ສະຖານທູດ ສປ ຈີນ ປະຈໍາ ສປປ ລາວ ໄດ້ນໍາເອົາເຄື່ອງອຸປະກອນປ້ອງກັນພະຍາດໂຄວິດ-19 ມາມອບໃຫ້ ກະຊວງ ປກສ ໃນວັນທີ 4 ມິຖຸນາ 2020, ກ່າວມອບໂດຍ ທ່ານ ຈຽງ ຈ້າຍຕົງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ກ່າວຮັບໂດຍ ພົທ ວິໄລ ຫຼ້າຄໍາຟອງ ລັດຖະມົນຕີ ກະຊວງ ປກສ ແຫ່ງ ສປປ ລາວ ໂດຍມີ ຄະນະທັງສອງຝ່າຍ ເຂົ້າຮ່ວມ.
ທ່ານ ຈຽງ ຈ້າຍຕົງ ກ່າວວ່າ:
ເຄື່ອງອຸປະກອນປ້ອງກັນພະຍາດໂຄວິດ-19 ທີ່ນໍາມາມອບໃຫ້ ກະຊວງ ປກສ ໃນຄັ້ງນີ້ ປະກອບມີ: ຜ້າອັດປາກ-ດັງ ຈໍານວນ 20.000 ແຜນ ແລະ ເຄື່ອງກວດວັດແທກອຸນຫະພູນ ຈໍານວນ 30 ອັນ ເພື່ອປະກອບຊຸກຍູ້ເຂົ້າໃນຂົງເຂດວຽກງານກະຊວງ ປກສ ເວົ້າລວມ, ເວົ້າສະເພາະ ກໍຄື ປະກອບສ່ວນເຂົ້າໃນຂົງເຂດວຽກງານປ້ອງກັນ, ຄວບຄຸມ ແລະ ສະກັດກັ້ນເຊື້ອພະຍາດໂຄວິດ-19 ຢູ່ພາຍໃນກະຊວງ ປກສ ໃຫ້ມີຄຸນນະພາບສູງຂຶ້ນ.
ໂອກາດດຽວກັນນີ້, ພົທ ວິໄລ ຫຼ້າຄໍາຟອງ ກໍໄດ້ຕີລາຄາສູງ ແລະ ກ່າວສະແດງຄວາມຂອບໃຈເປັນຢ່າງສູງຕໍ່ ທ່ານ ຈຽງ ຈ້າຍຕົງ ພ້ອມດ້ວຍຄະນະ ທີ່ໄດ້ນໍາເອົາເຄື່ອງອຸປະກອນປ້ອງກັນພະຍາດໂຄວິດ-19 ມາມອບໃຫ້ ກະຊວງ ປກສ ໃນຄັ້ງນີ້ ແລະ ອວຍພອນໄຊໃຫ້ ທ່ານເອກອັກຄະລັດຖະທູດ ສປ ຈີນ ປະຈໍາ ສປປ ລາວ ພ້ອມຄະນະ ຈົ່ງມີພາລະນາໄມທີ່ສົມບູນ, ປະສົບຜົນສໍາເລັດໃນທຸກໜ້າທີ່ວຽກງານ, ມີຄວາມຜາສຸກໃນຊີວິດສ່ວນຕົວ, ຄອບຄົວ ແລະ ໜ້າທີ່ວຽກງານໃຫ້ເຕີບໃຫຍ່ຍິ່ງໆຂຶ້ນ.
