ເຈົ້າແຂວງໆອຸດົມໄຊ ຢ້ຽມຢາມ ແລະ ໃຫ້ກຳລັງໃຈປະຊາຊົນທີ່ປະສົບເຄາະຮ້າຍ

0
245

ວັນທີ 22 ເມສາ ຜ່ານມາ, ທ່ານ ປອ ຄຳພັນ ເຜີຍຍະວົງ ເຈົ້າແຂວງໆອຸດົມໄຊ ພ້ອມດ້ວຍຄະນະ ແລະ ນັກທຸລະກິດ ໄດ້ລົງເຄື່ອນໄຫວຢ້ຽມຢາມພົບປະ ແລະ ໃຫ້ກຳລັງໃຈພໍ່ແມ່ປະຊາຊົນ ບ້ານສະກົວ ເມືອງນາໝໍ້ ແຂວງອຸດົມໄຊ ທີ່ປະສົບເຄາະຮ້າຍໄຟໄໝ້ເຮືອນ ໃນວັນທີ 19 ເມສາ, ເຊິ່ງໄດ້ສ້າງຄວາມເສຍຫາຍທາງດ້ານຊັບສິນ ໃນນັ້ນມີເຮືອນທີ່ຖືກໄຟໄໝ້ທັງໝົດຈຳນວນ 5 ຫຼັງ, ມີຜູ້ໄດ້ຮັບຜົນກະທົບ 22 ຄົນ ຍິງ 10 ຄົນ ລວມມູນຄ່າທັງໝົດ 259 ລ້ານກວ່າກີບ.

ຕໍ່ກັບສະພາບການດັ່ງກ່າວ ດ້ວຍຄວາມເປັນຫວງເປັນໃຍຂອງ ອຳນາດການປົກຄອງແຂວງ, ທ່ານເຈົ້າແຂວງໆອຸດົມໄຊ ພ້ອມດ້ວຍຄະນະ ແລະ ນັກທຸລະກິດ ກໍໄດ້ນຳເອົາວັດຖຸປັດໄຈຈຳນວນໜຶ່ງ ໄປມອບໃຫ້ຄອບຄົວຜູ້ປະສົບເຄາະຮ້າຍ ໂດຍໃນນັ້ນມີເຂົ້າສານ, ເຄື່ອງນຸ່ງ, ເຄື່ອງໃຊ້ໃນຄົວເຮືອນ, ເຄື່ອງມືທຳການຜະລິດ, ແນວພັນສາລີ, ນ້ຳດື່ມ ແລະ ເງິນສົດ ມອບໃຫ້ຄອບຄົວລະ 1 ລ້ານກີບ.

ໂອກາດນີ້, ທ່ານເຈົ້າແຂວງໆອຸດົມໄຊ ກໍໄດ້ຊີ້ນຳໃຫ້ພໍ່ແມ່ປະຊາຊົນພາຍໃນບ້ານ ໃຫ້ເປັນຈິດໜຶ່ງໃຈດຽວກັນ ຊ່ວຍເຫຼືອດ້ານແຮງງານໃນການປຸກສ້າງທີ່ຢູ່ອາໄສ ໃຫ້ຄອບຄົວຜູ້ປະສົບເຄາະຮ້າຍໃນຄັ້ງນີ້, ໃຫ້ພ້ອມກັນຜ່ານຜ່າບັນຫາຫຍຸ້ງຍາກໄປໄດ້ໂດຍດີ ແລະ ເພີ່ມສະຕິລະວັງຕົວສູງຂຶ້ນໃນການນຳໃຊ້ຟືນໄຟ ລວມໄປເຖິງການຈູດໄຮ່ຈູດສວນເພື່ອທຳການຜະລິດ ບໍ່ໃຫ້ເກີດມີໄຟລາມປ່າ. ນອກຈາກນີ້, ກໍໃຫ້ມີຄວາມຕື່ນຕົວ ໃນການພັດທະນາຊີວິດການເປັນຢູ່ໃຫ້ດີຂຶ້ນ.

Are you looking for the best web hosting?