ໃນວັນທີ 24 ເມສາ 2020 ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ສົມທົບກັບກອງບັນຊາການທະຫານ ນະຄອນຫຼວງວຽງຈັນ ອອກກວດກາລາດຕະເວນຕາມເສັ້ນທາງຂອບເຂດຮັບຜິດຊອບ ສາມາດກັນຜູ້ກະທຳຜິດ 11 ຄົນ ພ້ອມຢາບ້າ 295 ເມັດ, ລົດຈັກ 1 ຄັນ ແລະ ເຮັດບົດບັນທຶກກ່າວເຕືອນເຈົ້າຂອງຮ້ານເກມ 1 ຮ້ານ.

ໃນເວລາ 19:20 ໂມງ ໄດ້ພົບເຫັນຜູ້ຕົກສົງໄສເປັນຊາຍ 2 ຄົນ ຈອດລົດຢູ່ແຄມທາງບໍລິເວນເດີນພຣະທາດຫຼວງໜ້າ ຫໍສະພາແຫ່ງຊາດ ຈຶ່ງໄດ້ເຂົ້າສອບຖາມ ແລະ ກວດຄົ້ນ ພົບເຫັນຢາບ້າ 10 ເມັດໃນຖົງໂສ້ງຂອງທ້າວ ໄຊປັນຍາ ອາຍຸ 31 ປີ ປະຊາຊົນບ້ານໂພນສະຫວັນໃຕ້ ເມືອງສີສັດຕະນາກ ແລະ ຢາບ້າ 40 ເມັດໃນຖົງພາຍຂອງທ້າວ ວິໄລຫົງ, ອາຍຸ 29 ປີ, ປະຊາຊົນບ້ານໂພນທັນ ເມືອງໄຊເສດຖາ. ຈາກນັ້ນ, ເຈົ້າໜ້າທີ່ ຈຶ່ງໄດ້ນໍາຕົວທັງສອງຄົນ ພ້ອມຂອງກາງ ແລະ ລົດຈັກສີຟ້າ ເລກທະບຽນ ຈຈ 5299 ກໍາແພງນະຄອນ ມາກອງພັນປ້ອງກັນເຄື່ອນທີ່ ເພື່ອດໍາເນີນການສືບສວນ ແລ້ວນໍາສົ່ງຕົວຜູ້ກ່ຽວທັງສອງໃຫ້ກອງຄະດີອາຍາ ປກສ ນະຄອນຫຼວງວຽງ ຈັນ ສືບຕໍ່ດໍາເນີນການສືບສວນ-ສອບສວນຕາມລະບຽບກົດໝາຍ.

ຕໍ່ມາ, ເວລາປະມານ 21:30 ໂມງ ເຈົ້າໜ້າທີ່ ໄດ້ເຂົ້າກວດກາຮ້ານອິນເຕີເນັດຄາເຟ່ຢູ່ເຂດບ້ານໂພນຕ້ອງສະຫວາດ ເມືອງຈັນທະບູລີ ພົບເຫັນໄວລຸ້ນຈໍານວນໜຶ່ງກຳລັງຊຸມນຸມກັນຢູ່ຮ້ານເກມ ໂດຍບໍ່ເປີດໄຟ ຈຶ່ງໄດ້ເຂົ້າກວດກາ ແລະ ພົບເຫັນຢາບ້າ 245 ເມັດໃນຖົງຍາງນ້ອຍ ຊຸກເຊືອງໄວ້ຢູ່ຕັ່ງນັ່ງ ຈຶ່ງໄດ້ປະສານສົມທົບພາກສ່ວນກ່ຽວຂ້ອງກວດຄົ້ນສະຖານ ພົບອຸປະກອນການເສບຈໍານວນຫຼາຍຢູ່ໃນຫ້ອງນ້ຳຂ້າງຮ້ານເກມ ແລະ ພົບເຫັນຊາຍໜຸ່ມຈໍານວນໜຶ່ງຊຸມໜຸມກັນຕີສະນຸກເກີຢູ່ໃນຮ້ານ. ຈາກນັ້ນ, ໄດ້ເຮັດບົດບັນທຶກກ່າວເຕືອນທ້າວ ບຸນລ້ຽງ ອາຍຸ 34 ປີ ເຈົ້າຂອງຮ້ານ ເພື່ອເປັນຂໍ້ມູນຫຼັກຖານ; ສ່ວນໄວລຸ້ນທັງໝົດຈໍານວນ 9 ຄົນ, ຍິງ 1 ຄົນໄດ້ນໍາຕົວໄປໄວ້ຫ້ອງຕໍາຫຼວດ ປກສ ນະຄອນຫຼວງວຽງຈັນ ເພື່ອດໍາເນີນການສືບສວນ-ສອບສວນ ແລະ ດຳເນີນຕາມຂັ້ນຕອນຂອງກົດໝາຍຕໍ່ໄປ.

Are you looking for the best web hosting?