ກອງບັນຊາການ ປກສ ນະຄອນຫຼວງວຽງຈັນ ຈັດພິທີປະກາດການເລື່ອນຊັ້ນໃຫ້ນາຍ ແລະ ພົນຕໍາຫຼວດ ທີ່ມີຜົນງານດີເດັ່ນ ແລະ ຄົບເງື່ອນໄຂມາດຖານຂອງການເລື່ອນຊັ້ນ ຈໍານວນ 266 ສະຫາຍ ໃນວັນທີ 20 ພຶດສະພາ 2020 ໂດຍການເຂົ້າຮ່ວມ ແລະ ປະດັບຊັ້ນຂອງ ພັທ ສຸກພະຈັນ ບຸດດາຄໍາ ຮັກສາການ ກອງບັນຊາການ ປກສ ນະຄອນຫຼວງວຽງຈັນ, ເຊິ່ງມີຄະນະຫ້ອງ, ພະແນກ ແລະ ພະນັກງານ-ນັກຮົບ ເຂົ້າຮ່ວມ.
ພັທ ນາງ ບົວລະພັນ ທິລະສັກ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງຂອງ ກະຊວງປ້ອງກັນຄວາມສະຫງົບ ວ່າດ້ວຍ ການເລື່ອນຊັ້ນໃຫ້ນາຍຕໍາຫຼວດ ກອງບັນຊາການ ປກສ ນະຄອນຫຼວງວຽງຈັນ ຜູ້ທີ່ມີຜົນສໍາເລັດ ໃນການປະຕິບັດໜ້າທີ່ວຽກງານ ແລະ ຄົບມາດຖານເງື່ອນໄຂຂອງການເລື່ອນຊັ້ນ ທີ່ໄດ້ກໍານົດໄວ້ໃນກົດໝາຍ ວ່າດ້ວຍ ກໍາລັງປ້ອງກັນຄວາມສະຫງົບ ປະຊາຊົນ ເຊິ່ງໄດ້ປະກາດເລື່ອນຊັ້ນດັ່ງນີ້:
- ພັນຕີ ຂຶ້ນເປັນຊັ້ນ ພັນໂທ ຈໍານວນ 25 ສະຫາຍ
- ຊັ້ນຮ້ອຍເອກ ຂຶ້ນເປັນຊັ້ນ ພັນຕີ ຈໍານວນ 62 ສະຫາຍ
- ຊັ້ນຮ້ອຍໂທ ຂຶ້ນເປັນຊັ້ນ ຮ້ອຍເອກ ຈໍານວນ 70 ສະຫາຍ
- ຊັ້ນຮ້ອຍຕີ ຂຶ້ນເປັນຊັ້ນ ຮ້ອຍໂທ ຈໍານວນ 129 ສະຫາຍ
- ຊັ້ນວາທີຮ້ອຍຕີ ຂຶ້ນເປັນຊັ້ນ ຮ້ອຍຕີ ຈໍານວນ 48 ສະຫາຍ
- ຊັ້ນສິບເອກ ຂຶ້ນເປັນຊັ້ນ ວາທີຮ້ອຍຕີ ຈໍານວນ 2 ສະຫາຍ
ໂອກາດດຽວກັນ, ພັທ ສຸກພະຈັນ ບຸດດາຄໍາ ສະແດງຄວາມຍິນດີຕໍ່ ຜູ້ທີ່ໄດ້ຮັບການເລື່ອນຊັ້ນໃນຄັ້ງນີ້ ພ້ອມທັງເນັ້ນໃຫ້ສືບຕໍ່ຈັດຕັ້ງປະຕິບັດໜ້າທີ່ວຽກງານວິຊາສະເພາະ ໃຫ້ໜັກແໜ້ນ, ເຂັ້ມແຂງທັງດ້ານພາລະກໍາລັງ, ຄວາມຮູ້-ຄວາມສາມາດ ແລະ ເອົາໃຈໃສ່ໃນການປ້ອງກັນຄວາມສະຫງົບສຸກຂອງປະຊາຊົນ ໃຫ້ດີຂຶ້ນ, ສືບຕໍ່ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆ ຢູ່ນະຄອນຫຼວງວຽງຈັນ ໃຫ້ນັບມື້ນັບລຸດລົງໄປເລື່ອຍໆ.
