ວັນທີ 26 ເມສາ 2020, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ  ພ້ອມຄະນະ ໄດ້ລົງຊຸກຍູ້ວຽກງານສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ຢູ່ບ້ານໄຊສົມບູນ ເມືອງໄຊທານີ ນະຄອນຫຼວງວຽງຈັນ ໂດຍມີພາກສ່ວນກ່ຽວຂ້ອງໃຫ້ການຕ້ອນຮັບ.

ທ່ານ ຄຳຕັນ ກວ້າງມະນີວັນ ນາຍບ້ານໆໄຊສົມບູນ ໄດ້ລາຍງານສະພາບໂດຍລວມຂອງບ້ານໃຫ້ຮູ້ວ່າ: ບ້ານໄຊສົມບູນ ເປັນບ້ານໜຶ່ງທີ່ຂຶ້ນກັບເມືອງໄຊທານີ ນະຄອນຫຼວງວຽງຈັນ ມີພົນລະເມືອງທັງໝົດ 3.986 ຄົນ ຍິງ 1.728 ຄົນ, ມີ 1.121 ຄອບຄົວ, ມີ 97 ໜ່ວຍ, ປະຊາຊົນພາຍໃນບ້ານສ່ວນຫຼາຍປະກອບອາຊີບເປັນກຳມະກອນຢູ່ພາຍໃນນິຄົມອຸດສາຫະກຳໂນນທອງ ແລະ ກຳມະກອນຕາມໂຮງຈັກໂຮງງານ 65%. ປະກອບອາຊີບເຮັດນາ 18%, ປະກອບອາຊີບຄ້າຂາຍ 12%, ອາຊີບພະນັກງານລັດ 5%.

ສຳລັບການຈັດຕັ້ງປະຕິບັດວຽກງານສະກັດກັ້ນ ແລະ ຄວບຄຸມການລະບາດຂອງພະຍາດ ໂຄວິດ-19 ທາງອົງການປົກຄອງບ້ານ ໄດ້ປະຕິບັດຕາມຄຳສັ່ງເລກທີ 06/ນຍ ລົງວັນທີ 29 ມີນາ 2020 ຢ່າງເຂັ້ມງວດ ໂດຍການຈັດຕັ້ງປ້ອງກັນເວນຍາມຢ່າງເປັນປົກກະຕິຕະຫຼອດ 24 ຊົ່ວໂມງ; ໃນນັ້ນ, ໄດ້ແຕ່ງຕັ້ງໜ່ວຍສະເພາະກິດຂັ້ນບ້ານ, ຕັ້ງດ່ານກວດຄົນເຂົ້າ-ອອກບ້ານ ອີກທັງປະຈຳການຢູ່ຫ້ອງການບ້ານ. ນອກນັ້ນ, ຍັງມີການປະກາດທາງໂທລະໂຄ່ງ ເພື່ອເຜີຍແຜ່ ຄຳສັ່ງ, ແຈ້ງການຕ່າງໆຂອງຂັ້ນເທິງ, ວິທີປ້ອງກັນ, ສະກັດກັ້ນ ແລະ ຜົນຮ້າຍຂອງພະຍາດໂຄວິດ-19 ໃຫ້ປະຊາຊົນຮັບຮູ້ໃນທຸກມື້.

ສະເພາະຢູ່ບ້ານໄຊສົມບູນ ໄດ້ມີແຮງງານທີ່ມາແຕ່ໄທ 15 ຄົນ ຍິງ 11 ຄົນ ແລະ ມາຈາກພູເບ້ຍມາຍນິ້ງ 1 ຄົນ ໃນນີ້ແມ່ນໄດ້ກັກໂຕຢູ່ບ້ານໂດຍແຍກຈາກຄອບຄົວ, ໂດຍການຈັດຕັ້ງບ້ານ, ກຳລັງກອງຫຼອນ ແລະ ປກສ ກໍໄດ້ຕິດຕາມຈຳນວນແຮງງານດັ່ງກ່າວບໍ່ຢູ່ໃນບໍລະເວນກັກໂຕຢ່າງເຂັ້ມງວດບໍ່ໃຫ້ທ່ຽວຈົນຄົບ 14 ວັນ.

ໂອກາດນີ້, ທ່ານ ຮອງນາຍົກລັດຖະມົນຕີ ໄດ້ມີທິດຊີ້ນຳໃຫ້ອົງການປົກຄອງບ້ານສືບຕໍ່ເອົາໃຈໃສ່ເກັບກຳສະ ພາບການໄປ-ມາຂອງປະຊາຊົນພາຍໃນບ້ານ, ປຸກລະດົມໃຫ້ປະຊາຊົນມີສະຕິຕໍ່ຕ້ານການລະບາດຂອງພະຍາດໂຄວິດ-19, ຊອກຮູ້ໃຫ້ໄດ້ເຖິງຄວາມຮຽກຮ້ອງຕ້ອງການຂອງປະຊາຊົນທີ່ຍັງມີຄວາມຂາດແຄນດ້ານຕ່າງໆເພື່ອຂໍການຊ່ວຍເຫຼືອນຳຂັ້ນເທິງ ພ້ອມທັງຊຸກຍູ້ໃຫ້ປະຊາຊົນທຳການປູກຝັງເພື່ອຫຼຸດຜ່ອນຄ່າໃຊ້ຈ່າຍໃນໄລຍະເສດ ຖະກິດມີຄວາມຫຍຸ້ງຍາກ.

ພ້ອມດຽວກັນນີ້ທາງຄະນະຍັງໄດ້ ນໍາເອົາເຄື່ອງຊ່ວຍເຫຼືອຈໍານວນໜຶ່ງ ເຊິ່ງປະກອບມີ ຜ້າປິດປາກ-ປິດດັງ ເຫຼົ້າ 90 ແລະ ໄຂ່ ມາມອບໃຫ້ອົງການປົກຄອງບ້ານ ເພື່ອນຳໄປມອບຕໍ່ໃຫ້ພໍ່ແມ່ປະຊາຊົນທີ່ມີຄວາມຫຍຸ້ງຍາກ ແລະ ພາກສ່ວນທີ່ເຮັດວຽກກ່ຽວກັບການຕ້ານພະຍາດໂຄວິດ-19 ພາຍໃນບ້ານ.

ຫຼັງຈາກນັ້ນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ  ພ້ອມຄະນະ ກໍໄດ້ໄດ້ລົງຊຸກຍູ້ວຽກງານສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ຢູ່ໂຮງແຮມແລນມາກ ແມ່ຂອງ ຣີເວີຊາຍ ໂດຍມີທ່ານ ປະກາສິດ ຈັນທະປັນຍາ ປະທານສະມາຄົມໂຮງແຮມ ແລະ ຮ້ານອາຫານລາວ ພ້ອມດ້ວຍຜູ້ປະກອບດ້ານທຸລະກິດໂຮງແຮມ ແລະ ຮ້ານອາຫານໃຫ້ການຕ້ອນຮັບ.

ທ່ານ ນາງ ອໍລະໄທ ສັນຕິຄົງຄາ ຜູ້ອຳນວຍການໃຫຍ່ໂຮງແຮມແລນມາກ ແມ່ຂອງ ຣີເວີຊາຍ ລາຍງານໃຫ້ຮູ້ວ່າ: ຕະຫຼອດໄລຍະພະຍາດໂຄວິດ-19 ມີການລະບາດ ເປັນສາເຫດເຮັດໃຫ້ການທຳເນີນທຸລະກິດທາງດ້ານໂຮງແຮມໄດ້ຮັບຜົນກະທົບຢ່າງຫຼວງຫຼາຍ ໂດຍສະເພາະໂຮງແຮມແລນມາກເນື່ອງຈາກວ່າບໍ່ມີແຂກມາພັກເຊົາ, ການຈອງຫ້ອງ ແລະ ການຈັດງານຕ່າງໆກໍຕ້ອງຖືກຍົກເລີກ ແຕ່ໃນຂະນະດຽວກັນ ທາງໂຮງແຮມຍັງມີຄວາມຮັບຜິດຊອບຕໍ່ພະນັກງານຈຳນວນຫຼາຍຮ້ອຍຄົນໃຫ້ມີລາຍຮັບ ໂດຍມີນະໂຍບາຍຜັດປ່ຽນກັນເຮັດວຽກ, ມີລາຍຈ່າຍໄຟຟ້າ-ນໍ້າ ລວມທັງການບຳລຸງຮັກສາອຸປະກອນອື່ນໆ. ຄຽງຄູ່ກັນນີ້, ທາງໂຮງແຮມຍັງໄດ້ເອົາໃຈໃສ່ປະຕິບັດຕາມຄຳສັ່ງ, ແຈ້ງການທີ່ທາງລັດຖະບານວາງອອກຢ່າງເຂັ້ມງວດ, ມີການເຜີຍແຜ່ໃຫ້ພະນັກງານຮັບຮູ້ທົ່ວເຖິງ, ສ້າງສະຕິໃຫ້ເຂົາເຈົ້າເປັນເຈົ້າການສະກັດກັ້ນການລະບາດຂອງເຊື້ອພະຍາດໂຄວິດ ໂດຍມີການວັດແທກອຸນຫະພູມ, ໃຊ້ເຈວລ້າງມື, ໃສ່ຜ້າອັດປາກ-ອັດດັງກ່ອນເຂົ້າມາເຮັດວຽກ.

ໂອກາດນີ້, ທ່ານ ສອນໄຊ ສີພັນດອນ ໄດ້ຍ້ອງຍໍຊົມເຊີຍຕໍ່ຜູ້ປະກອບການທີ່ມີຄວາມຮັບຜິດຊອບຕໍ່ແຮງງານ ເພາະພວກເຮົາແມ່ນແຮງງານສຳຄັນ; ສຳລັບການປະຕິບັດມາດຕະການຕໍ່ການສະກັດກັ້ນ, ການເຂົ້າ-ອອກ, ຕິດຕາມສະພາບການໄປ-ມາຂອງພະນັກງານກໍໃຫ້ສືບຕໍ່ເຮັດຢ່າງເຂັ້ມງວດ ພ້ອມທັງຕິດຕາມຂ່າວສານຜ່ານສື່ອອນລາຍທີ່ມີມູນຄວາມຈິງ ເພື່ອພ້ອມກັນມີສະຕິປະຕິບັດມາດຕະການຕ່າງໆທີ່ລັດຖະບານວາງອອກ.

ພາບ-ຂ່າວ: ບຸນເຫຼືອ ບຸນສົງ