ບັນຫາການເກີດອຸບັດຕິເຫດຕາມທ້ອງຖະໜົນເຫັນວ່າ ຍັງເກີດຂຶ້ນຢ່າງຕໍ່ເນື່ອງ, ເຊິ່ງໃນແຕ່ລະວັນອຸບັດຕິເຫດໄດ້ສ້າງຜົນເສຍຫາຍດ້ານຊັບສິນ, ສຸຂະພາບ ແລະ ຊີວິດຜູ້ຂັບຂີ່ ແລະ ຜູ້ໂດຍສານໄປຈໍານວນບໍ່ໜ້ອຍ. ຈາກການຕີລາຄາຂອງພາກສ່ວນທີ່ກ່ຽວຂ້ອງເຫັນວ່າ ສາເຫດຫຼັກທີ່ພາໃຫ້ເກີດອຸບັດຕິເຫດ ສ່ວນຫຼາຍແລ້ວເກີດຈາກນັກຂັບຂີ່ີເອງເປັນຜູ້ລະເມີດກົດລະບຽບຈະລາຈອນ. ມື້ນີ້, ໜັງສືພິມຄວາມສະຫງົບຈະນຳສະເໜີ 10 ຫຼັກພື້ນຖານໃນການຂັບຂີ່ປອດໄພ ທີ່ດັດມາຈາກເອກະສານເຜີຍແຜ່ກົດລະບຽບຈະລາຈອນຂອງເຈົ້າໜ້າທີ່ຕໍາຫຼວດຈະລາຈອນ ປະກອບມີຄື:
- ຄິດຈະດື່ມຢ່າຂັບຂີ່ ຄິດຈະຂັບຂີ່ຢ່າດື່ມ ເພາະທ່ານເມົາແລ້ວຂັບຂີ່ລົດຈະມີຄວາມສ່ຽງສູງຕໍ່ການເກີດອຸບັດຕິເຫດ
- ໃສ່ໝວກກັນກະທົບລ໋ອກສາຍຮັດຄາງ ແລະ ໃສ່ເຂັມຄັດນິລະໄພທຸກຄັ້ງເມື່ອທ່ານຂັບລົດ ຖ້າຫາກທ່ານເກີດອຸບັດຕິເຫດ ການໃສ່ໝວກກັນກະທົບ ແລະ ເຂັມຄັດນີລະໄພຢ່າງຖືກວິທີ ຈະຊ່ວຍທ່ານຈາກໜັກໃຫ້ກາຍເປັນເບົາໄດ້
- ຂັບຂີ່ລົດໃນຕອນກາງຄືນຕ້ອງໃຊ້ຄວາມລະມັດລະວັງ ແລະ ຄວາມໄວຕໍ່າ
- ບໍ່ແຊງໃນເຂດທີ່ເປັນອັນຕະລາຍ, ບໍ່ຂັບຂີ່ຜິດທາງ ຫຼື ເສັ້ນແບ່ງຊ່ອງທາງ
- ເຄົາລົບ ແລະ ປະຕິບັດກົດຈະລາຈອນຢ່າງເຂັ້ມງວດ
- ຮັກສາໄລຍະຫ່າງໃຫ້ເໝາະສົມ ແລະ ບໍ່ໃຊ້ຄວາມໄວເກີນກຳນົດ
- ຫຼຽວຫຼັງ ຫຼື ເບິ່ງແວ່ນສ່ອງຫຼັງເພື່ອກວດເຊັກຄວາມປອດໄພ ແລະ ເປີດສັນຍານກ່ອນອອກລົດ ຫຼື ລ້ຽວລົດ
- ຫຼຸດຜ່ອນຄວາມໄວລົງເມື່ອເຫັນເສັ້ນທາງປຽກມື່ນ, ທາງໂຄ້ງ ແລະ ທາງມີຂຸມ
- ເມື່ອຂັບຂີ່ຜ່ານທາງຄົບ-ທາງແຍກຄວນຢຸດ ຫຼື ຫຼຸດຜ່ອນຄວາມໄວລົງ
- ໝັ່ນກວດເຊັກລະບົບຢາງລົດ, ເບຼກ ແລະ ລະບົບໄຟຕາລົດໃຫ້ເປັນປະຈໍາ ເພື່ອຄວາມປອດໄພໃນເວລາທ່ານຂັບຂີ່
ຖ້າຫາກບັນດາທ່ານປະຕິບັດຕາມ 10 ຫຼັກພື້ນຖານການຂັບຂີ່ປອດໄພຢ່າງເຂັ້ມງວດ ແລະ ໃສ່ໃຈປະຕິບັດກົດລະບຽບຈະລາຈອນເຊື່ອວ່າທ່ານຈະບໍ່ເກີດອຸບັດຕິເຫດ ແຕ່ຖ້າເກີດຜົນກະທົບຈາກໜັກຈະກາຍເປັນເບົາ.
