ໃນວັນທີ 5 ພຶດສະພາ 2020, ກອງບັນຊາການທະຫານນະຄອນຫຼວງວຽງຈັນ ໄດ້ຈັດກອງປະຊຸມສະຫຼຸບຖອດຖອນບົດຮຽນໃນການຈັດຕັ້ງປະຕິບັດມາດຕະການສະກັດກັ້ນການແຜ່ລະບາດຂອງພະຍາດໂຄວິດ-19 ແຕ່ວັນທີ 31 ມີນາ-3 ພຶດສະພາ 2020, ໂດຍການເປັນປະທານຂອງ ພົຈວ ສີພອນ ຈັນສົມວົງ ຫົວໜ້າການເມືອງ ແລະ ພັອ ສີ ທະວີໄຊ ຫົວໜ້າການທະຫານ ກອງບັນຊາການທະຫານ ນວ, ເຊິ່ງມີຄະນະພັກ-ຄະນະບັນຊາຈາກອົງການ, ຫ້ອງ ແລະ ກົມກອງອ້ອມຂ້າງທີ່ຂຶ້ນກັບ ພ້ອມດ້ວຍຄະນະຮັບຜິດຊອບທີ່ກ່ຽວຂ້ອງເຂົ້າຮ່ວມ.
ພັທ ເພັດບັນດິດ ແປງນາທີ ຫົວໜ້າຫ້ອງການ ກອງບັນຊາການທະຫານ ນວ ໄດ້ຂຶ້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດມາດຕະການສະກັດກັ້ນການແພ່ລະບາດຂອງພະຍາດໂຄວິດ-19 ໃນລະຫວ່າງວັນທີ 31 ມີນາ ຫາ ວັນທີ 3 ພຶດສະພາ 2020 ໂດຍອີງຕາມຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານເພື່ອຕ້ານພະຍາດ ໂຄວິດ-19, ອີງຕາມແຈ້ງການຂອງລັດຖະມົນຕີກະຊວງປ້ອງກັນປະເທດ ສະບັບເລກທີ 1783/ກປທ, ລົງວັນທີ 31 ມີນາ 2020 ວ່າດ້ວຍການເພີ່ມທະວີສະກັດກັ້ນ ແລະ ຕ້ານພະຍາດ ໂຄວິດ-19 ແລະ ອີງຕາມຄຳສັ່ງແນະນຳຂອງຄະນະສະເພາະກິດ ນວ ສະບັບເລກທີ 002/ ສພກ.ນວ ລົງວັນທີ 8 ເມສາ 2020, ເຊິ່ງໄດ້ມີການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ ຢ່າງເຂັ້ມງວດ, ຈັດຕັ້ງລະບົບປະຈຳການແຕ່ລະຂັ້ນເປັນປົກກະຕິ, ເພີ່ມທະວີໃນການເຝົ້າລະວັງສະກັດກັ້ນການແພ່ລະບາດຂອງພະຍາດ ໂຄວິດ-19 ຈັດຕັ້ງກວດກາວັດແທກອຸນຫະພູມພະນັກງານ-ນັກຮົບ ໃນການເຂົ້າ-ອອກຄ້າຍຢ່າງເຄັ່ງຄັດ, ໄດ້ເອົາໃຈໃສ່ແຕ່ງຕັ້ງອານຸກຳມະການ ຢູ່ຂັ້ນກອງບັນຊາການ, ລົງເຄື່ອນໄຫວຊີ້ນຳບັນດາກົມກອງທີ່ເຮັດໜ້າທີ່ປະສານສົມທົບກັບຂັ້ນເທິງ ແລະ ອະນຸກຳມະການແຕ່ລະພາກສ່ວນເຄື່ອນໄຫວກວດກາຂອບເຂດ ນວ ໂດຍນຳໃຊ້ກຳລັງຈຳນວນ 12 ສະຫາຍ ເຄື່ອນໄຫວກວດກາລາດະເວຕາມຕົວເມືອງ.
ຜ່ານການເຄື່ອນໄຫວ ມີຜູ້ລະເມີດຕໍ່ຄຳສັ່ງ ເລກທີ 06/ນຍ ຈໍານວນ 34 ກໍລະນີ, ນໍາໃຊ້ກໍາລັງທະຫານເມືອງ ຈຳນວນ 198 ສະຫາຍ ຊີ້ນຳກຳລັງກອງຫຼອນ, ສົມທົບກັບກຳລັງ ປກສ ກຸ່ມ, ປກສ ບ້ານ ແລະ ອຳນາດການປົກຄອງບ້ານ ເພື່ອຕິດຕາມ, ກວດກາ ການເຄື່ອນໄຫວຂອງປະຊາຊົນໃນການເຂົ້າອອກບ້ານຂອງຕົນເອງ ແລະ ສົມທົບກັບຄະນະສະເພາະກິດຂັ້ນເມືອງ, ອົງການທີ່ກ່ຽວຂ້ອງເພື່ອຕັ້ງຈຸດກວດກາການເຂົ້າ-ອອກເມືອງ, ການເຄື່ອນໄຫວສັນຈອນໄປ-ມາ ຂອງພົນລະເມືອງ ໃຫ້ມີຄວາມຮັບປະກັນໃນການປ້ອງກັນ, ຄວບຄຸມການແຜ່ລະບາດຂອງພະຍາດ ໂຄວິດ-19 ໄດ້ເປັນຢ່າງດີ.