ສະພາບຂອງພະຍາດອັກເສບປອດທີ່ເກີດຈາກເຊື້້ອຈຸລະໂລກສາຍພັນໃໝ່ COVID-19 ຢູ່ລາວເຮົາ ແມ່ນກໍາລັງແຜ່ລະບາດ ມີລັກສະນະເພີ່ມຂຶ້ນ. ການຖະແຫຼງຂ່າວຂອງຄະນະສະເພາະກິດ ໃນວັນທີ 30 ມີນານີ້ ໃຫ້ຮູ້ວ່າ ປະເທດລາວມີຜູ້ຕິດເຊື້ອແລ້ວ 9 ຄົນ ເຊິ່ງຢູ່ນະຄອນຫຼວງວຽງຈັນ 6 ຄົນ, ແຂວງຫຼວງພະບາງ 3 ຄົນ.
ຄຽງຄູ່ກັບການລະບາດຂອງ COVID-19, ມີກຸ່ມຄົນບໍ່ດີຈໍານວນໜຶ່ງໄດ້ເຄື່ອນໄຫວຜິດກົດໝາຍ ເຊັ່ນ: ຄ້າຂາຍຢາເສບຕິດ, ປຸ້ນຊັບ, ຊິງຊັບ, ລັກຊັບ, ຍັກຍອກ-ສໍ້ໂກງຊັບ ເຮັດໃຫ້ສັງຄົມບໍ່ມີຄວາມສະຫງົບ. ນັບແຕ່ວັນທີ 18-24 ມີນາ 2020, ທົ່ວນະຄອນຫຼວງວຽງຈັນມີປະກົດການຫຍໍ້ທໍ້ເກີດຂຶ້ນ 45 ເລື່ອງ; ທຽບໃສ່ທິດກ່ອນໜ້ານີ້ ເພີ່ມຂຶ້ນ 4 ເລື່ອງ, ສ້າງຄວາມເສຍຫາຍ 775.882.000 ກີບ.
ບັນດາປະກົດການຫຍໍ້ທໍ້ທີ່ເກີດຂຶ້ນນັ້ນລວມມີ ລັກຊັບພົນລະເມືອງ 24 ເລື່ອງ, ຊື້-ຂາຍຢາເສບຕິດ 7 ເລື່ອງ, ຊິງຊັບ 4 ເລື່ອງ, ເສບຢາເສບຕິດ 4 ເລື່ອງ, ທໍາຮ້າຍຮ່າງກາຍ 1 ເລື່ອງ, ປຸ້ນຊັບ 1 ເລື່ອງ, ຍັກຍອກຊັບ 1 ເລື່ອງ, ຊື້-ຂາຍຊັບຜິດກົດໝາຍ 1 ເລື່ອງ ແລະ ຂັດຂວາງການປະຕິບັດໜ້າທີ່ຂອງເຈົ້າໜ້າທີ່ 1 ເລື່ອງ.ຄະດີທີ່ເກີດຂຶ້ນທັງໝົດໄດ້ສ້າງຄວາມເສຍຫາຍເປັນເງິນ 775.882.000 ກີບ, ລົດຈັກ 21 ຄັນ, ຄໍາຮູບປະພັນ 1 ບາດ 2 ສະຫຼຶງ, ຕັ່ງຢາງ 40 ໜ່ວຍ, ໂທລະສັບ 4 ໜ່ວຍ ແລະ ເຄື່ອງມີຄ່າຈໍານວນໜຶ່ງ.
ຕໍ່ກັບສະພາບການດັ່ງກ່າວ, ເຈົ້າໜ້າທີ່ຕໍາຫຼວດວິຊາສະເພາະໄດ້ເອົາໃຈໃສ່ແກ້ໄຂຢ່າງຕັ້ງໜ້າ ເຊິ່ງ ສາມາດແກ້ໄຂໄດ້ 26 ເລື່ອງ, ກັກຕົວຜູ້ຖືກຫາໄດ້ 90 ຄົນ ຍິງ 11 ຄົນ, ຢືດຂອງກາງຢາບ້າໄດ້ 9.496 ເມັດ, ຢາໄອສ໌ 1 ຖົງນ້ອຍ 19 ຫຼອດນ້ອຍ ແລະ ລົດໃຫຍ່ 1 ຄັນ; ພ້ອມທັງສາມາດເກັບກູ້ລົດຈັກຄືນໄດ້ 2 ຄັນ.
ບາງຄະດີທີ່ພົ້ນເດັ່ນມີຄື: ເວລາ 19:00 ໂມງຂອງວັນທີ 19 ມີນາ 2020, ທ້າວ ລິຊິງ ອາຍຸ 32 ປີ ນັກທຸລະກິດ ເຊື້ອຊາດ-ສັນຊາດຈີນ ພັກເຊົາຢູ່ບ້ານ ສີສະຫວາດ ເມືອງຈັນທະບູລີ ໄດ້ເອົາເງິນຈໍານວນ 2.550.000 ບາດ ເພື່ອໄປແລກປ່ຽນເອົາເງິນໂດລາ. ພໍເດີນທາງຮອດໜ້າປໍ້ານໍ້າມັນ ພລັສ ຢູ່ບ້ານນາຄູນ ເມືອງນາຊາຍທອງ ໄດ້ມີຄົນຮ້າຍປະມານ 8-9 ຄົນ ຂັບຂີ່ລົດກະບະໂຕໂຍຕ້າ ຣີໂວ້ ສີດໍາ ແລະ ລົດໃຫຍ່ສີປອນທອງ ບໍ່ຈື່ໝາຍເລກທະບຽນ ໄປຕັດໜ້າ ແລ້ວໄດ້ໃຊ້ອາວຸດປືນສັ້ນສີດໍາ ປຸ້ນເອົາເງິນຈໍານວນດັ່ງກ່າວ ຂອງຜູ້ກ່ຽວ ແລ້ວຫຼົບໜີໄປ.
ເວລາ 21:30 ໂມງຂອງວັນທີ 20 ມີນາ 2020, ທ້າວ ກາລິວ ອາຍຸ 44 ປີ ເຊື້ອຊາດ-ສັນຊາດຝຣັ່ງ ພັກເຊົາຢູ່ເຮືອນພັກ ຕັ້ງຢູ່ບ້ານມີໄຊ ເມືອງຈັນທະບູລີ ໄດ້ຍ່າງໄປຕາມທາງເຂດບ້ານດັ່ງກ່າວ ແລະ ມີຄົນຮ້າຍ 1 ຄົນ ຂີ່ລົດຈັກ (ບໍ່ຮູ້ຍີ່ຫໍ້-ປ້າຍທະບຽນ) ໄປດຶງກະເປົາຂອງຜູ້ກ່ຽວແລ້ວຫຼົບໜີ ເຊິ່ງໃນກະເປົາມີເງິນ 500.000 ກີບ, 1.000 ບາດ, 100 ເອີໂຣ, ໂທລະສັບ 2 ໜ່ວຍ ແລະ ເຄື່ອງອີກຈໍານວນໜຶ່ງ.
ເວລາ 20:00 ໂມງຂອງວັນທີ 21 ມີນາ 2020, ນາງ ແສງ ອາຍຸ 40 ປີ ບ້ານໜອງທາເໜືອ ເມືອງຈັນທະບູລີ ໄດ້ກັບຈາກບ່ອນເຮັດວຽກ. ພໍໄປຮອດເຮືອນ, ໄດ້ເຫັນຜົວຊື່ ທ້າວ ພອນ ອາຍຸ 42 ປີ ຢູ່ໃນສະພາບມືນເມົາເຫຼົ້າ ຈຶ່ງມີການຜິດຖຽງກັນຮຸນແຮງ ເຮັດໃຫ້ ທ້າວ ພອນ ເອົານໍ້າມັນແອັດຊັງຫົດໃສ່ຕົນຕົວຂອງເມຍ ພ້ອມທັງຈູດໄຟໃສ; ເຮັດໃຫ້ໄຟໄໝ້ທົ່ວຕົນຕົວ ນາງ ແສງ ກ່ອນທີ່ພີ່ນ້ອງຈະພາກັນມອດໄຟ ແລະ ນໍາຕົວ ນາງ ແສງ ສົ່ງໂຮງໝໍ. ສ່ວນ ທ້າວ ພອນ ແມ່ນໄດ້ຫຼົບໜີ ເຊິ່ງເຈົ້າໜ້າທີ່ກໍາລັງເລັ່ງຕິດຕາມຕົວໄປດໍາເນີນຄະດີຕາມກົດໝາຍ.
ເວລາ 00:30 ຂອງັວນທີ 22 ມີນາ 2020, ເກີດໄວລຸ້ນນັກຮຽນ ໄດ້ກໍ່ເຫດຕີກັນ ຢູ່ເສັ້ນທາງແຄມຂອງ ເຂດບ້ານທາດຂາວ ເມືອງສີສັດຕະນາກ ຈົນບາດເຈັບສາຫັດ 1 ຄົນ; ໃນເບື້ອງຕົ້ນ, ທ້າວ ບຸນຈັນ ຫຼື ຈັນ ອາຍຸ 15 ປີ ນັກຮຽນ ບ້ານທາດຫຼວງເໜືອ ເມືອງໄຊເສດຖາ ໄດ້ໄປທ່ຽວຫຼີ້ນ ແລະ ນັ່ງດື່ມເບຍກັບໝູ່ອີກ 15 ຄົນ ຢູ່ແຄມທາງເສັ້ນທາງເຂດບ້ານທາດຂາວ ເມືອງສີສັດຕະນາກ. ຈາກນັ້ນ, ໄດ້ມີກຸ່ມຂອງ ທ້າວ ເລັກ ອາຍຸ 17 ປີ ນັກຮຽນບ້ານໜອງດ້ວງເໜືອ ເມືອງສີໂຄດຕະບອງ ປະມານ 20-30 ຄົນ ຂັບຂີ່ລົດຈັກ ເຂົ້າໄປຖາມ ກຸ່ມ ທ້າວ ຈັນວ່າ: “ໃຜຊື່ຈັນ?”. ຈາກນັ້ນ, ທ້າວ ຈັນ ໄດ້ແລ່ນໜີ ແຕ່ກຸ່ມ ທ້າວ ເລັກ ແລະ ພັກພວກໄດ້ແລ່ນນໍາຈົນທັນ ແລ້ວລຸມທໍາຮ້າຍ ທ້າວ ຈັນ ຈົນບາດເຈັບສາຫັດ.
ຢ່າງໃດກໍ່ຕາມ, ແຕ່ວັນທີ 1-19 ເມສາ 2020 ເປັນໄລຍະການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕິໃນການປ້ອງກັນ, ສະກັດກັ້ນ ແລະ ຄວບຄຸມການແຜ່ລະບາດຂອງ COVID-19 ໃນລະດັບສູງສຸດ ໂດຍຫ້າມໃຫ້ປະຊາຊົນ, ພະນັກງານ, ກໍາມະກອນ, ນັກຮຽນ, ນັກສຶກສາ ຜູ້ປະກອບການຢູ່ທີ ສປປ ລາວ ອອກຈາກເຮືອນ ຫຼື ທີ່ພັກອາໃສຂອງຕົນ ຍົກເວັ້ນທີກໍລະນີຈໍາເປັນ ເຊັ່ນ ໄປຕະຫຼາດຊື້ເຄື່ອງອຸປະໂພກ-ບໍລິໂພກ, ໄປໂຮງໝໍ. ລອງຕິດຕາມເບິ່ງນໍາກັນວ່າມາດຕະການດັ່ງກ່າວນອກຈາກຈະຊ່ວຍຢັບຢັ້ງການແຜ່ລະບາດຂອງ COVID-19 ແລ້ວ ຈະຊ່ວຍຫຼຸດຜ່ອນປະກົດການຫຍໍ້ທໍ້ຢູ່ນະຄອນຫຼວງວຽງຈັນໂດຍທາງອ້ອມໄດ້ຄືແນວໃດ.
