ເວລາປະມານ 3:00 ໂມງເຊົ້າຂອງວັນທີ 20 ເມສາ 2020, ໄດ້ເກີດພາຍຸພັດເຂົ້າເຂດເມືອງນາແລ ແຂວງຫຼວງນ້ຳທາ ເຮັດໃຫ້ອາຄານບ້ານເຮືອນ, ຜົນລະປູກຂອງພໍ່-ແມ່ປະຊາຊົນໄດ້ຮັບຜົນເສຍຫາຍເປັນຈຳນວນຫຼວງຫຼາຍ. ໃນນັ້ນ, ກອງບັນຊາການ ປກສ ເມືອງນາແລ ກໍແມ່ນຈຸດໜຶ່ງທີ່ໄດ້ຮັບຜົນກະທົບຈາກພາຍຸຄັ້ງນີ້.

ພັຕ ຕິບແກ້ວ ໄຊປະເສີດ ຮອງຫົວໜ້າກອງບັນຊາການ ປກສ ເມືອງນາແລ ໃຫ້ຮູ້ວ່າ: ລົມພາຍຸຄັ້ງນີ້ ພັດຜ່ານເຂດເມືອງນາແລ ໄດ້ສ້າງຄວາມເສຍຫາຍເປັນບໍລິເວນກວ້າງພໍສົມຄວນ ເຮັດໃຫ້ອາຄານບ້ານເຮືອນຫຼາຍຫຼັງໄດ້ຮັບຄວາມເສຍຫາຍ ແລະ ຜົນລະປູກຂອງພໍ່-ແມ່ປະຊາຊົນ ກໍໄດ້ຮັບຄວາມເສຍຫາຍຫຼາຍເຊັ່ນດຽວກັນ. ຂະນະດຽວກັນນີ້, ກອງບັນຊາການ ປກສ ເມືອງນາແລ ກໍໄດ້ຮັບຜົນກະທົບເຊັ່ນດຽວກັນ ໂດຍມີກະລາລົດ 1 ຫຼັງ, ເຮືອນຮົ່ມເດີນກິລາເປຕັງ 1 ຫຼັງ, ລົດຈັກ 3 ຄັນ ແລະ ກະເບື້ອງຫຼັງຄາຫ້ອງການປິວອອກຈໍານວນໜຶ່ງ ລວມມູນຄ່າເສຍຫາຍທັງໝົດປະມານ 20 ລ້ານກວ່າກີບ.

ທ່ານ ຍັງໄດ້ຮຽກຮ້ອງເຖິງທຸກພາກສ່ວນ ຈົ່ງເພີ່ມສະຕິເກັບມ້ຽນ, ສ້ອມແປງເຮືອນ ແລະ ສິ່ງປຸກສ້າງອື່ນໃຫ້ມີຄວາມແໜ້ນໜາ ເນື່ອງຈາກວ່າໄລຍະນີ້ເລີ່ມເຂົ້າສູ່ລະດູຝົນ, ເຊິ່ງມັກຈະເກີດມີພາຍຸລົມແຮງ, ມີໝາກເຫັບຕົກ ແລະ ຝົນຕົກຫຼາຍ ອາດເຮັດໃຫ້ເກີດໄພນ້ຳຖ້ວມຕາມມາ.

ພາບ-ຂ່າວ: ຮທ ທະວີສັກ