ເຈົ້າໜ້າທີກໍໄດ້ຍິງຕອບໂຕ້ຄືນ ຈຶ່ງເຮັດໃຫ້ຄົນຮ້າຍຊື່ ທ້າວ ວິລະ ເສຍ ຊີວິດຄ່າທີ່. ຈາກນັ້ນ, ເຈຂົ້າໜ້າທີ່ ຈຶ່ງເຂົ້າກວດກາ ພົບເຫັນປືນສັ້ນ 1 ກະບອກ ພ້ອມລູກກະສຸນ 30 ລູກ ແລະ ກະສອບປືນ 1 ກະສອບ.

ທ້າວ ສົມເພັດ ໝູ່ ທ້າວ ວິລະ (ຜູ້ຕາຍ) ຖືກຈັບຕົວໄປດຳເນີນຄະດີ

ຜ່ານການສອບສວນ ທ້າວ ສົມເພັດ ໄດ້ສາລະພາບວ່າ: ຕົນໄດ້ຮູ້ຈັກກັບ ທ້າວ ວິລະ ອາຍຸ 42 ປີມາແຕ່ປີ 2003 ແລະ ໄດ້ໄປຫຼິ້ນໄປທ່ຽວນໍາກັນຫຼາຍຄັ້ງ. ມາວັນທີ 4 ມີນາ 2020, ທ້າວ ວິລະ ໄດ້ໄປຊວນຕົນເອງໄປຊອກເຮັດວຽກຢູ່ທາງແຂວງພາກເໜືອ ໂດຍໄປແຂວງບໍ່ແກ້ວ. ຮອດວັນທີ 9 ມີນາ 2020, ໄດ້ພາກັນຂີ່ລົດຈັກອອກຈາກແຂວງບໍ່ແກ້ວ ເພື່ອຈະໄປແຂວງຫຼວງນໍ້າທາ. ພໍເດີນທາງຮອດເມືອງວຽງພູຄາ ປະມານ 21:00 ໂມງ ຈຶ່ງຖືກເຈົ້າໜ້າທີ່ກັກຕົວ.

ທ້າວ ສົມເພັດ ຍອມຮັບສາລະພາບວ່າ: ໄດ້ຮ່ວມກັບ ທ້າວ ວິລະ (ຜູ້ຕາຍ) ເຄື່ອນໄຫວລັກຊັບ, ປຸ້ນຊັບມາແລ້ວຫຼາຍຄັ້ງ. ຈາກນັ້ນ, ເຈົ້າໜ້າທີ່ໄດ້ນຳຕົວຜູ້ກ່ຽວໄປສືບສວນ ແລະ ດຳເນີນຄະດີຕາມກົດໝາຍ.

Are you looking for the best web hosting?