ທ່ານ ພອນປະເສີດ ອິນທະສອນ ປະທານບໍລິສັດ 3SD ຈຳກັດ, ປະທານຮ່ວມພັດທະນາໂທລະພາບ ນະຄອນຫຼວງວຽງຈັນ ພ້ອມດ້ວຍຄະນະແບ່ງປັນນ້ຳໃຈຕ້ານໄພໂຄວິດ ໄດ້ນຳເອົາອຸປະກອນຊ່ວຍເຫຼືອປ້ອງກັນ ແລະ ຕ້ານການແຜ່ລະບາດຂອງພະຍາດ COVID-19 ມາມອບໃຫ້ ກອງບັນຊາການທະຫານ ນະຄອນຫຼວງວຽງຈັນ ໃນວັນທີ 29 ເມສາ 2020, ຮັບໂດຍ ພົຈວ ສີພອນ ຈັນສົມວົງ ຫົວໜ້າການເມືອງ ກອງບັນຊາການທະຫານ ນວ ພ້ອມດ້ວຍຄະນະທັງສອງຝ່າຍ ເຂົ້າຮ່ວມ.
+ ເຄື່ອງທີ່ນໍາມາມອບໃນຄັ້ງນີ້ມີ:
ຜ້າປິດປາກ-ດັງ, ເຈວລ້າງມື ພ້ອມດ້ວຍນ້ຳດື່ມ, ກາເຟ ລວມມູນຄ່າ 32 ລ້ານກີບ ແລະ ເງິນຈໍານວນ 20 ລ້ານກີບ ເພື່ອເປັນການປະກອບສ່ວນຊຸກຍູ້ຊ່ວຍເຫຼືອເຂົ້າໃນວຽກງານການປ້ອງກັນ, ຄວບຄຸມ ແລະ ຕ້ານການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (COVID–19).
ໃນໂອກາດນີ້, ພົຈວ ສີພອນ ຈັນສົມວົງ ກໍໄດ້ສະແດງຄວາມຂອບໃຈເປັນຢ່າງສູງຕໍ່ ທ່ານ ພອນປະເສີດ ອິນທະສອນ ພ້ອມຄະນະ ທີ່ໄດ້ປະກອບສ່ວນຊ່ວຍເຫຼືອໃນຄັ້ງນີ້, ເຊິ່ງເຄື່ອງອຸປະກອນດັ່ງກ່າວ ແມ່ນຈະນຳໄປໝູນໃຊ້ເຂົ້າໃນວຽກງານປ້ອງກັນ ແລະ ຕ້ານກະກັດກັ້ນ ການແຜ່ລະບາດຂອງເຊື້ອພະຍາດໂຄວິດ-19 ໃຫ້ໄດ້ຮັບຜົນໂຫຍດສູງສຸດ.