ຮ້ານອາຫານເມລິສາ ພ້ອມດ້ວຍຄອບຄົວຈັນທະວົງ ແລະ ໝູ່ຄູ່ ແຈກເຂົ້າກ່ອງ, ໝີ່, ໄຂ່, ນໍ້າດື່ມ, M150 ແລະ ກາເຟ ລວມມູນ 10 ລ້ານກວ່າກີບ ໃຫ້ ປກສ ກຸ່ມໜອງໜ່ຽງ ແລະ ພະນັກງານແພດໝໍ-ຄົນເຈັບຢູ່ໂຮງໝໍເດັກ ໃນວັນທີ 12 ເມສາ 2020; ເພື່ອເປັນການປະກອບສ່ວນທາງດ້ານສະບຽງອາຫານໃຫ້ຜູ້ປະຕິບັດວຽກງານຕ້ານ ແລະ ສະກັດກັ້ນ ພະຍາດ COVID-19 ໃຫ້ມີຂວັນກຳລັງໃຈ ແລະ ກຳລັງກາຍປະຕິບັດວຽກງານດັ່ງກ່າວໃຫ້ສໍາເລັດຜົນ.
ນໍາພາໂດຍທ່ານ ທູນສະໄໝ ຈັນທະວົງ , ເຊິ່ງທ່ານໄດ້ໃຫ້ສໍາພາດຕໍ່ນັກຂ່າວທີມ ປກສ ວ່າ: ການ ແຈກອາຫານ ໃນຄັ້ງນີ້ແມ່ນໄດ້ປຸກລະດົມນໍ້າໃຈຈາກຄອບຄົວຈັນທະວົງ; ຮ້ານອາຫານເມລິສາ ແລະ ໝູ່ຄູ່ ປະກອບມີ: ເຂົ້າກ່ອງ ຈໍານວນ 500 ກ່ອງ; ໝີ່ ຈໍານວນ 5 ແກັດໃຫຍ່; ໄຂ່ໄກ່ 110 ແຕະ; ນໍ້າດື່ມ ຈໍານວນ 2 ແກັດ; M150 ຈໍານວນ 1 ແກັດ ແລະ ກາເຟ ຈໍານວນ 20 ຖົງ ລວມມູນຄ່າ 10 ລ້ານກວ່າກີບ ໄປມອບໃຫ້ ປກສ ກຸ່ມໜອງໜ່ຽງ ທີ່ຕັ້ງຈຸດກວດສົ້ນຂົວໜອງໜ່ຽງ ແລະ ພະນັກງານແພດໝໍ-ຄົນເຈັບຢູ່ໂຮງໝໍເດັກ; ເຊິ່ງເປັນກຳລັງທີ່ສໍາຄັນໃນການສະກັດກັ້ນ ແລະ ຕ້ານພະຍາດ COVID-19 ທັງມີຄວາມຫຍຸ້ງຍາກໃນການອອກໄປຊື້ອາຫານ.
ສະນັ້ນ, ພວກຂ້າພະເຈົ້າ ພ້ອມດ້ວຍຄອບຄົວ,ຮ້ານອາຫານເມລິສາ ແລະ ໝູ່ເພື່ອນເຫັນໄດ້ຄວາມຈໍາເປັນ ແລະ ຄວາມສໍາຄັນຂອງວຽກງານ ຈຶ່ງໄດ້ປຸກລະດົມປັດໄຈຮ່ວມກັນເພື່ອເຮັດອາຫານດັ່ງກ່າວມາມອບໃຫ້ແຕ່ລະພາກສ່ວນທີ່ເຮັດໜ້າທີ່ຢ່າງເຂັມງວດ; ຖ້າພາກສ່ວນໃດ ຫຼື ໝູ່ຄູ່ມີຈິດໃຈຕ້ອງການ ແຈກອາຫານ ຫຼື ຊ່ວຍເຫຼືອຄືພວກຂ້າພະເຈົ້າ ກະຂໍເຊີນຊວນປຸກລະດົມກັນປະກອບສ່ວນຜູ້ລະເລັກລະໜ້ອຍ ແລະ ທາງຮ້ານອາຫານເມລິສາ ກໍຍິ່ງດີທີ່ຈະເປັນໃຈກາງໃນການປະສານງານ ແລະ ຈັດສົ່ງໃຫ້ພາກສ່ວນຕ່າງໆ.
