ພາຍຫຼັງທີ່ຊາວພຸດທັງຫຼາຍໃນທົ່ວແຂວງຜົ້ງສາລີ ໄດ້ສຳເລັດການຫຼິ້ນບຸນປີໃໝ່ ຕາມຮີດຄອງປະເພນີທີ່ເຄີຍປະຕິບັດກັນມາຄົບ 4 ມື້ແລ້ວ, ທຸກພາກສ່ວນ ແລະ ປະຊາຊົນບັນດາເຜົ່າ ໄດ້ສືບຕໍ່ຈັດຕັ້ງປະຕິບັດມາດຕະການຕ່າງໆ ໃນການຕ້ານພະຍາດ COVID-19 ໂດຍປະຕິບັດຕາມຄໍາສັ່ງ ແລະ ແຈ້ງການຂອງ ຄະນະສະເພາະກິດປ້ອງກັນ, ຄວມຄຸມ ແລະ ແກ້ໄຂ ການລະບາດຂອງພະຍາດ COVID-19 ຂັ້ນສູນກາງ, ຂັ້ນແຂວງ ແລະ ຂັ້ນເມືອງ ຢ່າງເຂັ້ມງວດ.
ສ່ວນທີ່ກ່ຽວຂ້ອງ ໂດຍສະເພາະ ຄະນະສະເພາະກິດແຕ່ລະຂັ້ນ ແລະ ເຈົ້້າໜ້າທີ່ ປກຊ-ປກສ, ວິຊາການແພດໝໍ ແລະ ຂະແໜງການປິ່ນອ້ອມອື່ນໆ ໄດ້ສືບຕໍ່ແນະນໍາໃຫ້ປະຊາຊົນບັນດາເຜົ່າໃນທົ່ວແຂວງ ໃຫ້ເປັນເຈົ້້າການສືບຕໍ່ປະຕິບັດຄຳສັ່ງຂອງ ທ່ານນາຍົກລັດຖະມົນຕີ ເລກທີ 06/ນຍ, ລົງວັນທີ 29 ມີນາ 2020 ໄປຕື່ມອີກ ຈົນຮອດວັນທີ 3 ພຶດສະພາ 2020 ກໍຄື ປະຕິບັດຕາມແຈ້ງການຂອງ ຫ້ອງວ່າການ ສຳນັກງານນາຍົກລັດຖະມົນຕີ ສະບັບເລກທີ 481/ຫສນຍ, ລົງວັນ 15 ເມສາ 2020 ຢ່າງເຄັ່ງຄັດ.
ໃນນັ້ນ ແມ່ນໃຫ້ສືບຕໍ່ເພີ່ມທະວີຄວາມເຂັ້ມງວດ ໃນການປະຕິບັດມາດຕະການຕ່າງໆ ທີ່ກຳນົດໃນຄຳສັ່ງເລກທີ 06/ນຍ ເປັນຕົ້ນແມ່ນ ມາດຕະການຫ້າມອອກຈາກເຮືອນ ຫຼື ບ່ອນພັກອາໄສ, ຫ້າມໄປເຂດທີ່ມີຄວາມສ່ຽງໃນການຕິດເຊື້ອ, ສ່ວນການໄປທຳການຜະລິດກະສິກຳ, ໄປນາ, ໄປສວນ ແລະ ໄປທຳມາຫາກິນຂອງປະຊາຊົນ ແມ່ນສາມາດໄປໄດ້, ແຕ່ໃຫ້ອຳນາດການປົກຄອງບ້ານເປັນຜູ້ຄຸ້ມຄອງຢ່າງຮັດກຸມ ເພື່ອຫຼີກລ່ຽງຄວາມສ່ຽງໃນການຕິດເຊື້ອ. ນອກນັ້ນ, ຍັງມີມາດຕະການຫ້າມຊຸມແຊວ ທີ່ມີຈຳນວນຄົນເກີນ 10 ຄົນຂຶ້ນໄປ ແລະ ການຈັດງານທຸກປະເພດ.
ຄະນະສະເພາະກິດ ບັນດາຂະແໜງການທີ່ກ່ຽວຂ້ອງ ຂັ້ນແຂວງ, ຂັ້ນເມືອງ ໃນ 7 ເມືອງ ທົ່ວແຂວງຜົ້ງສາລີ ໃຫ້ເພີ່ມທະວີການຈັດຕັ້ງປະຕິບັດ ນິຕິກຳແນະນຳຂອງ ຄະນະສະເພາະກິດ ແລະ ຂະແໜງການທີ່ກ່ຽວຂ້ອງ ວາງອອກ ໃນໄລຍະຜ່ານມາ ເຊັ່ນ:
- ວຽກງານການຄຸ້ມຄອງລາຄາສິນຄ້າ
- ວຽກງານການສົ່ງເສີມການຜະລິດກະສິກຳເປັນສິນຄ້າ ໂດຍສະເພາະ ການຜະລິດສະບຽງອາຫານ
- ວຽກງານຂົນສົ່ງສິນຄ້າຜ່ານແດນ ແລະ ຂົນສົ່ງສິນຄ້າ ລະຫວ່າງ ແຂວງຕໍ່ແຂວງ, ເມືອງຕໍ່ເມືອງ
- ວຽກງານຄຸ້ມຄອງແຮງງານທີ່ກັບມາຈາກຕ່າງປະເທດ
- ວຽກງານໂຄສະນາເຜີຍແຜ່ຂໍ້ມູນຂ່າວສານ ເພື່ອຕອບໂຕ້ ແລະ ຕີຖອຍຂ່າວລວງ, ຂ່າວລື, ຂ່າວອະກຸສົນ ແລະ ຂ່າວປັ່ນປ່ວນໃຫ້ທັນການ, ທົ່ວເຖິງ ແລະ ມີຜົນສຳເລັດ
