ໃນອາທິດຜ່ານມາ, ບໍລິສັດ ລ້ານຊ້າງ ມີເນໂຣນສ໌ ລິມິເຕັດ (ລຊມລ) ບໍ່ຄຳ–ທອງ ເຊໂປນ ໄດ້ປະກອບສ່ວນອຸປະກອນ–ເຄື່ອງມືປ້ອງກັນການລະບາດຂອງພະຍາດ COVID-19 ເພີ່ມຕື່ມອີກເປັນຄັ້ງທີ 2 ໃຫ້ແກ່ ເມືອງວິລະບູລີ ເປັນມູນຄ່າ 101.500.000 ກີບ ແລະ ແຂວງສະຫວັນນະເຂດ ມູນຄ່າ 20.000 ໂດລາ (ປະມານ 180.000.000 ກີບ), ມອບໂດຍ ທ່ານ ນາງ ລັດສະນີ ສີສານ ຫົວໜ້າສາຍງານພົວພັນກັບພາກລັດ ຕາງໜ້າ ບໍລິສັດ ລຊມລ ແລະ ຮັບໂດຍ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງໆສະຫວັນນະເຂດ ແລະ ດຣ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.
ການປະກອບສ່ວນອຸປະກອນ ແລະ ເຄື່ອງມືຄັ້ງທີ 2 ນີ້ ແມ່ນເພື່ອສະໜັບສະໜູນໃຫ້ແກ່ຜູ້ມີສ່ວນຮ່ວມຫຼັກ ແລະ ຊຸມຊົນເຈົ້າພາບ ເຊິ່ງເປັນທີ່ຕັ້ງຂອງ ໂຄງການຂຸດຄົ້ນບໍ່ຄຳ–ທອງເຊໂປນ ໃນການຕ້ານການລະບາດຂອງພະຍາດ COVID-19. ກ່ອນໜ້ານີ້ ໃນເດືອນເມສາ, ບໍລິສັດ ລຊມລ ໄດ້ຮີບເລັ່ງໃຫ້ການສະໜັບສະໜູນເບື້ອງຕົ້ນໃຫ້ແກ່ ເມືອງວິລະບູລີ ແລະ ແຂວງສະຫວັນນະເຂດ ດ້ວຍການມອບອຸປະກອນການແພດ ມູນຄ່າ 142.000.000 ກີບ ເຊິ່ງອຸປະກອນທີ່ໄດ້ມອບ ລວມມີ: ໜ້າກາກອະນາໄມ, ເຄື່ອງກວດອຸນຫະພູມຮ່າງກາຍ, ນ້ຳຢາລ້າງມື, ເຄື່ອງພົ່ນຢາຂ້າເຊື້ອດ້ວຍໄຟຟ້າ ພ້ອມດ້ວຍນ້ຳຢາຂ້າເຊື້ອ.
ທ່ານ ສະໝານ ອະເນກາ, ຜູ້ອຳນວຍການໃຫຍ່ຂອງ ລຊມລ ກ່າວວ່າ:
ໃນຂະນະທີ່ປະເທດພວກເຮົາ ເລີ່ມມີການຜ່ອນຜັນບາງມາດຕະການ, ພະນັກງານໃນແຖວໜ້າ ກໍຄື ແພດໝໍ ແລະ ປະຊາຊົນ ເມືອງວິລະບູລີ ແລະ ແຂວງສະຫວັນນະເຂດ ແມ່ນຍັງຈະຕ້ອງໄດ້ກຽມອຸປະກອນ ແລະ ເຫື່ອແຮງ ເພື່ອຮັບມືກັບຄວາມສ່ຽງຕໍ່ກັບ ການລະບາດຂອງພະຍາດ COVID-19 ໃນຕໍ່ໜ້າ. ເຊິ່ງທາງ ບໍລິສັດ ລຊມລ ຫວັງເປັນຢ່າງຍິ່ງວ່າ ອຸປະກອນ–ເຄື່ອງມືທີ່ຈຳເປັນເຫຼົ່ານີ້ ຈະປະກອບສ່ວນໃນການຕໍ້ສູ້–ຮັບມືກັບ ການລະບາດຂອງພະຍາດ COVID-19.
ໃນເດືອນ ກຸມພາ 2020 ເຊິ່ງນັບເປັນເດືອນທີ 2 ຫຼັງຈາກທີ່ໄດ້ມີ ການລະບາດຂອງພະຍາດ COVID-19 ໄດ້ແຜ່ລາມຢ່າງວ່ອງໄວໃນທົ່ວ ສປ ຈີນ ແລະ ໃນຫຼາຍກວ່າ 20 ປະເທດ ໃນໂລກ, ບໍລິສັດ ລຊມລ ໄດ້ມອບເງິນສົມທົບ ຈຳນວນ 15.000 ໂດລາ ໃຫ້ແກ່ ກະຊວງພະລັງງານ ແລະ ບໍ່ແຮ່ ເພື່ອປະກອບສ່ວນເຂົ້າໃສ່ທຶນທີ່ທາງສະມາຄົມມິດຕະພາບ ລາວ–ຈີນ ຮ່ວມກັບ ນະຄອນຫຼວງວຽງຈັນ ໄດ້ຈັດຂຶ້ນ ເພື່ອລະດົມທຶນໄປຊ່ວຍເຫຼືອປະຊາຊົນຜູ້ປະສົບເຄາະຮ້າຍ ຈາກພະຍາດ COVID-19 ຢູ່ ສປ ຈີນ.
ມາຮອດປັດຈຸບັນ, ບໍລິສັດ ລຊມລ ໄດ້ມີລວມຍອດການສະໜັບສະໜູນໃຫ້ແກ່ ເມືອງວິລະບູລີ, ແຂວງສະຫວັນນະເຂດ ແລະ ຂະແໜງການກ່ຽວຂ້ອງ ເປັນຈຳນວນກວ່າ $65.000 ໂດລາ. ໃນຂະນະທີ່ ສະພາບການລະບາດຂອງພະຍາດ COVID-19 ໄດ້ມີການປ່ຽນແປງໃນແຕ່ລະມື້ຢູ່ນັ້ນ, ທາງບໍລິສັດ ກໍກໍາລັງປະສານວຽກຮ່ວມກັບ ສູນວິເຄາະ ແລະ ວິທະຍາແຫ່ງຊາດ ຂອງ ກະຊວງສາທາລະນະສຸກ ເພື່ອຫາວິທີທາງສະໜັບສະໜູນ ແລະ ການຮ່ວມມືທີ່ເປັນຜົນດີທີ່ສຸດໃຫ້ແກ່ ການຮັບມືຕ້ານກັບພະຍາດ COVID-19 ໃນປະເທດເຮົາ. ໂດຍ ບໍລິສັດ ລຊມລ ມີຄວາມມຸ່ງໝັ້ນໃນການປົກປ້ອງພະນັກງານ, ຜູ້ຮັບເໝົາຂອງບໍລິສັດ ແລະ ຊຸມຊົນທ້ອງຖິ່ນ ໃຫ້ມີຄວາມປອດໄພ ແລະ ບໍ່ສ່ຽງຈາກການຕິດເຊື້ອພະຍາດ COVID-19.
